唔駛多講，今日一定係全香港都講 iPhone 4，除左先達！因為班大佬擔心手頭批 3GS 走唔到貨，擔心到新機發布o既亢奮情緒都冇晒，聽我講o下今日先達個市係點啦！
首先，原來今日先達 D 3GS 係冇即時大跌價，幾令人出乎意料！因為前晚份 Keynote 冇講實 iPhone 4 淨機價係幾錢，所以就算大家都預左係同 3GS 差唔多價，好驚 Set 高價會坐貨，Set 低價又蝕底，於是索性封盤唔賣住。真係有人問價o既話，就求其開番上星期個價，16GB $5,280 同 32GB $6,180，所以 3GS 價冇即時大插到。但其實今日都冇乜客會問 3GS 價架喇，個個都等 iPhone 4 啦！
不過，有 D o係網上買機o既人，已經驚到勁劈 3GS，有人將 32GB 一減成千蚊，賣到 $4,980。其實係人都知 iPhone 4 一發布，3GS 實會大跌價，班大佬都知應該o係發布前走晒 D 貨，但奈何真係走唔到，先至搞成今鋪齊齊坐貨驚餐死o既局面，認真失策。
至於回收價，按照上兩代經驗，新機一出舊版起碼跌$1,000，而上星期個回收價 3GS 就 16GB $4,500 同 32GB $5,200，3G 就 8GB $2,500 同 16GB $3,200，今日去就應該3GS 就 16GB $3,000 同 32GB $3,500左右啦，大家心裏有數！不過當小記返到屋企，蘋果官方已經公佈左新iPhone 4 價錢，大家不妨可以去先達格多幾間價，可能會有幾十蚊上落唔定既!
分享到 :
最新影片
