Source: 小編粉絲團
早排 Whatsapp 推出網頁版，掀起軒然大波，人人討論，上埋報紙頭版，仲有各式文章教大家「如何不被老闆發現下使用 Whatsapp」，可見其重要及普及程度。但諗深一層，點解大家咁 sam hui 要收收埋埋上 Facebook 同用 Whatsapp 呢？老闆唔係唔用呀？自從 Smartphone 普及到連公公婆婆都用的時候，其實我想話基本上做野都無分晝夜及 office hour 同 non-office hour 架啦，老細／個客打黎，你可以唔聽咩？收到 email notification，你可以扮睇唔到咩？你以為你唔係公司／飛左去旅行就唔使做咩？用 Facebook/Whatsapp 就唔係做緊野咩？
返工時間，變得越來越「彈性」。
小妹有幸，間唔中需要客串充當公司 Facebook 的小編，亦因為工作同科技息息相關，Facebook 成為主要收風渠道，邊間公司最近出左隻咩 APP，邊個最近集資成功，政府最近插手科技界啲乜野…我雖然唔係呢方面專家，亦可以識少少扮代表略知皮毛，更可以係工作中光明正大用 Facebook 同 Whatsapp。
話就話老細唔 nike 你返工用社交網站，但隨住網上媒體越來越流行，唔少行業都有一啲改變。唔講最明顯個啲做 Ad 同 Marketing 的公司，零售業都有好大影響（唔係講阿里巴巴個款）。上個星期之嘛，我行街經過一間細舖仔賣韓國護膚品，好奇入去睇下，因為冇人，個 sales 姐姐好好心機 sell 我買野，最後我都敵唔過把口浪過油熱情的姐姐，買左少少試用，仲做埋會員，填 form個陣，有個小型調查…
MC題：您從何得知本店？
A. Facebook 專頁 B. Instagram 專頁 C. Blogger 介紹 D. Youtuber 介紹
冇「其他」揀…
其實我都係咁啱路過…
我唔識答。
放棄。
個一日我望住份卷調查，呆左兩三秒，發現原來 Social Media Marketing 已經發展到可以完全取代其他所有實體宣傳策略。可能我太 out，我成日覺得上網買野好易買到假野同埋照片與實物不符，無論網上啲人講都幾天花龍鳳都好，我都偏向唔信 （戒心好重 lol）我 prefer 去舖頭試過摸過襯過先買。就當呢個世界好多水魚我係例外啦，如果你仲覺得用 Facebook 或其他社交媒體係純粹玩／娛樂消閒／吹水聊天過日辰，咁真係 sorry，你未免太唔入流了。君不見有多少囡囡本來藉藉無名的朋友，因為一個 Facebook 專頁，而一夜爆紅，成為城中熱話，帶來多少搵食機會，繼而辭掉正職，全職 Freelance，而至少養得起自己。
(戴頭盔 mode) 我不是在慫恿你開工的時候搏炒／唔使理老細面色地用 Facebook 或其他社交媒體，只是如果咁好彩有老細級的朋友睇到，我想佢地留意返，Facebook 或其他社交媒體唔止係 for fun，仲可以 generate income 😀
分享到 :
最新影片
