剛才為大家試了 Apple Watch 的 Sports 版，講完最平，另一焦點肯定係最貴的 Edition 版本。究竟最貴可以去到 12 萬幾的 Apple Watch Edition 有幾「土豪」？小編 就同大家親身實試。
陽光下霸氣全失！
今次係小編 第一次戴 Apple Watch，戴住 10 幾萬上手個下都幾「騰」（成大半年人工啦個度……），但諗起可以試戴 18K 金同埋玫瑰金的 Edition 版 Apple Watch，就真係「有今生無來世」。初初係室內睇，其實無論 18K 金定係玫瑰金的 Apple Watch 都真係幾靚，但點知一企埋近窗邊有陽光的地方，就即刻「見光死」，本身金色變咗做好似普通版的鋼銀色，要哄到好埋先見到係金色。試諗下，戴隻 Edition 版出街都係想型唧（當然都會成為不法之徒的「目標」Orz……），而家咁搞法，戴隻 Edition 人地以為你戴幾千蚊的普通版，直頭係「霸氣盡失」啦！
如果大家真係想買，小編 就建議大家買玫瑰金版好過 18K 金版啦，我個人認為係靚啲。
▲其實今次 Apple 單是 Apple Watch Edition 版本，每間分店都預備了唔少錶俾大家試戴，真係幾體貼。
▲室內睇，18K 金係幾靚的。
▲但一去到室外，遠睇就真係同隻普通版分別唔大，Edition 版即刻霸氣盡失！
▲要哄到好埋先睇到係 18K 金款……
▲小編 覺得玫瑰金版點計都靚過 18K 金版囉。
少少墜手造工幾靚
至於手感方面，Edition 版始終都係用金屬物料做錶玉，所以就算配皮或者膠錶帶用，都會有少少墜手。如果配鋼錶帶的話，就更加重，所以女士們，小編 建議大家用番皮錶帶；而男士們唔怕重少少的話，鋼錶帶就更加襯啦。
▲Edition 版戴係手上手感都幾舒服，但如果驚墜手就建議揀皮錶帶。
▲膠錶帶係就係幾舒服，但配落去 Apple Watch Edition 度就唔好啦，又係被列入霸氣盡失系列……
另外，由錶玉到錶帶，整體 Apple Watch Edition 造工都幾靚，打磨好有高級名錶的感覺（唔開熒幕的時候），用來襯衫，其實不難。
▲其實 Apple Watch Edition 造工都算幾靚。
▲每隻錶的右側都有兩個制：Home / Scroll 鍵及常用聯絡人快速鍵。
▲錶玉背就是多個感應器。
▲其實 Apple Watch Edition 連個包裝盒都幾靚。
▲Apple Store 內都有唔同款的 Watch Edition 俾大家先睇再決定買邊隻。
售價：$78,800 起
查詢：Apple（800 908 988）
