最近 Surface 3 推出令大家焦點又返回 Tablet 合體機，當然這類機種又點少得 Asus，因為它們都有推出一款 Transformer Book T100 Chi，某程度係之前 T100 的升級版，如果你都想知這部 T100 Chi 表現如何就記得要留意以下速試。以下有更多資料:
金屬殼更輕薄 可邊充電邊插 OTG！
Transformer Book T100 Chi（下稱 T100 Chi）係之前 T100 升級版，兩者分別係 T100 Chi 終於配備 1,920 x 1,200 IPS 屏幕，Tablet 更輕薄又用了金屬機身，而且除了 1 組 USB 及 Micro USB(OTG) 外，機上還有 1 組 Micro USB 3.0 (OTG) 及 Micro HDMI 接口，變相大家便可一邊充電、一邊駁住 USB 手指 / Mouse 使用，這個設計簡值係「冇得彈」! 手感方面，單純 Tablet 都唔算很重，單手拎起都唔太吃力，但手感就會 Yoga Tablet 好少少（有手柄），而合體感覺會有少少重，因為 Docking 部分都淨重約 500g。
▲ 單手拿起 Tablet 都算輕鬆。
▲ 機旁左上角有電源、音量、Windows 鍵，再落就有 3.5mm 耳機及 Micro USB (OTG/充電)。
▲ 機身右側有 MicroSD 讀卡器、USB 3.0 OTG 及 Micro HDMI。
▲ 有 2 組 USB 好處係一邊可充電 (左邊) 另一邊可接駁讀卡器、手指及 LAN 等裝置。
▲ 機背指紋問題都頗嚴重……
鍵盤變藍牙 磁石吸力超強
Docking 設計大至跟 T100 時差唔多，主要分別係連接改為藍牙，因此合體亦改成磁石方式。老實說，小編 自己唔太喜歡藍牙鍵盤，因為連線總是有不穩時候，但意外的是磁石吸力反轉部機「Fing」都唔會跌，基本上地鐵坐底打字俾人撞到都唔會「反機」，但要留意有小小頭重尾輕。不過，最搞笑係 T100 Chi 合體後打開係一件頗困難的事，從正面打開幾乎是冇可能，容易一點就知只能在旁邊揭開。
▲ 新磁石設計吸力非常強，即使反轉再「Fing」都唔會甩。
▲ 坐下打字非常穩陣 (比 Yoga、Surface 3 還穩) ，但手仍須輕輕扶住。
▲ 合體後都唔算太薄。
▲ 合體後較厚身，但仍然可放落適合 iPad 的袋內。
▲ 由於 Tablet 同 Docking 都冇預留凹位，所以平放時正面揭開非常困難，要從側面才易點。
鍵盤須時習慣、TouchPad 手勢多
鍵盤方面，其實 10 吋機鍵盤變化都唔會太大，驟眼睇同 Yoga Tablet 應該差唔多，但對比下按鍵 Size 其實細小小，打字冇乜影響，但問題係右下角按鍵排位須時習慣，尤其係 Shift 太窄易打錯、Pg up/dn 須用 fn 鍵揀字麻煩一點。話雖如此，但這個 Docking 優勝之處係 TouchPad 會大一點，支援多種手勢，而最重要係 Tablet 可睇到剩餘電量 (唔似 Yoga Tab 要估估下)，不過小編 覺得個 Docking 相對唔輕，但竟然冇一個標準 USB 或電池倒充功能 (用 OTG 都唔得，只可為 Docking 充)。
▲ 右下角按鍵排位分佈有點太密集。
▲ 預載軟件提供 TouchPad 手勢選項及顯示鍵盤電量。
▲ 接駁藍牙滑鼠後，兩者運作順暢。
屏幕偏黃 須自行調色
這次 T100 Chi 吸引地方係屏幕升級至 1,920 x 1,200 解像度，當然 1080p 級數早就應該要有不值得讚，但令我意外的是屏幕以 Asus 來講算非常光 (平時用開 1/3 都夠)，但缺點係偏黃都幾明顯，如果強行把 T100 Chi 跟 Yoga Tablet 對比就會看到白色變了微黃（難道這是防藍光？），幸好機內有 Splendid 可自調色溫 (或在驅動程式調整)，問題都總算有辦法解決到。
▲ 屏幕解像度升級至 1,920 x 1,200。
▲ 雖說屏幕升級至 1,920 x 1,200 IPS 屏幕，但畫面預設比較偏黃。(Yoga Tablet 2 (左)是偏藍的）
▲ 可用機內 Splendid 軟件來調整想要色溫，小編 覺得向冷色調至 8 左右就會順眼一點。
▲ T100 Chi 兩側都設有喇叭，有立體聲效果，但音量唔太夠（(始終不是面向自己）。
性能還好 電量挨到大半日
之前 T100 推出賣點之一係最先用 Atom Z3000 系列處理器，但 T100 Chi 就冇仿傚 Surface 3 用 Atom X7 而是繼續用 Atom Z3775 處理器（Asus 通常用最新款），老實說性能唔差，一般文書、睇戲、簡單後製（執相/剪片）都夠用。雖然佢都係跟 2GB RAM，但儲存容量就有 64GB（有 128GB 但香港冇返）。至於電量，小編 試用來工作 1 日發現電池大約挨到 6 小時 (11am – 6pm 剩 10%)，續航力來說 Yoga Tablet 會較強，但它始終支援 USB 充電，換言之有「尿袋」就唔怕冇電，而值得留意係跟來 USB 火牛係支援 9V / 2A 快速充電。
▲ 搭載 Intel Atom Z3775 處理器 (四核) 及 2GB RAM。
▲ 內置 64GB 儲存空間實際有約 38GB 可用。
▲ 用 BatteryMark 預載測試可錄得若 5 小時 20 分鐘電量。
▲ 小編 由上午 11 時開始使用，到下午約 6 時就只剩 10% 電量。
▲ 可用「尿袋」為 T100 Chi 充電，但速度唔算好快。
▲ T100 Chi 的 Micro USB 用途都可為 Docking 或手機充電，但小編 最不滿係 Docking 不可倒轉為 Tablet 充電。
小編 ：用法傾向 Notebook、定價貴咗少少
試用了 Asus Transformer Book T100 Chi 後，小編 幾滿意佢整個設計，特別係有 2 個 USB 這點最抵讚。雖然性能、體驗及外攜性都冇大問題（評價比自己的 Yoga Tablet 還高），但 T100 Chi 致命傷係定價貴咗少少，而問題係價錢價 Surface 3 連 Keyboard 差距太近 （$4,936），畢竟 Surface 3 規格最新、機身甚至有標準 USB 頭，如果唔係咁趕時間經常要街打字 (但求唔反機) 或對鍵盤有要求，正常情況都會揀 Surface 3，不然就要睇下腦場市價賣幾錢了。
售價：$4,698 （連 Docking）
查詢：ASUS（3582 4770）
