筆者使用 iPhone 沒有小熊，所以年中收唔少廣告電話。廣告電話基本上無分貴賤，係天恩眼中一樣都係令人討厭，不過有一 D 廣告電話真係會令人著火。以下係我最討厭的廣告電話種類，唔知各位 unwire 讀者認唔認同 ?
第 5 位 – 獎品利誘
通常一接通就恭喜你得到乜乜船飛，要你上去公司攞；另一種就係你用緊果個網絡商話「免費」送你乜乜服務 3 個月。基本上呢類電話某程度上挑戰緊你的人格，潛台詞就係睇死你會貪小便宜上當。當你拒絕的時候，佢地仲會發動大絕招，講到你好似好蝕底好笨咁，有錢都唔執「下？先生點解唔用呀，真係免費喎！你到時唔用打上黎即刻 cut 左佢就ok 」
你估打上黎真係講咁易 ?? cost 大到不得了，要我日日記住幾時夠期，仲要過 5 關斬 6 將咁接駁得到你 cut 服務，天都光啦，一陣 cut 唔到就蝕一個月錢比佢。所以任何免費野我都拒絕，生存係用成副人工去租／供樓的香港地，邊有咁多著數丫，有都用黎供樓啦仲會送比你? unwire 讀者們你話啱唔啱 ?
第 4 位 – 急口令
一接通好似已經準備你會準備 cut 線咁，完全無理你感受，一接通就不停急口令發炮. 我試過 按著 speaker phone 等佢講自己做野，佢講足 3 分數之後先 feel 到有異樣，問一問：先生? 先生 ? ，我一答「係」，佢又再爆多 3 分鐘，但其實我只能夠聽到 20% 內容。最後我真心打斷同佢講我真係聽唔到你講乜，快又懶音多咬字唔清，問佢可唔可講慢d 同清楚少少，點知佢講完好之後，好似錄音機咁重播一次，無語氣無感情，一個 Tone 過，同頭先的分別只係 3 倍速 slowdown 到 2.5 倍咁，都係唔知佢講乜
第 3 位 – 播音樂等返轉頭
一接通左唔係人聲，而係一段音樂或接駁中的聲音，基本上係因為佢個電腦不停亂打電話，一駁通就彈比 sales 講，有時 Sales 爆左線，你反為要等番果邊的人聽你電話。喂你 coldcall 打黎仲要我等你電話，你有無病呀 ?
第 2 位 – 電腦錄音
呢 d 電話廣告公司手法真係低賤都無得再低賤，連人與人之間的基本尊重都無。你 sale 我最低限度搵個人同我講，你搵個電腦播錄音比我聽做乜野呢? 通常呢d 公司我會聽一陣知道係乜然後終生 blacklist 唔再幫襯，曾經因為咁我 cut 左一張信用咭同戶口，清晒d錢出黎。
第 1 位 – 講唔正廣東話 / 中國外判式
一打黎就「腥生你考呀，窩de 係xxxx」，個人即著火 ! 先唔講係咪中港兩地文化差異，就算係美國人，你連講野都未正，真係令人聽得好辛苦好受罪，試問仲邊有心情聽你落去 ? 再者好多公司因為 Cost Down 北上搵中國公司做，當你諗到呢個原因你就再火一D，你間公司可以慳果少少錢去 trade off 客人基本的聆聽方便，咁可想而知間公司有幾重視客戶體驗，基本上任何服務都唔會再有信心去用，連 sale 野你都咁無 heart , 收左錢後仲會有好野 ?
更火的係，你請香港人做番廣告推廣都叫有少少增加香港就業機會，而家出去搵外勞 sale 香港人，想點先?
分享到 :
最新影片
