夏天熱辣辣，無三十都有廿幾度，背心熱褲又係時候出動。但對於好似小編呢 D 毛女孩嚟講，脫毛確實係一件令人困擾既事，又痛，又敏感，最慘就係唔持久。好多姊妹都會諗住做激光永久脫毛就可以一勞永逸，但下下逐個部位收萬幾蚊，真係聽到都心寒。其實不同部位既毛髮可以採用不同既脫毛方式處理，未必一定要用到激光既。今日小編就同大家分享一下多年嚟既脫毛經驗，希望幫到大家選擇合適既脫毛方法啦！
三種毛髮分清楚
係脫毛之前，我地要分清楚想脫既毛髮係邊一類。一般來說人類既毛髮有 3種：胎毛、柔毛 同 永久毛。胎毛就係一出世時既 BB毛，非常細而柔軟，通常不含色素，出世後一段時間就會自然脫落。而平時係面同身體既毛叫做柔毛，很少超過 20cm。最後，頭髮、腋下、比堅尼位比較粗黑既就係永久毛，由於係真皮層深處，有明顯的毛球，所以去除既時候亦特別痛。
去除表面法
剃刀
使用方法：使用剃刀前要先將肌膚徹底清潔，並且塗上乳液以作保護。之後再用剃刀以逆毛方向刮除毛髮，只將皮膚表面的毛髮刮除。
徹底度：★☆☆☆☆
持久度： ★☆☆☆☆
痛楚程度：★☆☆☆☆
容易過敏程度：★★★☆☆
小編點評：大部份女仔第一次脫毛都係用剃刀，除左貪佢平，唔會痛同埋即時見效。不過，就唔太持久， 3-4日又要再剃，而且過程中好容易破壞皮膚的角質層，減低對環境的防禦力，造成毛囊發炎。如果剃腳踝、膝頭等唔平既部位就更加要小心，唔係好容易刮損。長期使用亦有可能因為毛孔閉縮導致毛髮倒生，造成表面突起小顆粒，到時就更易刮損，所以小編通常都會在臨時要出街但唔記得脫毛既時候用。
脫毛膏
使用方法：脫毛膏通常都係強鹼性的化學物質。清潔好肌膚後，將脫毛膏順毛塗敷在毛髮上 5-10分鐘，以軟化毛髮根部，再用刮除去，最後用水清洗。
徹底度：★★★☆☆
持久度： ★★☆☆☆
痛楚程度：★★☆☆☆
容易過敏程度：★★★★☆
小編點評：用脫毛膏雖然唔會痛，不過就有強烈既味道。雖然依家出了很多花香味既配方，但就變得容易敏感。而且脫毛膏唔持久，2-3日就會長出新的毛髮，如果頻繁使用會更易刺激肌膚。小編曾經用過 veet 幾種唔同既脫毛膏，但都出現過敏，不但脫唔清，仲令到小腿紅卜卜同痛，所以後來都無再用這種脫毛方法了。
熱力脫毛
使用方法：熱力脫毛聽起來有點像傳統去豬毛的方法，利用熱力碳化表面毛髮，並直接傳導熱能至毛囊，減慢毛髮生長。
徹底度：★☆☆☆☆
持久度： ★★★☆☆
痛楚程度：★☆☆☆☆
容易過敏程度：★☆☆☆☆
小編點評：呢個方法比較少聽，不過小編幾鍾意呢種方法。之前試用過 No!no! PRO5 ，唔單止唔痛，又唔敏感，仲連少少熱力也感受不到。至於，脫毛效果只同用剃刀差不多，脫完都仲會有少少黑點，D毛一星期就先開始生番。不過一部要成三千幾蚊，小編最後都係無買到呢！
連根拔起法
眉鉗
使用方法：用鉗夾住毛髮的根部靠近皮膚，順毛生長方向一條一條拔除，最後可以用爽膏水收細毛孔。
徹底度：★☆☆☆☆
持久度： ★★★☆☆
痛楚程度：★★★☆☆
容易過敏程度：★★☆☆☆
小編點評：拔一次，毛髮大約一個月左右先會再長出，但要用鉗逐條毛拔除非常費時，而且力度要掌握好，盡量避免將毛髮夾斷，有時夾得太耐會眼花呢！鉗既時候會有少少痛，如果係拔除腋下等永久毛就更痛，可以試下按住毛上面的肌膚以減輕痛楚。除左適合毛髮稀少既女仔，如果用其他脫毛方法有漏網之魚都要用到呢！
脫毛器
使用方法：將脫毛器在皮膚表面滾動，刀頭運轉時一次過夾住多條毛髮，扯起毛髮後拔除。
徹底度：★★★☆☆
持久度： ★★★☆☆
痛楚程度：★★★★★
容易過敏程度：★★☆☆☆
小編點評：脫毛器就好似係一個大型既鉗，會一次過將幾條毛拔除，痛楚當然係用鉗幾倍啦！但又快幾倍，所以最好就係沖涼時用，以減輕痛楚。
蜜蠟
使用方法：蜜蠟一般都係美容院使用，多用係腋下、比堅尼位等毛髮較粗的位置。首先要順毛髮生長的方向均勻塗上熱蠟、暖蠟或冷蠟，不宜過厚，然後緊緊蓋上貼布，逆毛的方向盡可貼近皮膚快速撕除。
徹底度：★★★★☆
持久度： ★★★☆☆
痛楚程度：★★★★★
容易過敏程度：★★☆☆☆
小編點評：蜜蠟脫毛需要快，而且徹底，但那種痛，小編試過一次脫腋下已經怕怕，就算事前冰敷左，都減輕唔到痛楚。最慘係，如果你既毛髮從唔同方向生，可能要脫幾次先乾淨。如果要一個月去美容院俾錢做一次，我諗未必個個女仔都可以堅持到。
脫毛蠟紙
使用方法：蠟紙脫毛既原理跟蜜蠟差不多，但減少左塗蜜蠟既步驟，將蠟紙貼在肌膚上，然後逆毛撕下。通常都係家居用，用係手、腳、面、眉更多。若毛髮略長，應先用鉸剪修短到約 5mm。
徹底度：★★★☆☆
持久度： ★★★☆☆
痛楚程度：★★★★☆
容易過敏程度：★★☆☆☆
小編點評：蠟紙係家用的脫毛方法來說都算貴，一張蠟紙用過一次再用就會得番一半效果，如果要脫一對腳就幾乎要用半盒蠟紙，如果要脫多個部份的話，一個月脫一次其實唔太化算。
光學脫毛法
宅光脫毛
使用方法：宅光脫毛係以選擇性光熱分解的原理，讓毛幹上的色素選擇性吸收大部分的光波，最終達到停止毛髮生長的效果。
徹底度：★★★★☆
持久度： ★★★☆☆
痛楚程度：★★★☆☆
容易過敏程度：★☆☆☆☆
小編點評：記得初初出宅光脫毛機既時候，小編真係好興奮，因為佢聲稱可以永久脫毛，而且去 Fitboxx 試機亦唔覺得痛。可惜小編買左部 Silk’n Flash & Go 番去，隨著用既次數增加，度數同強度都會增加，當加到 4度既時候就開始覺得痛了。每打一下，小腿就會不由自主咁彈一下。不過，宅光脫毛唔會有即時有效果，需要接受一年半到兩年既療程，為左靚，而且俾左四千幾蚊，我乖乖咁就足兩年，每個月一次，可惜唔知係自己打得唔均勻還是甚麼，結果一小腿可以有些地方有毛，有些地方無，變得非常怪。當然脫毛效果因人而異，而且一部份就可以脫多個部份，還算不錯。
彩光脫毛
使用方法：雖然宅光、彩光同激光都係以破壞黑色的毛囊組織來終止毛髮生長，但彩光的光源強弱不均而且分散，不單只能打進皮膚表層，更可能會因光源控制困難，而容易灼傷皮膚，所以要找相得過既美容院做。
徹底度：★★★☆☆
持久度： ★★★★☆
痛楚程度：★★★★☆
容易過敏程度：★☆☆☆☆
小編點評：彩光脫毛雖然比起激光脫毛平，不過就係有好多脫毛出事既個案，所以小編一路都唔敢試。不過現在都有唔少牌子出左家用彩光脫毛機，例如：PHILIPS Lumea IPL，唔知有無 Wire 民可以分享下成效呢？
激光脫毛
使用方法：激光既光源強而集中，可打進較深皮層，徹底破壞黑色毛囊，所以需要既療程次數較彩光少 ，係現時美容院最常用既脫毛方法之一。
徹底度：★★★☆☆
持久度： ★★★★☆
痛楚程度：★★★★★
容易過敏程度：★☆☆☆☆
小編點評：講左咁耐，你可能以為我最後都係覺得激光脫毛最好，但咁就錯啦！因為小編就係一個做左足足年幾療程，白白俾左兩萬幾蚊，脫手毛，面毛同腋下都失敗既例子！最後仲要被困美容中心，報埋警都攞唔番錢！小編唔係要在這裡完全否定激光脫毛既功效，始終效果因人而異，不過就真係要揀一間相得過既美容中心，同埋要有心理準備，你可能比幾百蚊試脫完腋下，仲有前臂、上臂、手腿…單單係面部都已經分成 5 part既價錢了！幸好依家唔少牌子出左家用激光脫毛機，例如：Rio Laser Tweezer Instructions，打每一下既範圍比宅光機細，不過比較集中，我睇應該可以試下。
脫後注意事項
講完脫毛既方法，脫毛後其實都有幾個注意事項。首先， 唔可以去桑拿浴、蒸汽浴、照紫外線燈同曬太陽，因為受熱後很容易令脫左毛既肌膚會變得敏感。另外，脫毛期間一些角質層被黏走，皮膚會好乾，因此一定要塗番 D 輕身既保濕啫喱。最後， 無論用邊種脫毛方法，或多或少都會有皮膚損傷，所以唔好去游水，避免感染。
資料來源：skin168、leechitse.myweb.hinet
