聽日下午 3:01pm 就係 iPhone 6s / 6s Plus 接受預訂的時間，今次碰啱係星期六而唔係 weekday，唔洗番工的 wire 民就可以舒舒服服安坐家中訂愛機。當然筆者知道唔少 wire 民都想買番部 iPhone 6s / 6s Plus 自用，但面對一大堆炒家 / BOT，可以點樣提高成功率呢？ Edward 就特別為大家準備了一份一分鐘攻略，令大家可以提升買到愛機的成功率。
預備工夫
無論大家用咩方法，都建議今晚 / 聽朝先做好準備，咁大家訂機個時就唔洗拿手唔成勢啦。究竟要預備咩？其實只需要兩件事：
▲首先大家先係 Apple ID 個人帳戶入面，填好哂所有個人資料，最重要係填好帳單地址同埋信用卡資料，咁大家就唔洗訂機個時花時間再填。
▲第二樣嘢當然係預備好信用卡，而且要係一早已輸入 Apple ID 帳戶的信用卡，因為訂機時大家需要輸入卡背的安全碼。
方法一：使用 Apple Store App
之前幾次經驗都話俾 Edward 知，雖然大家可以安坐家中電腦前訂機，但成功率較高，甚至可以早啲入到 Apple Store 訂到機，始終是透過 Apple Store APP。當然，要裝 Apple Store APP，首先大家要有一部 iPhone、iPad 或者 iPod Touch。安裝好之後就按以下步驟做啦。
安裝好後：
- 約今天 2:30pm，最遲 2:45pm 開始入app 登入（因為如果大家係 3:01pm 先入去的話，可能會因為太多人已入 APP 而遲咗或者入唔到）。
- 按購物鍵。
- 進入 iPhone –> iPhone 6s –> 繼續。
- 選好你想購買的型號、顏色、容量，再按「不連 SIM 卡」。
- 你會見到上方出現「暫停供應」（當然啦，都未到 3:01pm 開售時間，自然未有）。
- 不斷連按「不連 SIM 卡」刷新，預計開始後如果你成功搶到就會看到有存貨，並出現進一步的購買提示。建議大家最多都係買 2 部，否則 cut 單機會會好高。
- 訂購完成後，只要等到電郵通知，就代表訂購成功。當然收到此 email 都唔代表唔會被 cut 單，因為按過往經驗 Apple 有機會 random cut 單的。自用用家此時唯有求神拜佛希望 Apple 唔好當你係炒家而 cut 你單啦。
（P.S.：由於有傳今次 Apple 會改變銷售 iPhone 策略，有機會好似 Apple Watch 開賣時般長時間開賣，所以最緊要係完成程序後睇番付運日期，如果唔係第一水，即係 9 月 25 日至 10 月初收到，就考慮是否 cut 單保平安吧。當然，如果你只是用家，幾時收到機都無問題啦。）
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
方法二：Apple Store 網站
除非你已安裝真正可用的自動購買程式（經驗所知第一日絕大部分自動購買程式都未必有效），否則 Apple Store APP 還是最好的選擇。但如果各位 wire 民沒有任何 i-Devices 的話，就直接點按此進入香港 iPhone 6s / 6s Plus 購買網頁搶機啦。
為咗令大家更容易搶得心頭好，以下就等 Edward 為大家準備好各容量同埋顏色的連結，咁大家到時一 click 入去就訂到，唔洗煩！
iPhone 6s
iPhone 6s Plus
方法三：網絡商出機
而最後一個方法，就係透過網絡商預訂出機。據知有 3 間網絡商都會同 Apple Online Store 一樣，聽日 3:01pm 係他們官網接受預訂，如果大家咁啱合約就完或者已完想轉台或續約買機，可以考慮呢個方法，不過就唔肯定係咪 9 月 25 日當日拿到機啦，因為都係睇先後次序。但作為用家，都無乜所謂啦，相信唔會遲好耐掛。（作為炒家就唔建議用呢個方法啦，因為近年網絡商每次出新 iPhone 都會加台費，成本愈來愈高，真係劏完機賺埋都唔夠蝕。）
P.S.：筆者建議如果大家是打算買 iPhone 6s / 6s Plus 自用，聽日確實是好機會，因為今次 iPhone 6s / 6s Plus 極有機會好似 Apple Watch 開賣時般長期開賣，然後按大家成功訂購的次序去依次派貨。因為很難控制到貨時間，加上要等速遞送貨，太多不確定因素，所以他們寧願會以傳聞 9 月 16 日的 iReserve 戰場才出手，因為可以 25 日拿機然後即買即放，賺取最大利潤。當然，iReserve 有冇暫時都未有人知，所以有機會炒家聽日都會少量入貨，以免一旦 Apple 真係取消 iReserve 的話，都有貨揸手。所以各位用家，都唔好太老定啦。
P.S.：最後提提大家，其實唔少炒家都會首先考慮 iPhone 6s Plus 128GB 玫瑰金色版本，因為利潤有機會最高。如果你是打算炒賣又唔想同人爭，不妨一開賣就考慮 64GB、甚至 16GB 的 iPhone 6s Plus 玫瑰金版呢種「人棄我取」的策略，成功率可能會大幅提升。）
祝各位 wire 民早日成功買得心頭好！
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
分享到 :
最新影片
