無論男仔定女仔 ﹑大人定細路，影相同自拍都係我地每日嘅必備動作；加埋近排興拍 VLOG，小編身邊啲朋友都話要擺上 Youtube 做 Youtuber。又要影相又要拍片，咁係咪一定要揹住部牛龜咁大嘅單反先至掂呢？ Elke 今次帶埋佢隻狗仔「叔叔」同大家一齊試試 LG V10，佢大讚相機功能夠晒豐富之餘又唔難用，啱晒鍾意拎起手機隨手就拍嘅人。
雙自拍鏡頭 120° 廣角輕鬆捕捉背景 「快速分享」上 FB 或 IG
作為女仔嘅 Elke ，當然第一樣野係先睇前鏡頭。 「平時鍾意帶埋狗狗出街，但要同佢自拍時硬係好麻煩，唔係影唔到佢，就係我得返半邊面…」其實依家手機嘅前鏡頭質素雖然有提升，但好多都唔夠廣角，想好似 Elke 咁影埋狗狗 ﹑ 一大班朋友自拍或者一個自拍攞多啲背景都總係麻麻。今次Elke 用上 LG V10 自拍時，發現擁有雙自拍鏡頭嘅 LG V10 ，一個為 80° 標準鏡，一個則為 120° 超廣角鏡；唔但止畫質好，更重要係 120° 廣角夠晒 wide ，就連同摩天輪自拍攞晒成個景都無難度！自拍完當然要即刻擺上 Facebook 或者 Instagram ，呢個時候可以撳埋快速分享，影完係拍攝畫面下方拉一拉條 Bar 出黎就會顯示可以分享既社交平台，「啊，以後要呃 like 就簡單得多啦..」
▲用80° 標準鏡時(左圖)可以影到張大頭相，可以影得親密啲！當用了 120° 超廣角鏡(右圖)就可以輕鬆影埋摩天輪背景，單手揸機都無難度！
▲當每次影完一張相，右下就有個剪咀彈出黎就可以快速分享。
▲拉條Bar 出黎仲可以揀分享到邊個社交平台添！
多畫面拍攝 影相拍片一take 過
「平時又想影相又想拍片 Post 上社交網站都咪話唔煩；以前總係要 Download 一大堆 Apps，但係用 LG V10 就可以一次過攪掂晒，咁我就可以專心諗點影同點拍，出嚟既效果當然都靚啲啦！」LG V10 可以分割畫面，再選擇唔同鏡頭拍攝，可以先揀 80° 標準前鏡玩自拍，再用 120°超廣角前鏡同狗狗影多張相 ，最後再用主鏡頭拍低「叔叔」嘅搞笑樣，三合一影像效果夠晒趣緻，而且仲有幾個唔同既分割畫面選擇添! 慳番影完逐張逐張合併既時間，大把時間影多幾張靚相啊！
▲依家唔洗再亂咁搵 Apps Download 啦，因為可以揀用邊個鏡頭影相或者拍片一 take 過 share 到社交網站呃 Like！
Snap Video 模式 轉換場景無難度
「如果想好似 Instagram 咁拍片，可以拍下停下換場景又得唔得呢？依家只要揀 Snap Video 模式直接拍就 OK！」拍片成日都會拍拍下想換場景，但如果要拍下停下返屋企再剪接返兩條片，小編同 Elke 都表示「唔制啊！」。 LG V10 內置 Snap Video 模式，用法同大家係 Instagram 拍片大致相同：只要想錄既時候撳拍片個掣就可以錄 3 秒，如果撳實個制最長可以拍到 60 秒添㗎！「主人， Instagram 做唔到咁長掛？」
▲如果想好似 Instagram 拍片咁，一樣喺想錄影時撳實個掣(紅圈)就可以，每段影片最長可以拍到 60 秒添㗎！Snap Video 仲會預先儲存，自動合併咁多條影片，一take過？無難度！
十五秒自動剪輯 一個掣快速搞掂
「如果影完一條片又發覺有啲位太長，想 Cut 短啲可以點算？」呢個亦係小編最常遇到既難題（咪叫我返屋企整呀！）。 Elke 話：「洗乜啊！ LG V10 有十五秒自動剪輯功能：撳一撳右上角果支筆，跟住 LG V10 就會通過算法去刪除過多嘅鏡頭，將精彩畫面剪成十五秒短片。」
▲只要撳一下紅圈位置就可以進行十五秒自動剪輯，好似小編咁懶剪片就非常啱用嗱！但如果你喜歡親自剪片，也可以在下方刪走多餘的片段。
▲剪完片仲可以揀內置 Filters 同埋音樂，條片就變得更 Pro 更好玩啦！
專業級拍片規格 隨拍一樣輕鬆做到
得意功能一籮籮，而 LG V10 規格同功能一樣咁有「內涵」啵！1,600 萬像素主鏡頭設有 OIS 光學防震，而且仲設有手動攝錄模式，可以隨時調整快門速度 ﹑ISO 或者白平衡等，豐富程度不輸相機。佢仲配備三個獨立收音咪，調校收音既靈敏度，達到指向收音嘅效果；加埋風聲雜音過濾器，拍嘅片出黎包畫質靚聲音更靚！ Elke 最後仲好蠱惑咁話：「LG V10 最啱用黎偷拍㗎啦！」（小編：um… 偷拍人好似唔係咁好喎…）
▲Elke：「有了這個手動攝錄模式，專業到好似相機咁，以後出街我唔洗拎牛龜咁大部機，淨係拎 LG V10 夠晒輕鬆。」
「Elke：主人，LG V10 以下犯上啊…」
作為女仔，平時 Elke 都會自拍 ﹑拍下 VLOG ，但每日總係好掙扎究竟帶相機出去拍定拎手機，一方面唔想揹咁重出街，但係又怕手機影得唔好。不過玩完 LG V10 都係時候放低部大牛龜相機，皆因 LG V10 夠晒應付日常基本需求，有咗超廣角前鏡頭，平時連相機唔加廣角鏡都做唔到咁；而且拍片又有風聲雜音過濾器，連最驚嘅手機拍片收聲問題都克服埋，加埋 Snap Video 同十五秒自動剪輯，就算每日拍生活短片分享都話咁易，「LG V10 拍片可以做到咁真係犯晒規啊」！
影片示範 :(請耐心等候 Loading ..)
