噚日介紹過的 京都琉璃溪彩燈祭 地點比較偏僻未必個個都有時間去，今日就等我依莉詩帶大家去大阪，睇幾個光之饗宴中比較大型的燈飾啦！
大阪俾依莉詩的感覺同香港差唔多，都係一個大城市，而燈飾都係穿插街道同商場之間，但唯一唔同的是大阪會有系統地將每年冬季的燈飾整合成仲叫「光之饗宴」的活動，並一次過推廣，更方便遊客去欣賞。當然因為旅程的時間有限 (小編年假有限)，所以我都無去晒所有景點，不過就從中挑選咗幾個比較大型的同大家分享。
藍色的海洋王國
頭一兩次去大阪多數都會買大阪周遊卡，貪佢包車費之餘免咗唔少景點入場費，而當中天保山摩天輪可以話係必到，(香港坐一次摩天輪要成舊水架！)，亦因為咁我推薦大家走去埋旁邊的海游館前廣場睇燈飾。海遊館的燈飾以藍白為主，每棵樹、每級樓梯都有燈，只是
▲ 單單係行上去的呢條藍白間樓梯已經好迷人了。
▲ 燈柱上的燈飾一條條懸掛，好似一隻隻水母係空中飄浮。
▲ 上到廣場有多個用燈砌出來的海浪，加上不斷改變顏色的摩天輪做背景，構成
▲ 因為時間關係我無入到海遊館，但隔住圍欄見到入面有好多隻企鵝燈飾
築港 ‧ 天保山冬季彩燈
日期：2015年 11月 25日 至 2016年 3月 6日 (17:00-22:00)
地點：海游館前廣場
梅田一帶商場的小雪人
梅田係多條鐵路的交匯處，亦係多個大型商場匯聚的地區，所以有多個小型燈飾散落各處。新春搶福袋期間， 大家不妨留意下身邊有無小雪人出沒啊！
▲ 係大阪駅見到樓梯上有兩個雪人，非常可愛。
▲ 樓梯的另一端係一個溜冰場，旁邊有個電子 BB，只要係抱下佢、搖下佢，氹得佢開心，溜冰場的燈光
▲ 另外，梅田阪急大廈一樓有多個童話風的聖誕櫥窗，不過我諗依家去應該見唔到了。
Twilight Fantasy～光が奏でる水のハーモニー～
日期：2015年 11月 4日 至 2016年 2月 14日 (17:00-23:00)
地點：大阪車站城時空廣場
有表演有美食－中之島公園
最後介紹的地方今年已經完咗，不過我都想在此推介一下，等大家下年聖誕去大阪的話可以多個選擇。大阪市政府周邊 至 中之島公園的燈飾算係光之饗宴中最大規模的景點，而且從地鐵御堂筋線和京阪電車的「淀屋橋站」、地鐵界筋線和京阪電車「北濱站」1號出口出來行唔洗 5分鐘就到，非常方便。呢度唔單止有燈飾睇，每晚隔 15分鐘左右，圖書館會有光雕表演，旁邊亦有多架美食車同小食攤位，等大家行到攰可以食下嘢。
▲ 每晚隔 15分鐘左加都會有光雕表演，配合音樂同燈光改變，懷舊
▲ 再行入一 D 有一條樹燈路，每晚指定時間 D 燈都會配合音樂由黃色轉成其他色，一閃一閃。
▲ 雖然比起 琉璃溪彩燈祭 多人，好難停下來影相，不過係樹間走過氣氛亦很好。
▲ 而公園的一邊亦變成燈海，一條條海豚係上面跳躍。
▲ 樹上掛滿小朋友畫的許願包。
▲呢度規模都幾大，可惜入唔到去，未必能滿足自拍意慾啦！
▲ 天寒地凍係時候食 D 嘢暖下胃，呢度的美食車同小食攤位有好多特色美食。
▲ 而我最欣賞的是呢串 500 yen 的和牛串，食落軟淋淋、鹹鹹地，仲好多肉汁，真係好想食多幾串啊！
OSAKA光之文藝復興2015
日期：2015年12月12日 至 25日 (17:00～23:00)
預覽點燈 11月29日 至 12月11日
閉幕點燈 12月26日至 2016年1月17日
地點：大阪市政府周邊 至 中之島公園
依莉詩點評
大阪的光之饗宴同京都琉璃溪彩燈祭好唔同，一個熱熱鬧鬧，一個寧靜浪漫，不過同樣俾香港的大型得多，所以去開大阪點都要停下來欣賞一下。
分享到 :
最新影片
