BELI BALA BELI BALA 天天身體會增高～ 唱就唱得多，但 30歲的小丸子唔單止無長高，仲依然保持童顏。今日我依莉詩就去咗銅鑼灣問佢養生秘訣，點知就俾我見到佢同爺爺係商場度浸溫泉啊！
5大影相位逐個捉
起初唔少人都以為呢個展覽會好似台灣個個咁大型，可惜土地問題，展場離不開商場，所以並無傳聞中咁大。至於影相位亦只有 5個，不過作為 90後的集體回憶，相信會非常受歡迎。
▲ 皇室堡中座唔算大，幸好除咗影相位，仲有 pop-up store 吸引 fans 。
1) 暖笠笠玫瑰溫泉
日本人冬天最鍾意浸溫泉，小丸子於是同 3年4班的同學仔到富士山附近旅行兼浸溫泉。愛惜小丸子的爺爺當然跟埋去。睇下佢地係櫻花樹下同成班馬騮一齊浸得幾嘆！係陣陣的玫瑰花香中，我都好想浸埋一份啦！
▲ 一向自戀的美環同學係橘上望住大野同杉山同學的背面充滿奇怪幻想，但佢地好似掛住睇風景完全無留意到。
▲ 爺爺身邊的不但有蒸氣冒出，仲要發出玫瑰花香，好似置身溫泉一樣。
▲你都可以好似花輛同學咁走入浸中扮浸溫泉架！
▲ 一向奇特思維的野口同學坐係池邊一邊浸腳，一邊奸笑，唔知佢又諗緊 D 咩呢？
2) 一家人快樂旅館
去到旅館，小丸子一家圍係暖爐享受緊鬆脆的天婦，而小丸子就扮成馬騮娛樂緊大家。
▲ 小丸子一家坐定定開飯，如果你想攝鏡加入都幾難架！
▲整個場景佈置得好精緻，天婦羅的像真度超高呢！
▲ 換咗一身馬騮衣的小丸子跳跳紮，全家都俾佢氹得好開心。
3) 情人節戀愛神社
點解？點解花輪同學會同小丸子一齊去戀愛神社？既然事實係咁，我唯有希望祈完福，新一年真係會行桃花運啦！
▲ 和服 look 的小丸子非常可愛。
▲ 雖然寫住納奉，但放唔到錢落去，所以睇嚟都唔會求到咩桃花架啦 (灰)！
4) 幸福小丸子達摩像
達摩係日本人常用的緣起物，所以今次小丸子就化身成達摩像，希望大家都能夠係新一年實現夢想。
5) 財神爺爺派元寶
離開皇室堡，去到附近的東角，財神爺爺正係度派元寶，但旁邊的馬騮小丸子就搶住拎完又拎，好貪心啊！
小丸子誕生 30周年特區
櫻桃小丸子漫畫已誕生 30周年，所有 Pop-up Store 旁特意展出了多幅漫畫家櫻桃子於 1986年開始創作的小丸子畫稿，當中更有小丸子剛誕生時的樣添呀！
▲ 呢幅由 One Piece 原作者尾田榮一郎所畫的小丸子版路飛超級搞鬼，突然我都想剪番個小丸子頭啊！
富貴御土產屋 Pop-up Store
日本的溫泉鄉通常有好多御土產屋售賣特色手信，今次的 Pop-up Store 亦唔例外，出售多款會場限定小丸子商品。
▲ 除了一般的小丸子精品外，更有唔少為今次展覽特別設計的精品。
▲ 木芥子係日本東北地區的手工人偶，配合以手製美濃和紙所做的和服，小丸子立即優雅起來，而且全球限定 150個，非常珍貴。
▲ 用美濃和紙所造的盒每一個都唔同，係獨一無二的精品。
▲ 同樣用美濃和紙所造的面油紙連鏡造工細緻，連我都想入手。
▲ 同場內佈置一樣的小丸子幸福達摩公仔同暖手枕，攬住就唔怕對手凍冰冰了。
▲ 小丸子幸福達摩系列的鐵盒曲奇好有意頭，新年送禮俾小朋友夠晒特色。
▲ 店內仲有小丸子利是封同揮春賣。雖然幸福達摩系列好可愛，但如果一次收齊「發」、「福」真係唔知好嬲定好笑。不過我都係重視個餡多 D 。
▲ 印有小丸子圖案的 Ukulele 好特別，用嚟冧女啱晒。
▲ 我一見到呢個杯麵立即心心眼， $49個係就係貴咗 D ，不過食完個碗又用得番，好想買啊！
▲ 小丸子同野口的眼罩超搞笑。
▲ 配埋口罩就可以 cosplay 啦！
▲ 另外，只要係皇室堡用電子貨幣消費滿 $800就可以換到一套 8個的利是封了。
依莉詩點評
起初以為呢個展覽會好似台灣個個咁大型，可惜土地問題，展場離不開商場，所以並無想像咁大，其實都有 D 失望。不過 5個佈置都好精緻，仲有花香，值得一讚。問題係，除了溫泉之外，佈置間好似無預位俾人企入去影相，夾硬攝鏡就會好怪。至於精品，雖然尖沙咀最近都開咗專門店，不過呢間有唔少會場限定精品，特別係美濃和紙系列非常吸引我。
新年氣氛 ★★★☆☆
必影指數 ★★★☆☆
必買指數 ★★★★☆
皇室堡 x 櫻桃小丸子 玫瑰溫泉物語
日期：1月23日至2月28日 (10am-10pm)
地點：銅鑼灣皇室堡地下中庭（顯示地圖）
分享到 :
最新影片
