係今個月尾 3 月 31 日，趁住復活節檔期係香港上映嘅《我要做鷹雄》，係根據英國滑雪運動員 Eddie Edwards 真實故事所改編而成。故事主要講述他的傳奇歷程：自小夢想參加奧運的 Eddie ，在知道「高山速降滑雪」項目難以奪標後，改練幾十年來英國都沒運動員參與的「跳台滑雪」項目。在教練 Bronson 艱苦訓練下成功入選，最終成功踏上加拿大冬季奧運會。傳記片一向都唔係小編杯茶，但今次《我要做鷹雄》我卻意外地覺得幾好睇喎。
英式幽默易消化 Eddie 角色設定夠搞笑
《我要做鷹雄》電影簡介中講到「英式幽默」，一開始小編都有驚咗一陣，始終英式幽默好多時唔啱香港觀眾嘅笑點（包括小編）；不過其實今次嘅笑位相當易消化，相信亦係因為多得英國、美國和德國合拍嘅關係。
另外， Eddie 本身嘅角色設定就已經非常搞笑，由一開頭細個嘅 Eddie 為入選奧運不停試唔同運動結果，再到大個時同一般人唔同嘅傻勁，做出好多被認為無人敢挑戰嘅 mission impossible 。 Eddie 不但搞笑仲相當討喜，當然亦唔少得演員 Taron Egerton 嘅功勞啦。整體嚟講，笑位十足加上 Eddie 嘅搞笑傻氣個性，的確為作為勵志喜劇嘅《我要做鷹雄》加分不少。
CG 同故事鋪排粗糙 無損故仔可看性
小編必須老實講，今次《我要做鷹雄》無論係 CG 定故事鋪排上都比人感覺粗糙，始終僅僅只有兩個月嘅拍攝工作的確有啲倉卒。但亦要好老實講，即使 CG 同鋪排有粗糙，卻仍然無損故仔可看性。
即使小編覺得今次劇情陳述有啲平淡，所謂嘅高低潮位通通都可預見，但故仔嘅可看性成功搭救。係視覺效果上，尤其 Eddie 進行跳台滑雪時嘅畫面都拍同後製得麻麻；而故事又係一個滿懷自信嘅小朋友堅定不移咁追尋夢想，結果被夢想打沉，再被旁人提點下重拾夢想踏上勝利舞台。如果單睇故仔大綱的確不怎麼樣，但將所有加埋一齊，卻又好似標題講咁「老套得好看」（啊，難以言喻嘅魔力）！
「人生不在輸嬴 而是全力以赴」
片尾引用現代奧林匹克運動會的發起人 Pierre de Coubertin 的一句話：「奧林匹克不在輸嬴而在參與 人生不在輸嬴而是全力而赴」呢類名言不但煽情而且用到爛，但套上 Eddie 的故事卻係無咗個種膩感。
奧運到最後，世界第一只有一個，呢個係不爭嘅事實； Eddie 係二十多歲時才進行跳台滑雪的訓練，與一般六歲就開始進行訓練的選手自然有一段差距。不過， Eddie 對奧運夢嘅堅持令佢成功為英國開創自 1929 年來幾十年都無人願意嘗試破嘅跳台滑雪記錄。係全世界中， Eddie 嘅成績絕對係包尾；但係所有觀眾眼中，佢比任何人都「成功」，包括世界第一。做自己鍾意嘅事，重要嘅唔係輸嬴，而係你心中對此有幾歡悅，同埋背後有一班欣賞你堅持嘅人。
總結：搞笑追夢傳記片 老套到盡便是好看
講夢想講熱血嘅電影，簡直多到有啲氾濫了；但《我要做鷹雄》係少數小編想推介比仍然未比現實打沉夢想嘅讀者入場睇。雖然又係「人無夢想同條咸魚有乜分別」﹑「 Chur 盡 or nothing」，而且將你腦中所有嘅老套元素都通通擺晒落去，但卻又因為咁意外將「追夢」呢個題材嘅傳記片提升到另一個層次（當然亦唔少得笑點多多）；正所謂「 7 到盡頭便是型」，《我要做鷹雄》就係「老套到盡便是好看」！
分享到 :
最新影片
