上幾個星期狂派領袖麥加登及博派領袖柯柏文由銅鑼灣街頭打到入東港城，帶來變形金剛粉絲珍藏展。粉絲等到頸都長，今日基地保衛戰終於正式展開啦！等我依莉詩帶大家睇下啦！
3米高《變形金剛》G1 現身
當中焦點當然係場內 3個 3米高 3D 立體雕塑，完美展示出博派領袖柯柏文由貨櫃車變型成機械人嘅過程。另一邊廂，狂派領袖麥加登亦以機械人型態登場，隨時準備好與柯柏文一較高下。
▲ 企係 3米高變形金剛前影相，人都細笠啲。
▲ 前面 3個立體雕塑展示咗柯柏文由貨櫃車變型成機械人嘅過程
▲ 後面就係狂派領袖麥加登以機械人型態登場，準備好與柯柏文一較高下。
變形金剛 G1互動遊戲區
除了影相位，仲有 2個互動遊戲可以免費試玩。其中體感遊戲會令係想化身變形金剛G1角色，另外仲可以免費試玩 PS4 Transformers Devastation，投入博派及狂派的激烈對戰。逢星期五、六、日及公眾假期，變形金剛G1經典玩具試玩區，仲會擺放多款 80年代變形金剛G1經典玩具，等小朋友即場試玩，感受變形金剛G1的魅力。
▲ 場景反後係柯柏文嘅基地，係咪好有 cool 呢？
▲ PS4 Transformers Devastation 係鬧市中對戰，刺激好玩。
▲ 只要企係螢光幕前，選擇想變嘅角色，熒幕就會顯示你著上盔甲嘅模樣，同時幫你影相，仲可以用手機掃瞄 QR Code 下載相片添！
▲ 原來 80年代變形金剛 G1 玩具已經好複雜，真係唔可以睇小！
變形金剛粉絲珍藏展
如果上次錯過咗前哨戰嘅展覽，今次一樣可以睇番，展區內展出逾半百件由收藏家 Gary Charm 借出嘅變形金剛G1經典珍藏模型，展櫃特別按照博派基地控制室電腦顯示屏設計，充滿科幻感。此外，展館更有兩款可作三段變身嘅變形金剛，以實體模型逐一定格還原兩部變形金剛的變身過程。
▲ 對 Gary 嚟講 「人年紀大，自然少玩玩具。直到07 年，睇完變形金剛電影，行過玩具店見到 Movie Optimus Prime，又買隻試下。一玩，覺得好神奇，真係可以電影入面咁變形。到今日差唔多十年，我仍然玩到愛不釋手。」
▲ G1 Optimus Prime （1984年美版）
收藏當中， Gary 最愛 G1 Optimus Prime，「變形金剛出身自日本，當時未叫變形金剛。「貨車機械」柯柏文前身係另一系列產品，生產日期約為 1980年，不過未算大熱。直到 1984年，呢批玩具進軍美國，以「變形金剛」為名重新包裝，仲拍咗 3集電視廣告。就係呢 3集廣告，撼動成個美國玩具市場。柯柏文仲未開售已經訂單爆燈。而電視台亦掉轉頭向孩之寶要求繼續開拍卡通。」
▲ 收藏中無論經典 G1系列定最新電影系列都有，大家可以一次過睇晒。
▲ 展館更有兩款可作三段變身嘅變形金剛，以實體模型逐一定格還原兩部變形金剛的變身過程。
變形金剛 Pop-up Store
睇完心思思想買番隻自己玩的話，可以去 Pop-up Store 睇睇。貨櫃車形態柯柏文旁邊嘅 Pop-up Store ，搜羅了變形金剛不同系列之模型及周邊商品，讓各位重拾童年美好回憶。
▲ 係咪心思思好想買呢？
依莉詩點評
呢個展覽如果要例入聖誕佈置其實唔太公平，因為佢只係剛好係聖誕檔期擺，唔算聖誕佈置。而呢個展覽都幾全面，有影相位，有展覽睇，有嘢玩，又有嘢買，變形金剛粉絲一定好鍾意！
聖誕氣氛 ★☆☆☆☆
必影指數 ★★★☆☆
必玩指數 ★★★☆☆
必買指數 ★★★☆☆
相關影片:
《東港城x變形金剛–基地保衛戰》實景裝置
日期：2016年 11月19日至12月27日
地點：東港城一樓展廊
分享到 :
最新影片
