近日日本有隻聲控電腦小遊戲爆紅，港女當然唔執輸下載試玩，於是公司就不時傳來「嗯～～～～唔……啊！！！」的叫聲，嚇親港女啲同事，搞到佢地以為港女傻咗。
隻小遊戲個名叫做《休むな！8分音符ちゃん♪》（直譯：唔好停呀！八分音符仔♪），暫時只限於 Windows 系統的電腦上下載遊玩。遊戲玩法十分簡單，遊戲過程入面係完全唔需要撳任何掣，好似 Gameboy 入面的經典過關遊戲 Super Mario 一樣，你只需要用把聲來控制八分音符仔♪行路同埋跳起避過障礙物就完成一關喇。
呢隻 Game 爆紅嘅原因，同其他聲控遊戲一樣，因為你可以發出任何聲音，講任何說話令八分音符仔♪郁，咁只要你有足夠的表演，例如講粗口，玩 Game 的過程就會變得好搞笑，就好似以下呢位人兄咁…
有人仲將個遊戲過程變成講故事，幾好笑，難怪會爆紅。
不過，聲控遊戲都唔係咩新嘢，仲有好多類似嘅 Game 都幾好玩，例如 Android 入面有個叫《The WUUUUUUUUUUUU》（港女數過，有 12 個 U）嘅聲控遊戲，係要發出「WUU」聲來控制一條橋，將左面行緊嘅人仔，配色順利送過去右面。港女玩幾耐，啲同事就笑足幾耐，不過係好玩嘅。
iPhone 方面，港女就暫時未搵到一個類似嘅小遊戲，如果你有推介都可以話返畀我知，等我又試玩下， 真係幾治癒同減壓，哈哈！不過，港女強烈不建議大家喺公眾地方玩呢啲遊戲，因為雖然好笑，但真係好滋擾。同朋友一齊笑下係 ok，如果喺條街度，又或者搭緊車就唔好玩喇，一陣嚇親其他乘客，搞到有啲咩誤會就唔好啦～
相關影片:
分享到 :
最新影片
