港女喺唔使返工嘅日子，最鍾意就係遠離市區，走入深山避世。上星期，港女有個咖啡師朋友 J 帶隊去行山，我梗係二話不說舉手，一齊去呼吸下新鮮空氣啦！我地當日嘅目的地係馬鞍山昂平，對於港女呢啲咁虧嘅人嚟講，都唔算好難行，起碼唔會行到索晒氣，講嘢嗰陣變咗逗號鄺。

朋友 J 當日就勁喇，揹住一個載住好多「裝備」嘅大背囊，好似話有成 20＋kg，重量就有如去完一趟日本返嚟嘅行李篋，好誇張。但係佢腳步仍然十分輕鬆，行得勁快，仲可以帶頭，港女真係要檢討下自己啲體能。

行到中途，大家喺溪邊休息，有一啲朋友就洗洗手洗洗臉，消下暑。而朋友  J 就去搵個位裝水，話一陣有用。即係佢揹住個 20＋kg 嘅背囊，仲要攞多幾 L 水呀！對唔住，港女幫唔到手（掩面）。

幾經辛苦，終於行到上目的地－－昂平，大家就坐喺度休息一下，食少少嘢，影下相打下卡，畀牛牛s 嚇下，同埋欣賞西貢的風景。呢個時候，朋友 J 就喺背囊度攞咗成副「架生」出嚟，有爐、杯、咖啡粉、咖啡壓濾壺等等，同埋一個測試水硬度的儀器出嚟。

朋友 J 將個水硬度測試器放入去頭先喺溪邊裝嘅水入面量度下，佢大叫一聲：「噢！山水嘅硬度得 19 咁少！」佢話，平時用嚟沖咖啡啲水都有 50 幾度，估唔到上到嚟攞到嘅水礦物含量竟然仲少。唔同嘅水硬度沖出嚟嘅咖啡都有可能唔同，所以佢沖咖啡之前會測試下，睇下用唔同硬度的水沖咖啡會有咩效果。

港女其實本身唔飲得咖啡，但係見到朋友 J 咁犀利，沖完啲咖啡又咁香，就忍唔住試咗少少。喺山上嘆山水咖啡咁 chill 咁高級嘅活動港女都係第一次參與其中，突然有一種享受人生嘅感覺。對於朋友 J 沖咖啡的手勢，港女係無容置疑的，因為佢真係好認真。煲水、浸咖啡粉、壓濾咖啡等等，全部都要計時進行，港女坐喺隔離見證成個過程，不禁心入面感嘆一聲，「係藝術家嘅堅持呀！」

呢次行山嘆咖啡體驗對港女嚟講係一個衝擊，因為擴闊咗我對行山的想像。以往港女只會好辛苦咁攻頂，上到去休息下，食件三文治就落山。今次竟然上到去仲可以咁他調咁沖咖啡嘆咖啡，直接增加港女對操 fit 體能嘅慾望。不過大家記住，去行山自己垃圾要自己帶走，要保持郊野環境清潔呀！