最新的 iPhone 6s 及 6s Plus 在 9 月 25 日，即係下星期五就會正式推出，各網絡商都已經推出了相關月費計劃。我們選擇上台計劃時收費花多眼亂，預繳、機價、回贈等，unwire.hk 讀者們可能只單看每月的月費的話，便可能一不小心中伏。現在就讓 Edward 為 unwire 讀者們分析一下 iPhone 6s / 6s Plus 上台哪個台真正最抵玩。
一表看盡各台 iPhone 6s / 6s Plus 計劃
預繳幾多？幾多通話時間？每月有幾多數據用量？有咩增值服務？一表看盡！（但可能會看到你頭暈）
iPhone 6s <按此>
iPhone 6s Plus <按此>
「淨月費」是初步關鍵位
如果大家選擇上台買機個時單睇月費多少，但無留意每個 plan 有幾多預繳機價多少又有幾多回贈，甚至要局簽幾多錢增值服務，真係有機會中伏。所以要比較真正邊個台上台買機最抵，最簡單就係扣除 iPhone 6s / 6s Plus 本身機價同埋各台回贈，得出的「淨月費」，用呢個去比較先係最公平，因為好多所謂激平的月費都會「見光死」，初步有了大約每月花費後，再考慮其他服務如 Air Time、訊息、增值服務 … 等是否能滿足你所需。
淨月費計法 :
24 個月總和的 [ ( 月費+行政費+VAS) – 回贈 (如有) ] – 官方淨機價 = 扣除官方淨機價後合約期總支出
扣除官方淨機價後合約期總支出 / 24 個月 = 淨月費
淨月費各台比併
今年的 iPhone 月費計劃，基本上所有網絡商均設有低、中、高合共 3 至 4 種用量計劃，低用量有 1GB 及 2.5GB 兩種選擇，而中用量就有 6GB 選擇，大部分台亦設有 10GB 高數據用量月費計劃。以下就讓筆者逐項為大家分析吧。
1GB 月用量可以做啲咩？
- 足夠大家每月上載 110 張相片（以每張 1MB 計算）
- 瀏覽 24 小時的網頁
- 欣賞 6 小時串流音樂
- 3 小時 256kbps 質素影片
- 640 段即時訊息（例如：WhatsApp）。
2.5GB 月用量可以做啲咩？
- 足夠大家每月上載 275 張相片（以每張 1MB 計算）
- 瀏覽 60 小時的網頁
- 欣賞 15 小時串流音樂
- 7.5 小時 256kbps 質素影片
- 1,600 段即時訊息（例如：WhatsApp）。
低用量 1 GB 及 2.5 GB：中國移動香港最抵、3 香港其次
適合用家 :
只玩 Facebook、WhatsApp、LINE 等社交平台及少睇網頁、YouTube 的用家使用。
iPhone 6s 1 GB / 2.5 GB 計劃分析
從此表可見，無論是 1GB 還是 2.5GB 數據月費計劃，或者哪個容量的 iPhone 6s，中國移動香港的每月平均費用也是最為優勝的，所以如果你打算入手 iPhone 6s 又屬於低用量用家，在中國移動香港出機是最佳選擇。其次依抵玩程度，1GB 月費計劃來講，排名第二為 3 香港，而數碼通就只有 16GB 及 64GB 容量係第三抵，128GB 容量就以 csl. 較著數，最貴就理所當然是 1o1o。至於 2.5GB 月費計劃，其次依抵玩程度，排名第二整體依然是 3 香港，第三的就是 csl.，而第四就是數碼通，最貴就仍然係 1o1o。值得留意的是，如果大家購買 64GB iPhone 6s，第二及第三排名會有所變動，csl. 上台出機係比係 3 香港抵的。
iPhone 6s Plus 1GB / 2.5 GB 計劃分析
至於 iPhone 6s Plus，今年中國移動香港終於加番 1GB 月費計劃，所以如果大家想出大機，中國移動香港都係最抵的網絡商。其次的排名，1GB 數據月費的話，依次為 3HK、csl.、數碼通及 1o1o，但要留意的是如果大家想出 16GB iPhone 6s Plus 的話，數碼通係比 csl. 抵的。至於 2.5GB 數據月費計劃，依次為 csl.、數碼通、3 香港及 1o1o，值得留意的是，如果大家想出 16GB iPhone 6s Plus，3 香港會比 csl. 及數碼通抵；而如果想出 128GB iPhone 6s Plus，數碼通就會比 csl. 及 3 香港抵玩。
低用量計劃用家注意事項
如果你選用低用量計劃，筆者建議大家盡量使用 Wi-Fi 預先下載音樂、影片等，又或者係 Wi-Fi 環境下先好下載或更新軟件或遊戲，當欣賞或遊玩時亦盡量避免浪費數據用量（例如：少玩 online 遊戲或者串流聽歌睇片）。如果真的要欣賞串流內容，或者下載軟件、甚至想透過 Remote Desktop 軟件操控遠端電腦，也建議用 Wi-Fi 連線上網時先好咁做，唔係就好容易爆 plan 了。
6GB 月用量可以做啲咩？
- 足夠大家每月上載 660 張相片（以每張 1MB 計算）
- 瀏覽 144 小時的網頁
- 欣賞 36 小時串流音樂
- 18 小時 256kbps 質素影片
- 3,840 段即時訊息（例如：WhatsApp）。
中用量 6GB ：中國移動香港制霸！
適合用家 :
這種計劃十分適合較常使用數據網絡的用家，這類用家不但會頻密地用手機玩 Facebook、WhatsApp、LINE 等社交平台，以及上網睇網頁，甚至會用串流方法欣賞音樂（例如：KKBox、Moov 等）、高清影片（例如：YouTube、煲劇 APPS 等）、或者玩線上手機遊戲。有些用家甚至會間或將手機網絡分享給其他裝置，例如：手提電腦、平板電腦等上網使用。如果你是這類用家，就應該選用中用量計劃了。
iPhone 6s 6GB 計劃分析
從下表可見，在各網絡商的中用量月費計劃中，無論是購買哪個容量的機款，中國移動香港的平均月費仍然係最平的！如果大家每個月數據用量唔算少，但又唔想俾太貴月費，可以考慮從中國移動香港入手 iPhone 6s。如果大家唔 like 中國移動香港，如果係 16GB 容量的話，其次抵玩係數碼通，再其次就 3 香港及 csl. 並排；至於 64GB 容量，其次就係 3 香港同埋 csl.（並排），再其次就係數碼通；而 128GB 容量，其次係 3 香港，第三及第四就分別係 csl. 同埋數碼通。而無論邊個容量，最貴月費的依然係 1o1o。
iPhone 6s Plus 6GB 計劃分析
從下表可見，大機的 6GB 數據月費計劃入面，中國移動香港依然「玩哂」，繼續以 $257.8 / 月淨月費成為最抵玩的上台出機網絡商。之後的次序方面，16GB 來講依次為 csl.、數碼通、3 香港及 1o1o；而 64GB 及 128GB 來講，就依次為 csl.、3 香港、數碼通及 1o1o。總括來說，如果你是中用量用家，在中國移動香港出 iPhone 6s 或 iPhone 6s Plus，都係最抵玩的選擇。
10GB 月用量可以做啲咩？
- 足夠大家每月上載 1,100 張相片（以每張 1MB 計算）
- 瀏覽 240 小時的網頁
- 欣賞 60 小時串流音樂
- 30 小時 256kbps 質素影片
- 6,400 段即時訊息（例如：WhatsApp）。
高用量 10GB ：中國移動香港繼續完勝！
適合用家 :
這種高用量計劃十分適合極頻密使用數據網絡的用家，這類用家不只會做一般人在手機上會做的事，串流方法欣賞高清多媒體內容也是等閒事，甚至會一部手機透過 Tethering 方法分享 4G 網絡給多部裝置同時上網。更有甚者在家中也會用手機分享網絡給電腦上網（例如：住村屋的用家，用手機網絡上網隨時比用 8MB 固網寬頻快得多！！）。如果你是這種用家，高用量計劃就十分適合你使用了。
iPhone 6s 10 GB 分析 :
從下表可見，今年除了數碼通沒有提供外，其餘各網絡商均有提供 10GB 數據月費計劃俾大家揀。而最抵玩方面依然係中國移動香港，每月只需要俾 $332.8 淨月費就可以用得到。其次來講，csl. 及 3 香港都係相同，同時排係第二，而 1o1o 依舊係最貴的選擇。
iPhone 6s Plus 10 GB 分析 :
從下表可見，中國移動香港的 iPhone 6s Plus 上台出機月費計劃仍然是 4 間網絡商之中最抵玩的！其餘依次分別是：csl.、3 香港及 1o1o。所以如果你是高用量用家，無論想出 iPhone 6s 還是 iPhone 6s Plus，中國移動香港都係最抵玩的選擇。
總結 ：16GB 入場平但月費相對貴
整體來說，如果單考慮價錢的話以上圖表已經告訴你答案，一般來說 16GB iPhone 6s / 6s Plus 雖然月費較便宜，但其實在平均淨月費一般情況都比 64GB 及 128GB貴，就連機價都要俾唔少（尤其是平 plan）。加上今年 iPhone 6s / 6s Plus 加入了 4K 拍片，除非你真的覺得 16GB 非常夠用（唔拍 4K 片或唔會放好多歌 / 片），否則考慮 64GB / 128GB 比較划算。
至於想「劏機」的用家，不妨考慮中國移動香港的 1GB 月費計劃，無論係 iPhone 6s 定係 iPhone 6s Plus，又或者係邊個容量版本，都係每月 $147.8。當然，1GB 用量在今時今日，除非大家真係當部手機係 Feature Phone 咁用，又或者只係玩下 WhatsApp、LINE、或者間中先上上 Facebook，就算拍 4K 片都唔會即刻 upload 上網，否則是一定不夠用的。如果「劏機」後賺了錢，小編建議用家最好本身已有較大用量的主 SIM，而這張「劏 SIM」，就留作主計劃月數據用量用光時，才用來作後備上網吧。
總結 2 ：按自己需要選擇網絡商
上台出機，除非你的目的是「劏機」，否則還是要看自己的需要，決定選擇哪個網絡商比較好。那麼怎樣去決定自己需要在哪呢？其實看看每間網絡商提供的獨特服務，大家就可知道一二了，以下就讓小編簡單說說吧：
1010：最貴但可儲 Club 積分換 Asia Miles
1010 可說是月費最貴的網絡商，但一直以來也提供著尊貴服務，而且在 1010 上台出機，還可以賺取 The Club 積分，之後可以用來換取 Asia Miles 亞洲萬里通里數，對於想俾台費之餘又可以儲飛行里數的用家來說，是獨一無二的選擇。不過建議想使用 1010 計劃的 unwire.hk 讀者，最好不要選 16GB iPhone 6s / 6s Plus ，因為平均月費相對地貴很多。
3 香港：最多增值服務揀
舊年推出 iPhone 6 / 6 Plus 個時，3 香港曾經係「劏機」救星，因為只有佢地推出 500MB 數據月費計劃。但今年推出 iPhone 6s / 6s Plus，3 香港都同其他網絡商睇齊，以 1GB 數據月費計劃起跳，所以「劏機」救星稱譽就唔再屬於佢地了。不過 3 香港都有值得上台的地方，就係佢地係咁多個網絡商之中，提供最多增值服務俾大家揀的一間，當中唔少都幾實用，例如：想串流聽歌的有 KKBOX，想隨時隨地唱 K 有 Olegok、想睇電子書有 24 Reader、看雜誌等，就算想買 APP 但無信用卡，都有 iTunes 代碼服務，令大家可以係每月賬單入面扣數，兌換指定金額去買 APP、歌、片等。所以如果大家用得著呢啲服務，3 香港係一個唔錯的選擇。
csl.：隨時睇英超 + 外地打電話回港超方便
csl. 月費雖然唔係最平，但勝在提供的免費服務夠吸引，雖然係增值服務上，唔夠 3 香港咁多，但簽月費後，唔止大家可以用「King 傾」，係外國個時只要身處 Wi-Fi 網絡環境，就可以免費致電回港，慳番唔少 IDD 長途電話費；而且 $408 月費或以上仲送條 nowTV mobile 621 台，俾大家隨時隨地都可以睇英超比賽，最啱各位球迷選用。另外，他們仲有 Moov 音樂串流服務，仲提供無損格式音樂串流俾大家欣賞，而且係香港的免費 Wi-Fi 熱點係最多的，就連便利店、甚至電話亭都用得，可以減低低用量用家爆 plan 的機會。不過要留意的是，前文提及的英超 621 頻道，據讀者回報是要用數據網絡睇的，對於 6GB 以下數據月費計劃的用家，因住睇一陣就爆 plan 呀！（我們正向 csl. 方面查證中，一有消息會通知大家。）
SmarTone：可 0 息分期免預繳
至於 SmarTone，特別之處是如果使用指定信用卡上台及安排自動轉帳，就可以享有免預繳及 0 息分期計劃（當然會先從信用卡中扣除本身要預繳的信用額），不用一次過用現金或碌卡俾預繳，cash 運用上更為彈性。而且針對舊客戶，如果合約期少於 10 個月，可以選擇「加監」買機；又或者可選用「贖舊約」形式，以一筆過款項結束舊合約再簽訂新合約，算是較特別的服務。
中國移動香港：中港兩地跑用戶至愛
至於中國移動香港，唔止個個 plan 的平均「淨月費」都比其他網絡商平，而且十分適合需要經常中港兩地跑的用家使用，因為它的數據，無論是哪個月費計劃，也全部或部分可以中港共用。而且即日起到下年 1 月 10 日，到大陸用 4G，只需開啟手機漫遊功能就可以了，毋須另外申請通行證，這樣到中國旅遊或公幹時，只要該城市有 4G LTE 網絡覆蓋，就可以與在香港一樣快速上網了，十分方便呢！
如果大家想瀏覽比較表的詳細資料，可以點按以下連結參閱：
[UNWIRE.HK] iPhone 6s 香港各網絡商月費計劃比較
https://docs.google.com/spreadsheet/pub?key=0AqXtr84sWgVgdHBYSms5THJqXzMzdFdWOS14MFhoaUE&output=html
[UNWIRE.HK] iPhone 6s Plus 香港各網絡商月費計劃比較
分享到 :
最新影片
