ASK o既真義，即係個個問都唔同價，對呢部二手Ricoh GXR 有興趣o既話，就親身去 ASK o下幾錢啦！
尋晚 CCTVB 回帶《無間道 III》，傻強問陳永仁知唔知咩係奶o野？除o左劇本話條骨女唔正係奶o野外，買o左件 Gadget 番屋企先覺唔o岩玩，都一樣好奶o野！今日行先達兩大二手舖之一的紅色招牌舖，就見到有個活生生的奶o野案例啦! 有部聲稱係 99.9% New o既 Ricoh GXR 同 GR Lens A12 50mm F2.5 Macro 套裝擺o係貨架，隔離仲有張單，寫住購買日期係 2 月 14 日，即係玩o左一個月多 D 就放。
老老實實，呢部上年 12 月出o既 GXR，佢連鏡連 CCD 更換o既設計咁「新穎」，我一早想搵 D 買o左機o既人八o下部機掂唔掂，點知唔好話落場搵，就連上網睇都唔多見有人買o左。今次o係二手舖見到部機，真係我第一次發現有真實成交個案，仲要價錢牌上面只係寫o左個「ASK」，見咁鬼神祕，我就入舖 ASK o下部機咩料。原來部機係 Sales 哥哥自己放o既，唔怪得唔似其他二手機咁，直接標個價出o黎啦，睇怕係想引人去問o左先，再睇條友有幾鍾意部機先開價，咁樣較易賣得出，又較易賣到好價。
Sales 哥哥買機o個日係年初一加情人節，係咪衰衝動，或者有女送，或者想送俾女但打回頭，我唔好意思問，佢自己就話本身都只係諗住買o黎玩下，玩完即放，留到呢幾日先擺出舖賣，算耐o架喇。雖然佢買機時官方已經減o左一次價，但機連鏡成套仍要 $9,900，佢同我吹o左兩咀，就話如果我要就 $7,200 賣俾我。我唔知呢個價o係佢心目中係高定低，但我見部機的確好新淨，都算係個合理價錢，前提係你要對部機有興趣囉，Sorry，我就冇喇。
我臨走前，Sales 哥哥仍猛讚部 GXR 影相靚，相信佢或者貪新鮮、唔玩過部機唔安落o既朋友，不妨去呢間二手舖行o下，先達一樓。真係想買o既話，最終成交價係幾多，就睇你o既講價功力喇！
註:
分享到 :
最新影片
