想成為真正「土豪」單靠一部 iPhone 6 點得，要知很多名牌其實都推出手機，正如 Tonino Lamborghini (林寶堅尼）向來都有推出跑車設計手機，最近它們最新的 88 Tauri 來到香港，售價等同 8 部旗艦手機，究竟佢有咩特別才有這個身價呢？(以下有更多資料。)
包裝豪華精美
88 Tauri 賣得 US$6300 設計當然唔會求其，淨係睇個包裝就已經知有幾豪華，除了外面紙盒，佢入面仲有一個仿如「林寶堅尼」車頭膠盒，打開就好似手飾箱，面層擺放手機，下層放置了火牛、耳機及充電線，基本上個盒本身都可當成擺設。其次，所有配件都會用了銀色或加上「林寶堅尼」，拿住來充電都貴氣過人。
▲ 跟來配件有火牛、耳機及保用證。
皮革金屬貴氣盡顯 單手難用
88 Tauri 一睇個樣就知佢貴氣，機身由皮革及金屬所製，小編 手上的更是金色特別版，配啡色皮革感覺成個高級手袋咁。它體積比想像大部，驟眼睇完全唔似一部 5 吋屏幕手機，佢冇得拆開背蓋（皮革機背），但機身兩側金屬邊框都內藏卡槽，左邊是 USB 3.0 及 MicroSD；右邊則是 2 張 SIM 卡，而值得留意是它們均屬金屬關節，打開似開車門咁，非常特別。手感方面，上文都講過佢大部，雖然佢兩側都有微微弧度，但致命傷是太厚，小編 都只係勉強單手操作，而且部機都唔輕！
▲ 金色金屬邊及啡色皮革的組合非常高貴！
▲ 同另一部 5.5 吋屏幕手機相比， 88 Tauri 顯得非常大部。
▲ 兩側金屬框內藏所有接口，值得留意係 Micr0 USB 屬 USB 3.0 標準。
▲ 每一部機身都有自己的生產編號。
高級配置 軟件欠驚喜
「林寶堅尼」出開跑車，出手機當然都唔會「龜速」喇！88 Tauri 搭載 Qualcomm Snapdragon 801 處理器、 3GB RAM 及 64GB 特大儲存空間，配置唔算最新，但性能都是去年旗艦機水平，可是前後鏡頭有 2,000 萬像素及 800 萬像素，這點勝過唔少大廠機。不過，比較失望的應該是軟件部分，因為機內預載 Android 4.4，但介面竟然跟 Google 原裝差唔多，有特色只有 Wallpaper、DJ 鈴聲及自訂 Icon，連相機介面都只是 Google Camera。
▲ 搭載 Qualcomm Snapdragon 801 處理器、3GB RAM 及 64GB 儲存空間。
▲ 預載 Android 4.4，而介面跟原裝 Google 差唔多。
▲ 內建一系列 DJ Ravin 的鈴聲。
▲ 雖然主鏡頭有 2,000 萬像素，但相片雜訊有點明顯。
小編 ：外形殺食 凡夫俗子唔會考慮
88 Tauri 都算係有外形有規格的手機，雖然考慮得在乎的可能只係面子，但售價 US$6,300 約 HK$48,900 實在非凡夫俗子花費得起，但如果此機軟件上再花點心思，相信對會考慮的人應該會更吸引。
售價：US$6,000 (普通版) 、US$6,300 (金色)
查詢：lamborghinimobile.com
