「返屋企唔開電腦」已成為好多人習慣，雖然打機上網都可靠手機，但有時冇電腦始終唔得，唔想花錢買台 Desktop 「阻埞」，其實坊間都有一些 Mini PC，價錢唔貴、慳位又包 Windows，正如 ECS 較早前推出 Liva X，賣點是配置比同類產品更強，唔知用落感覺會係點呢？（以下有更多資料。）
電腦幾大部先叫唔「阻埞」？我想大家都會舉例 Mac Mini，可是這次介紹的 LIVA X 體積只有半部 Mac Mini，雖然機身比較厚，但佢最利害係支援 VESA Mount 設計，可把整部 Mini PC 收起到電視或顯示器背面，變相可以佔用最少空間。
▲ 支持 VESA Mount 設計，可把 Mini PC 安裝到電視或顯示器背面。
其實 LIVA X 已經係 ECS 第二款 Mini PC，規格跟之前 LIVA 分別係升級用 Celeron N2808 處理器，性能比 Atom 強，而儲存空間亦增至 64GB，配置相對較貼近入門 Notebook。擴充方面，機上提供 HDMI 及 VGA 輸出，機前有 1 組 USB 3.0 及 2 組 USB 2.0；而背面還有 LAN 及 3.5mm 接口。不過由於處理器升級關係，LIVA X 不能像之前可用 USB 供電，因此這次會跟來專用火牛。
▲ 內置有 64GB 儲存空間。
▲ 除了 LAN 外，機內還有 n 制式 WiFi 及藍牙功能。
▲ 機前後分別提供 USB 及顯示輸出接口。
▲ 須使用 12V / 3A 火牛來運作。
以前唔鍾意買 Barebone 電腦，原因除了要自家加 RAM 同硬碟，最麻煩係主機本身不包作業系統。相反 LIVA X 最討人歡心係預載 Windows 8.1 with Bing，雖然系統屬輕量版，但仍可照常安裝及運行軟件及遊戲。
▲ 預載 Windows 8.1 with Bing 作業系統。
用 Mini PC 好多人都擔心會唔會好慢，但如果你接觸過 Windows Tablet 就會知其實唔太差，正如受惠於 eMMC 儲存裝置，開機只須十數秒便登入 Windows，而且機能亦足夠播放 4K 影片，用作家庭播放器都能勝任，但唯一須留意係 Youtube 這類串流播放會比較弱，小編試過播 1080p 都會「少窒」，要 720p 才順暢。
▲ 內建 GPU 具硬解功能，播放 4K 影片都很順暢。
▲ 在 Youtube 試播 1080p 短片，處理器會長期負載，因此播放時會有「少窒」。
售價：$1,830
查詢：Everbest (2541 2982)
