—（文章不含劇透，請入場自行觀看XD）—
我不懂寫影評，也不是想告訴大家 Benedict Cumberbatch 有多有型（小粉絲心心眼mode），英國口音有多好聽，只是看過這部電影後，想起當我們現在理所當然地享受網絡帶來的方便時，可能未曾退一萬步諗過「電腦」的起源原來是如此的苦澀。
我都算係經歷過沒有電腦的年代，想當年讀小學的時候，每人每年學期尾都要單打獨鬥做一份常識project，印象中有做過「環保的重要性」、「電力的產生」，「植物的生長」之類的題目（好鬼科學），份量係一本填滿的畫簿。一個小學生，除左教科書，何來 resources 自行學習呢啲咁抽象的知識，除左去圖書館借書，就係去政府各個公眾資訊中心攞單張。細細個就已經好認真做功課，當時為了份 project，同阿媽走遍港九新界，成日去科學館呀，博物館個啲參觀。上網搵料？電腦都冇點上網？影相？冇架，邊有咁方便，所有資料都係用。手。抄。係個度抄完一次，返到屋企仲要排版，重抄，仲要懶靚咁畫埋插圖（係好多插圖），仲要根據每份功課的特別要求：例如畫一張宣傳海報，作句呼籲口號，寫封建議書等等，埋尾。成本野都係手作，好原始好 raw。BTW，個幾本 project 仲係度，睇完覺得自己個時好叻叻豬。
而家做 project 點會咁做，首先用手寫勁唔 pro 囉，上維基一㩒啲資料就出晒黎啦，source 都 quote 埋俾你；唔明仲可以上 Youtube 睇片，唔識字都明；Present 連 powerpoint 都唔用啦，一係用 keynote 一係用網上 slideshow template；內容唔整返三幾個 infographics，design 幾個 keyart，邊夠型邊夠說服力呀？
時移世易，我地對世界的要求隨住知識膨脹及科技發展而改變，但試諗下，如果唔係有電腦之父－ Alan Turing，我地邊有機會享受？
「一個被抹去的歷史人物，一個不被明白的天才，一生背負國家的機密，個人的秘密，被岐視、被欺負、被離棄、被自殺」
這是電影宣傳資料上對於 Alan Turing 的介紹。特立獨行是痛苦的，尤其處於思想不開放的社會，他們總不能逃離世俗的眼光。但電影安排了一個知己給 Alan Turing，在 Turing 最潦倒的時候，她說：
“Now, if you wish you could have been normal… I can promise you I do not. The world is an infinitely better place precisely because you weren’t.”
知己說的這句話沒有時效性，對於網絡主宰一切的21世紀仍然適用。
「世界很美，只因有你」
電影除左俾大家了解 Alan Turing 的成就，裡面仲有問過一條問題，可能大家冇乜留意：Can Machines Think?，亦係 Alan Turing 1950 年的 Paper 入面佢反覆研究及論證的問題。睇的時候，我冇諗咁多，但當踏出戲院，我望一望手上的 Smartphone，結合電腦、手提電話、網絡…一部咁細的「machine」有無限咁多可能性，我再問一次自己「Can Machines Think?」 ，我唔係哲學家，可能會有思考謬誤，但當下我會答你 「Yes」。
係 Big Data 即將當道的年代，你的一舉一動幾乎可以透過計算及數據分析被預測，你的行為模式將被機器掌握，而且 for your information，我唔理佢會唔會爆炸啦，現時世界上最快的超級電腦，是由中國人民解放軍國防科學技術大學等單位研製的天河二號，好近我地。嗯，簡單黎講，你手上的機器將會估到你想點，再 feed 你。咁你話嘞，Can Machines Think?
我不禁打了一個冷震，突然間，我有少少懷念同阿媽通街跑，搵資料做 project 的日子。Alan Turing 應該冇諗過會後世會有咁多人將佢的研究發揚光大，令而家人人手中都有部「機械腦」。
