數碼港女週記:拍片一定係去數碼港

讚好此文:

六月 4, 2015 •數碼港女週記, 獨立評論

平日我其實唔係好睇電視,主要都係上網睇韓劇同綜藝節目,但聽講早兩日 HKTV 有新劇出,屋企人想捧下場,於是就開著左部電視,睇左 5 分鐘到,我見到個好熟悉的場景…

grace-03061
▲呢一幕係講啲大學生返學,有 dd 台劇 feel

我一路睇呢個畫面一路笑到 GAPGAP 聲,原因有兩個,第一,呢度咪就係我熟悉的數碼港?!影得咁靚嘅?!第二,點解畫面中的「學生」會向呢個方向行嘅?!明明一直去只係得草地,同埋海… 哈哈哈!

冇嘅~正常香港人唔會睇得出嘅,因為邊有咁多人認得出數碼港呢個咁偏遠的地方丫,最多咪去過一兩次,一定係我太吹毛求疵,一定係。

其實數碼港一直係好多電視電影廣告短片的熱門取景場地,應該係貪佢夠僻,冇乜人,而且啲建築又有少少 cyber 同埋現代的感覺,數碼港仲係甲級寫字樓,除此之外,要草地有草地,要海有海,一應俱全,拍條係森林坐太空船上太空再返黎地球跑數的短片都綽綽有餘,但如果得$500-700 真係交通費都虧晒。

除左啱啱開播嘅港視劇集之外,眼利嘅我其實都幾成日發現到數碼港的縱影,無論係我坐定定係度睇電視,入場睇電影,有時睇雜誌,都會發現到。有時唔使影到棟野架,好似一個香口膠廣告咁,淨係影到個地板,我都知係數碼港啦,哈哈哈~

grace-03062
▲香口膠廣告:就憑呢幾塊地板,我就認得啦!

grace-03063
▲藥品廣告:呢條路都行過無數咁多次,右邊就係 Video Conference Room,一睇就知 😉

之前同其他係數碼港工作的朋友傾計,佢地話年中都真係有唔少人去數碼港拍野,成日都會見到「明星」。拍野我都見過幾次,次次都好大陣象,明星我就冇乜見過,反而因為有網絡電台,我就見過唔少政客同埋評論員,個啲算唔算「明星」?哈哈~

唔知大家睇唔睇港產片呢?港產片相對外國大片比較少係市中心取景,唔知係咪想同觀眾建立疏離感,加強故事性,可能純粹係人多麻煩 XD,下面兩套係10年前同2年前的電影,其實個景冇乜點變,不過原來畫面顏色真係會好影響個氣氛,大事件將數碼港拍到好唔同。

grace-03064
▲大事件(2004):唔好以為較到個畫面咁藍,棟個「昌華街」路牌出黎,我就認唔到!(圖中係陳慧琳同任賢齊)

030604
▲在一起(2013):有唔少 scene 都係數碼港取景,最好笑係妍熙 BB 係離家出走,門口寫住數碼港 3 座

我記得年頭個排好似又有隊 crew 黎拍野,成個3座大堂俾佢地霸晒,唔知邊套新戲又用數碼港取景呢?

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , , ,

讚好此文:


Comments are closed.

unwire TV



更多同類文章:

最新文章