小米年初發表旗艦機「小米 Note」及「小米 Note 頂配版」，但可惜「頂配版」當時現場冇得試，事隔半年最近終於有「頂配版」水貨登陸香港，如果你都想知「小米 Note」的 2K 屏幕及升級 Snapdragon S810 後熱量如何就要留意。
2K 屏幕偏青
其實「小米 Note 頂配版」跟「小米 Note」分別只在於規格，其中一個焦點就係「頂配版」升級了 2K (2,560 x 1,440） 屏幕，雖然官方聲稱有 NTSC 95% 色域及 1,400:1 對比度，但小編 所見屏幕驟眼睇已感到偏色問題，但佢唔似 G4、Z3+ 咁單純偏藍，跟 iPhone 6 拍埋就發現係偏藍帶青，特別在瀏覽網頁（白底）時特別明顯。屏幕本身都夠光（平時用開 50% 光度），可視角度跟其他 2K 屏幕差唔多，打側睇畫面亮度會下降。其次，細心睇屏幕內都會見到橫狀網紋，這點跟 G4 有點接近。
▲「小米 Note 頂配版」（右）跟 iPhone 6 Plus （左）相比感覺會偏藍偏青色。
▲ 追加偏藍的 Find 7（左）在相機下就打突出了「小米 Note 頂配版」偏藍偏青。
▲ 打側睇依然係非 AMOLED 屏幕的弱點。
▲ 在白色畫面會隱匿見到橫狀網紋。
▲ 頂配版其他改動仲有電池微加至 3,090 mAh，而邊框亦會改用金色。
機頂微熱 唔會過熱「彈 App」
「頂配版」另一個改動係升級 Qualcomm Snapdragon 810 處理器及 4GB RAM（LPDDR4），性能理論上會因為 LPDDR4 而比其他 Snapdragon 810 機種更快，但實際 Antutu 成績都係 50,000 – 56,000 分，成績除了 S6 Edge（Exynos 7420）外都算最強。至於大家都關注的發熱問題，我就嘗試在執行 Real Racing 3 時用「測溫槍」量度機身溫度，閒置時溫度大約為 28.2 / 28.8 度（邊框/機背），開 Game 約 10 分鐘後就會升至 37.4 / 39.4 度（邊框/機背），用手接觸會覺得微熱，但熱力主要集中在上半部分，實際邊框下方即手握住位置其實只有 31.8 度，若非雙手橫置操作情況都尚可接受，而值得讚的是發熱部分其實去到 40 度就唔再升，開 Game 期間亦冇彈出過熱要強制關 App 的情況。
▲ 搭載 Qualcomm Snapdragon 810 處理器及 4GB RAM，於 Antutu 錄得約 50,000 – 56,000 分。另外，內建儲存空間亦有 64GB（可用 52GB）之多。（冇 Google Play 應用程式）
▲ 負載前後機身溫度大約 6-10 度增長，發熱位置集中在頂部。
▲ 機身下半部位置跟上半部有頗大差距，因此發熱時手握亦只是暖。
小編 ：規格王 發熱成隱憂
老實說「小米 Note 頂配版」規格上係值得期待，但試用過後小編 反而覺得「小米 Note」（普通版）可能更穩陣。主要原因係 2K 屏幕表現麻麻，其次唔洗為 Snapdragon 810 過熱膽驚受怕（Qualcomm 問題），但佢值得讚係佢散熱設計真係做得唔錯，最起碼唔會警告過熱要彈 App。追求性能 「頂配版」係不二之選，但貴一節值唔值就見仁見智。
售價：$4,250
查詢：米舖（6997 0808）
分享到 :
最新影片
