之前同大家分享過 Samsung Galaxy Note 5 的手感同埋設計，今次第二篇，就同大家分享一下試用了 Note 5 兩日後，對於全新的 S Pen 設計及功能的用後感啦。
設計全改更易拿出
今次的 S Pen 同之前幾代的設計有所唔同。以前的 S Pen，只係「攝」係機底的小洞內，要取出時就要用手指甲勾出來，但對於手指甲較短的男士來講，就會比較難拿；而手指甲較長的女士，萬一拿筆個時唔小心，亦有可能會整爆甲。就係因為體驗上不好，所以有些用家就算 S Pen 功能上好用，但都少用。今次係 Note 5，因為採用了一體化機身設計，所以 S Pen 就改為一按彈出的設計，呢種做法反而令用家無論有冇手指甲都可以好易取出 S Pen，容易咗拿，咁大家多啲用佢嘅動力就更大吧？
▲只要襟一下，S Pen 就會凸出筆頭。
▲之後就可以夾出 S Pen 了。
手感好似原子筆
另外，新設計的 S Pen 亦變為兩截式設計：S Pen 筆身以及頂部彈簧式的按鍵，尤其係彈簧式的按鍵，其實主要是為一按彈出的新設計 S Pen 而設，不過平時拿係手度，襟下襟下就好似用住支原子筆咁，有時真係幾好玩。
▲同以前嘅 S Pen（上）比較，Note 5 嘅 S Pen（下）採用兩截式設計，明顯有所不同。
▲有時襟下襟下都幾過癮！
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
書寫更唔易斷線
S Pen 係書寫功能上亦作出咗強化，新設計唔止加強咗壓感感應，書寫時亦可以寫出好完整嘅線條，大家唔洗擔心會因為接觸不良而出現線條斷開嘅情況。
▲同以前 S Pen（左）比較，Note 5 嘅 S Pen（右）係書寫效果上更佳。
▲從呢張效果圖大家就見到基本上極少出現斷線情況。
熄芒記事超好用
作為記者，成日都有好多資料要記低，S Pen 一直用落都令用家好似係本實體筆記簿咁記事，手感真係好唔錯。不過係之前的 Note 系列上要記事時，要先解鎖然後再開 S Note APP 然後先記到事，真係好麻煩。今次係 Note 5 上就加入了熄芒記事功能，只要係熒幕關閉的情況下取出 S Pen，就可以係熒幕上面進行記事，完成後將 S Pen 插回機身，就可以儲存該備忘錄，超級方便！不過如果要使用呢項功能，記住要係設定入面嘅 S Pen 設定中，開啟「熒幕關閉備忘錄」選項先至可以做到。
▲係熒幕關閉的情況下取出 S Pen。
▲然後就已經可以書寫資料。
▲將 S Pen 插回機身，備忘錄就會自動儲存到 S Note 內。
▲不過如果要用呢項功能，記住要開啟「熒幕關閉備忘錄」選項。
捲動擷取方便記資料
今次係 Note 5，Samsung 確實係強化了唔少 S Pen 的功能，另一項 Edward 好 like 的新功能，就係捲動擷取。以前要擷取有用嘅網頁或者文件，要分做好多張圖咁 capture，如果要同朋友分享，就要 send 一大堆圖，有時又唔知次序，真係分享來都無意思。今次 Note 5 加入嘅捲動擷取功能，就可以俾大家將一個長長嘅網頁或者文件擷取為一張完整的圖片，最多可以擷取 22 頁，真係文件幾長都夠！另外擷取之後，唔止放大之後都可以清楚睇到細字，亦可以即時 mark 低有咩重要資料要朋友留意，之後就可以即時分享，又或者儲存到剪貼簿或儲存至相簿留待日後使用。有咗佢，第日要 save 低網料真係方便好多。
▲當要擷取長文件或網頁時，取出 S Pen 並選擇「擷圖編寫」。
▲然後當出現第一張擷圖時，點選左下角的「捲動擷取」。
▲之後就會自動擷取第二頁，如果想繼續擷取落去，就點按「擷取更多」；如果完成擷圖，就可點選「完成」。
▲此時如果想 mark 低重點，可以點選唔同筆畫係圖上。完成後點按「分享」可即時透過電郵、WhatsApp 等程式與朋友分享；如果想留待日後使用，就可以點選「儲存至媒體瀏覽器」。
▲大家可以睇到長長的網頁變成一張完整的擷圖（按圖可放大睇原圖），而放大後亦可以清晰睇到細字。
懸浮指令指針隨意擺
其實自從 Note 3 開始，Samsung 就加入咗 Air Command 懸浮指令功能，只要取出 S Pen，就會彈出 S Pen 目錄，方便大家取用當中功能。不過呢個目錄永遠只會出現係同一位置，有時可能會阻住用 APP。去到 Note 5，當取出 S Pen 時，就會彈出懸浮指令目錄，當關閉該目錄時，它就會收藏係一個圓形「指針」內，而且該指針更可以隨意移動到熒幕邊任何一個位置，咁就唔驚佢會再阻住大家用背景的 APP 啦。
▲取出 S Pen 後，會自動彈出懸浮指令目錄。
▲如果暫時唔想使用入面嘅功能，點擊畫面任何空白地方，該目錄就會收藏係「指針」內。
▲此時可以拉動該「指針」去畫面邊緣任一位置。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
懸浮指令開 APP 更方便
講起懸浮指令，Samsung 亦進一步將 Note 5 的懸浮指令介面簡約化，項目少咗，但功能其實無少到，只係歸納為「Action Memo」、「智能選擇」及「擷圖編寫」3 個主要功能。另外，Note Edge 時大家可以將常用 APPS 的捷徑放到側熒幕，方便日後隨時啟動；而係 Note 5 上，Samsung 就將呢個功能簡單化並放入懸浮指令中，大家可以最多放入 3 個常用 APPS，以後只要取出 S Pen，再點擊相關 APP 圖示就可以啟動程式，比放係桌面更省位置同方便。
▲要加入程式 shortcut，只要係懸浮指令點按「+」號。
▲然後加入希望快速啟動的程式圖示，最多可加入 3 個程式。
▲以後取出 S Pen 時，就可以快速啟動呢 3 個程式了。
總結：S Pen 變得更好用
整體來講，Note 5 嘅 S Pen 唔止係設計上改變咗，係實用性同埋操控上都有好大嘅改進，尤其是唔少 S Pen 新功能都好實用，對於作為要經常記事，從事記者嘅 Edward 來講，真係好啱用。好了，討論咗 Note 5 的設計、手感同埋 S Pen 各項功能，Note 5 係熒幕同埋鏡頭上都有所改進。但究竟出來效果係點？就留待筆者下文再同大家分享啦。
唔計冇得插卡同換電，Note 5啲新功能都幾好用丫！小編：老細，可唔可以全個unwire編採部一人送一部？
Posted by UNWIRE.HK on Friday, 14 August 2015
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
分享到 :
最新影片
