講起 iPhone，可能有啲朋友會覺得太貴買唔起，尤其是仍未有賺錢能力的學生哥，父母們如果買 iPhone 俾佢地番學或平時用，始終驚仔女整爛或者唔見咗好肉痛，所以一般都會揀買部 iPod Touch 俾佢地算數。今年 Apple 推出第 6 代 iPod Touch，究竟用落係點？同上代比值唔值得升級？就等 Edward 同大家簡單報告一下。
機身一樣無得再縛手帶
外形上，其實今代 iPod Touch 同上代比較真係無乜分別，無論係熒幕尺寸、按鍵及鏡頭位置等等都係一模一樣，唯一唔同就係上代 5 代 iPod Touch 的機背左下角設有手帶位，俾大家縛條手帶上部機度，方便用個時無咁易跌落地整爛；但今代就取消咗呢個設計，可能 Apple 見到都無乜人用手帶所以取消啦，但筆者覺得咁樣搞到部機少咗樣特色，係有少少可惜嘅。
▲左邊係 5 代 iPod Touch，左下角有個銀圈俾大家襟出來穿上手帶；但右方的 6 代 iPod Touch 就取消咗呢個設計。
▲其餘機身設計上，6 代 iPod Touch 同上代真係無分別。
▲不過細心睇，都會見到 6 代 iPod Touch（右）的機背文字，係磨砂金屬機背上面會比 5 代 iPod Touch（左）更出更清楚。
▲睇番機背下方的黑字就更明顯了！
加新色睇落似微縮版 iPhone 6
雖然係外表設計上同上代分別極微，但如果大家要話俾人知用緊新機，除咗睇個手帶位之外，仲可以用機身顏色去辨認，因為新一代 iPod Touch 用上了 iPhone 6 的機身顏色：太空灰、銀色及金色，離遠睇感覺就好似部微縮版 iPhone 6，如果大家想話俾人知用緊新機，就記住考慮呢 3 款顏色啦。當然部分上代有嘅彩色顏色機殼仍然保留：仲有藍色、粉紅色同埋 PRODUCT RED 紅色慈善版，尤其是粉紅色版，相信女士們應該會感到「零抗拒力」。
iPhone 6 級數規格
外在分別唔大，內在就有所升級啦。首先處理器方面就採用了最新的 Apple A8 + M8 處理器，記憶體方面則是 1GB RAM，亦即係同 iPhone 6 / 6 Plus 同級，理論上可以提供 iPhone 6 級數的表現。而筆者試用過幾日，都覺得整體好流暢，基本上開 APP 關 APP 翻動頁面或者打機，都無窒嘅情況出現。
▲規格方面，採用 Apple A8 雙核心處理器加上 1GB RAM，規格上同 iPhone 6 相同。
▲平時操控上都好流暢，就算背景開住好多 APP 都唔見會窒。
▲打機就算玩對圖像處理要求較高的遊戲，例如：Real Racing 3 都無問題。
熒幕仍 4 吋 Retina 維持單手操控
當然，如果樣樣都同 iPhone 6 一樣，iPhone 仲洗賣嘅？所以 iPod Touch 六代仍然維持番同上代一樣，都係只有 4 吋熒幕，解像度亦仍然係 Retina 1136 x 640，所以係熒幕顯示上同上代基本上唔見有咩分別。好處當然係繼續可以用單手操控，但係今時今日人人手上都拿住部起碼都有 5 吋 up 的大芒手機年代，4 吋的 iPod Touch 就俾人一種「玩具」感囉。
▲熒幕繼續維持 4 吋，解像度都同上代一樣，都係只有 1136 x 640，感覺太細啦（尤其是對於好似筆者呢種手大嘅用家來講）。
▲不過係熒幕顯示上就係靚色又準確嘅，呢個一向都係 Apple 嘅長處來。
▲一於用 Spyder 5 測試一下六代同五代 iPod Touch 個熒幕色準。
▲用 Spyder 5 測試，得出白位參數為 6842K，同真正白色的 6500K 相當接近。另外較到最光的情況下，iPod Touch 6 代熒幕有成 523.43 cd/m2，真係超光！
▲不過相同設定下，用 Spyder 5 測試 iPod Touch 5 代的白位參數，就得到 6544K，超接近真正白色，可見六代 iPod Touch 都有輕微偏藍情況，但應該肉眼上睇唔出，唔算影響使用體驗。至於亮度方面，可見 iPod Touch 5 代較到最光都係得 498.97cd/m2，6 代明顯光好多。
▲較到亮度得番一半表現又點？從 Spyder 5 的白色參數可見，數值去到 6790K，比最光時更接近真正白色！而亮度都有 145.92cd/m2，對於一般人來講，係正常室內環境下，夠用了。
▲筆者將 iPod Touch 5 代同樣亮度調至一半左右再以 Spyder 5 測試，白色參數都有 6426K，可見色準來講，iPod Touch 確實係「新不如舊」（至少係數值上去睇……）。
鏡頭終於升像素
至於鏡頭方面，今代 iPod Touch 終於有所提升：由上代的 500 萬像素，提升到有 iPhone 6 級數的 800 萬像素鏡頭。至於成像方面，筆者試了幾日，雖然同 iPhone 6 仲係有段距離，但相比上代 iPod Touch 來講，已經進步唔少，而且對焦速度上亦快了大約半秒左右，整體來講都算滿意。雖然雜訊抑制上表現仲係一般般，但對於鍾意玩 snapshots 或者只係影張相 up 上 Facebook、IG 分享的學生哥來講，夠用了。
▲雖然 5 代（左）同 6 代（右）iPod Touch 係鏡頭上睇落無分別，但實際上新機係像素上已經提升到去 800 萬像素，最少係像素上同 iPhone 6 睇齊。
▲介面都無乜點變，如果大家有用過 iPhone 6 都知個介面基本上相同。
▲慢動作呢啲模式係 iPod Touch 六代上面都一樣玩到。
▲上面兩張相係 iPod Touch 六代影的，而下面兩張相就係 iPod Touch 五代影的，可見升級為 800 萬像素鏡頭後，iPod Touch 六代的成像質素都有所提升，唔止色彩鮮豔了，影暗位時亮度因為有所提升，所以都睇到更多細節。不過雜訊抑制上感覺都係無 iPhone 6 做得咁好。
有 128GB 裝幾多 game 都夠位！
最後一樣唔同就係，今代 iPod Touch 同 iPhone 6 一樣，設有 128GB 容量機款俾大家揀，對於唔習慣剷 APP，又或者會安裝大量 APP 同埋 games 入部機度，同時又會放幾多歌、片入部機度，方便隨時或者旅行個時離線欣賞的用家來講，真係方便好多。
Edward：「最衰都係熒幕太細！」
整體來講，iPod Touch 六代相比上代來講，都係屬於「小修小補」的升級，雖然用上新硬件同鏡頭，但外形始終無乜變，已經加入咗係 iPad 同埋 iPhone 的 Touch ID 指紋辨識器都無，感覺 Apple 只係當 iPod Touch 六代係一部「為出而出」的產品。當然用起來感覺流暢，各方面表現都無咩要投訴，唯一就係熒幕係今時今日呢個大芒裝置世代，仲係得 4 吋真係太細啦，無論打機睇戲都要「朦」住對眼來睇，筆者真係覺得 Apple 要隨機附送放大鏡先得了。如果熒幕可以大番少少，say 去到 4.7 吋至 5 吋左右，再賣番呢個價，相信大家都會覺得好滿意。
售價：$1,588（16GB）；$1,988（32GB）；$2,388（64GB）；$3,188（128GB）
查詢：Apple（800 908 988）
