我一日來回屋企同公司要搭成 30 個地鐵站，返工放工繁忙時間總會遇上 行李、行李s 和行李ss ，車廂逼過沙甸魚罐頭，但人逼人 逼行李逼樂器 也不是最壞的情況，最壞的情況是一星期總會遇上最少一兩次車廂內有人不適，不論男或女也有機會突然不支倒地，每次見到這些情景都使我擔心不已。
小妹其實由細細個開始已經體弱，試過在不同地方暈倒，所以我成日都會諗，如何在與街上人互不相識的情況下，除左報警 call 白車，可以令佢地通知到我認識的人。我試過將家人朋友的聯絡方法放在銀包入面身份證附近，諗住佢地可能搵我張身份證的時候會一併睇到。後來我發現既然我一般都會拎住部電話係手，係咪 set 定啲家人朋友的聯絡方法做 favorite 會好啲呢？但我 set 完先發現，我電話一上左鎖就睇唔到架喇喎，於是上網睇下有冇啲 Apps 可以令你係電話上鎖的狀態之下，都打到電話（除左 Emergency Call）。
可惜，我暫時搵唔到，但係有讀者話俾我聽一個秘技！睇到文末會有實試！同時我唔覺意發現左一個方法！就係嗌 Siri 出黎幫你！
不過千祈唔好同 Siri 嗌救命…「喂！Siri！救命呀！」
佢只會話你聽就近警署的位置然後開地圖帶你去… 咁樣唔得喎，我嗌救命 Siri 都唔幫我打 999。
不過其實 Siri 都好醒，只係大家都好少用，你可以轉一轉方法，喺你暈低之前用盡全力大叫：
「喂！Siri！打俾（「我」或任何你信任嘅人，例如媽媽）！」
咁樣 Siri 就可以喺冇解鎖的情況下自動開 Speaker 打電話俾你預先設定的聯絡人或你信任嘅人架喇！
不過要留意返以下幾點：
第一．（更新）要用 iPhone 6s 或 6s Plus 先做到！如果係 iPhone 6 或以下要駁住電先叫到 Siri 出黎（駁住尿袋都得架！）
第二．事前要 Enable 左「Hey! Siri」＊iPhone 6s 或 6s Plus 的電話係認聲架，其他人嗌 Siri 係唔會出黎架。
第三．係 Siri 設定個度預設我的資料，當你嗌「Siri，打俾我」，Siri 就會打俾你預設嘅人。
第四．雖然 Siri 都認到，叫 Siri 做野個陣最好都唔好中英夾雜啦！
（以下資料由讀者提供，Thank you 🙂 ）
唔知有幾多人有用過呢？ iPhone 有隻 App 叫「健康/ Health」，佢可以夾埋其他運動 Apps 黎偵測活動量，如果你有用佢來記錄身體狀況，裡面有晒數據分析，夾埋 Apple Watch 用就更好，可以測埋心跳、睡眠等等。而你更可以製作一張個人醫療卡，將個人的身體狀況寫入去（例如你係長期病患、有藥物敏感、食緊啲咩藥），最犀利嘅係可以加緊急聯絡人資料入去，當你剔左「鎖定時顯示/ Show when locked」，就算電話上鎖，都可以睇到你的身體情況或緊急聯絡人資料！好幫到手！
（再一次多謝讀者提供資料 ❤️）
其實咁，萬一真係咁唔好彩身體有不適，千祈唔好啞忍怕老尷怕俾人鬧廢青，一定要搵人幫手呀！我相信一定有熱心的途人或乘客讓座俾你或者幫你聯絡車長嘅。
相關文章:
Gemini 新啟動動畫激似 Siri 彈出視窗有霓虹光圍邊效果
分享到 :
最新影片
