係內地已經上映左兩個多月既《滾蛋吧！Mr. Tumor》，據聞至今票房已突破 5 億；而佢亦都岩岩係 10 月 8 日係香港上映左啦，本身睇 trailer ，講述患絕症既女主角點樣積極面對餘下既人生呢個橋的確「用到爛」唔多吸引，不過睇晒之後又的確幾有驚喜喎，連「淚點高」既小編都差啲標眼水啊！
搞笑催淚大混合 爛 CG 才是精髓
故事就講述女主角熊頓，係個非常叻 FF 既漫畫家；佢個人非常樂觀，直至 29 歲失戀兼失業。當佢三個死黨好友艾米 ﹑ 老鄭和小夏幫佢慶祝生日時，熊頓突然暈低入院。佢一見主診梁醫生就愛上左佢，即使之後熊頓知道左自己患上「非霍奇金淋巴瘤」，佢依然樂天面對。熊頓最後走左，但佢為自己葬禮拍左段片，樂觀話比大家知「死，又有乜可怕喎！」。如果有睇預告既讀者，相信都會見到好多一啲都唔真既 CG ；不過就係多得熊頓咁鍾意 FF ，令到成套戲更多元化，而唔只係單純既勵志片，FF 既笑位同之後熊頓既各個沮喪﹑絕望造成一個好好既對比，觀眾更加可以感受到女主角既情緒起伏。
「我可以失戀十次 但不能失去你一次」
可能好多人覺得最感動係見到熊頓點樣樂天面對死亡，但小編就覺得最感動既反而係女主角同三個死黨個份感情。尤其係當女主角同好友艾米嘈交之後，艾米飛往日本，而作為插畫師既熊頓畫左幾幅插圖比艾米道歉，而最後見到既個句「我可以失戀十次 但不能失去你一次」。其實好多時勵志片都大 sell 親情同愛情，你唔厭小編都厭爆；但《滾蛋吧！Mr. Tumor》決定放重係友情。如果你同小編一樣，有一個無論你幾傻﹑幾癲或者幾無聊都會同你一齊既好朋友，你就會明白，去到人生最後關頭朋友同親人或者愛人一樣咁重要。
叉住「友情」又想食「愛情」 最後兩頭唔到岸
如果要講缺點，一定就係《滾蛋吧》明明「叉住友情」又「想食愛情」啦。愛情係《滾蛋吧》屬副線，講女主角熊頓同吳彥祖飾演既梁醫生之間既感情線。但小編睇完成套戲覺得愛情線有啲多餘，首先係梁醫生呢個角色無論係出現次數同重要性上都非常低，甚至最後女主角既葬禮中亦唔見梁醫生既出現，如果唔係知道成套電影根據漫畫真人真事改編，真係會覺得編劇係為左加吳彥祖係戲中谷人氣而增設呢個角色既。再者，今次吳彥祖係梁醫生呢個角色既發揮有限，雖然唔成日睇佢戲（小編睇既對上一套已經係《魔警》），但都覺得今次佢有少少失手，而且對白咬字都有啲難頂。
總結：「搞笑感人大混集 向友情致敬」
其實成套戲既編排主要以笑位為多，佔足三分之二；而抗瘤以至到去世之後既葬禮，其實去到了電影的後半部。唔難看出導演係想將對抗絕症應該應該係艱苦既刻板印象轉變，令觀眾感受到即使身患絕症既熊頓依然可以樂天咁面對人生一切。加上三個死黨好友，艾米﹑老鄭同小夏，展現友情既美好，其實成套戲搞笑得黎都相當感人啊！只係原本吸引小編既吳彥祖，卻為呢部戲畫蛇添足既角色。小編睇完呢套非常感觸，完場即刻另轉頭同場睇既朋友講「如果將來我變成熊頓你都要咁樣陪我，一齊癲一齊剃頭啊！」衷心推薦比每個有好好好朋友既讀者。
評分： 6.5/10
分享到 :
最新影片
