數碼講呢 D:駕駛人士必備! 即睇實時交通狀況

讚好此文:

十月 19, 2015 •Tech+

唔知各位讀者有冇睇開交通消息呢?揸車嘅朋友可能就有喇,小編有時都會聽到收音機嘅路面交通消息,但因為自己主要都係搭地鐵,所以地鐵有冇故障或者延誤對我嚟講緊要 D。我都知道好多人每朝都會睇電視新聞報導各大主要路面同隧道嘅交通情況,等出門時有個預算可以準時返工!

d00

其實而家要知路面情況又點會剩係得電視直播?有好多同交通或者揸車有關嘅 Apps 都提供咗實時交通資料,隨時都可以知道邊度塞車。但係小編問過身邊嘅駕駛人士,佢哋間唔中都會用呢 D 有實時交通報料嘅 Apps ,不過佢哋異口同聲話:「要知邊度塞車?用 Google Map 咪得囉!」結果原來裝個 Google Map 就攪掂。

雖然 Google Map 可以解決好多麻煩,其實唔少本地 Developers 亦好有心機製作咗好多唔同嘅免費 Apps 比各位司機大佬,而且仲睇到好多交通消息添,小編精選咗以下幾個:

1.互動交通實況

d01

由於運輸署嘅主要道路實況(包括快拍及行車速度屏)都係開放數據 (Open Data),所以唔少交通 Apps 都可以獲得呢方面嘅資料,呢個已經算係基本功能嚟喇!呢個 App 最特別嘅地方係有個平台俾車主「報料」,等大家知道除左主要道路實況外,仲可以交流突發事件例如: 邊度有意外、整路工程、抄牌等等,小編就覺得呢個資訊共享平台好吸引,果度有唔少司機大佬提供港九新界嘅最新資訊,夠晒方便實用。

除咗道路實況外,佢仲提供咗新車資訊,例如售價、優惠,同埋試車報告等,方便各位車友換老婆,資訊種類都好豐富架!

2.HK Drivers 香港車主

d02

呢個 App 嘅基本功能同樓上一樣,但佢嘅介面操作對於駕駛人士嚟講就更加 user-friendly。主頁地圖有大大個 Icon 顯示唔同服務嘅位置,例如: 停車場、油站、提供泊車位嘅食肆等等,一目了然,唔使自己估估吓!另外,小編亦非常欣賞佢有泊車/入錶計時響鬧功能,因為小編好多時同揸車嘅朋友去食飯,佢哋成日都會唔記得入錶,有咗呢個提示就唔驚俾人抄牌啦!

3.Hong Kong Traffic Ease 香港交通易

d03

香港交通易呢個 App 嘅對象同上面兩個有 D 唔同,除咗駕駛人士用得之外,其他道路使用者都係佢哋嘅目標。因為呢個 App 唔單止有運輸署嘅主要道路實況,仲包埋差唔多所有公共交通工具(巴士、小巴、地鐵、電車、渡輪!)嘅資料,一個 App 睇晒所有道路資訊,好勁!

其實政府早喺 2011 年已開始推行有關開放數據嘅政策,繼上次講過 天氣 Apps,今次講嘅交通狀況,而且仲有人口數據、財政預算等等都係開放俾大眾使用嘅 Open Data。政府開放數據俾社會大眾使用既可以提升透明度,Developers 又可以諗計好好利用數據開發程式,將數據發揮更大效益,遲吓等小編再介紹其他利用 Open Data 嘅本地 Apps 啦!

 

 

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , ,

讚好此文:


Comments are closed.

unwire TV



更多同類文章:

最新文章