HTC 繼早前推出酷似 iPhone 嘅 A9之後，今日再推出 Desire 728 Dual Sim 為大家帶來聖誕祝福。依部中價機有5.5吋螢幕及 BoomSound 雙前置喇叭。平價玩手機影音享受，想知有幾正就快快閱讀以下文章！
分別有黑白兩色可供選擇，用上全玻璃機面設計，即刻有啲似 iPhone 4 嘅感覺（又似！？），籮文就覺得依個設計有啲老套，始終玻璃機面又唔係新嘢，加上用家最怕就係爆芒，依家仲要全個機面都係玻璃，唔知耐跌程度有幾大呢，同埋邊框好啲粗，搞到部機好似好笨重，雖然個樣笨重，機身厚7.87mm，手感上有啲厚，但揸起上黎都算舒適，可能因為我手比較大。
▲用上全玻璃機面設計，即刻有啲似 iPhone 4 嘅感覺（又似！？）
▲機背用上硬膠，易痴上油印
▲機身厚7.87mm，手感上有啲厚，但揸起上黎都算舒適。
▲下方有 MicroUSB 位
▲右側有音量及開關制
▲機頂 3.5mm 耳機插
HTC Desire 728 Dual Sim 支援真正雙卡雙待，2+1卡槽設計讓用家插晒兩張 Sim 入機之後都可以插入 MicroSD 卡，兩張 Sim 卡與 MicroSD 卡獨立處理，可以同時使用。唔似其他標榜雙卡雙待的手機，插晒兩張 Sim 就不能用 MicroSD。內置 16GB 儲存空間，唔夠用的話，MicroSD 最高可以支援 2TB，夠用啦啩？
▲2+1卡槽設計讓用家插晒兩張 Sim 入機之後都可以插入 MicroSD 卡
HTC 嘅 BoomSound 雙前置喇叭出晒名靚聲，但擁有 BoomSound 嘅機偏偏都係比較高價位，近年 HTC 都將 BoomSound 帶到 Desire 中階機系列。今次 Desire 728 唔只有 BoomSound，仲有 Dolby Audio 音效技術，可以模擬 5.1 影音效果，不過籮文試過 Dolby Audio 效果，就覺得似係「掛名」多啲。靚聲之外，加上 5.5吋 720p 螢幕，畫面夠光，但聞 Mon 距離睇文字就會見起格。仲有可視角度比較窄，當係免費送你防偷窺功能。
▲HTC 嘅 BoomSound 雙前置喇叭出晒名靚聲，但擁有 BoomSound 嘅機偏偏都係比較高價位，近年 HTC 都將 BoomSound 帶到 Desire 中階機系列
▲今次 Desire 728 唔只有 BoomSound，仲有 Dolby Audio 音效技術，可以模擬 5.1 影音效果。
▲畫面夠光，但聞 Mon 距離睇文字就會見起格
▲正面冇問題，側少少時畫面就會暗很多
Desire 728 擁有 1,300萬像素主相機及500萬像素前鏡，雖然冇 UltraPixels，但前後鏡表現都不錯，內置即時美顏、雙重曝光等相片特效功能。即時美顏功能都非常自然，只係冇 OIS 所以好易鬆郁矇，隻手定啲就 OK。
▲ 雖然現場燈光偏黃，但相機色彩都很鮮豔
▲從線條可見細緻度頗高，光圈夠大，可以影到前清後矇景深效果
▲前鏡效果不俗
雖然係中階機，但效能都唔算太低。用上 Octa Core 八核處理器及 2GB Ram，日常使用睇片一定冇問題，但係打機就要視乎遊戲耗能度。只用到 720p 螢幕，但電池容量達到 2,800 mAh，要用全日無難度。跑 Antutu 3D Benchmark 分數比 Note 4 仲低，但有33662分，作為中階機都算係咁。
其實部機除了 720p 螢幕表現及效能比較一般外，其實都好 OK 。籮文就覺得依部機啱晒聖誕送俾長輩做禮物，因為 BoomSound 喇叭夠大聲，唔怕聽唔到電話響同屋企睇片睇馬可以夠大聲喇！
HTC Desire 728
售價：＄2,398
