數碼同學會: 史丹福學成歸來!「數碼港–大學合作夥伴計劃」得獎隊伍分享

讚好此文:

十二月 2, 2015 •Tech+, 生活科技

Unwire 一直有同大家追蹤住「數碼港 – 大學合作夥伴計劃」(CUPP)嘅進展(早前報導:CUPP 介紹 及 同學回程感想),而今個年度整個計劃已經嚟到尾聲喇,早前全部 18 隊同學仔就喺 Demo Day 上展示成果,其中 10 隊表現優異嘅隊伍各可獲得港幣 $10 萬元現金獎,同埋可以直接進入數碼港培育計劃嘅面試!今次 CUPP 嘅主題係金融科技(FinTech),不過獲獎隊伍嘅 Project 類別好多元化,除咗有金融產品(如保險、強積金等)嘅自動化方案,亦有電子商貿改善方案、匯款、股票投資等不同範疇嘅概念。咁好機會小編梗係搵機會同幾隊同學仔傾吓計,佢哋嘅概念全部都好特別㗎!

allwin

QR Code 數碼加簽

Authpaper 係香港中文大學嘅團隊,佢哋針對 hard copy 文件製作咗個認證技術,利用 QR Code 嚟做數碼加簽防止偽冒,幫助金融業更有效率咁處理及核實文件。Demo Day 當日雖然佢哋一開始遇到少少技術問題,不過佢哋都好冷靜,重新開始並且順利完成 Pitching,最後更加成為咗 10 隊獲勝隊伍之一。

佢哋話當初報名參加 CUPP 嘅時候,一早已經朝住參加數碼港培育計劃嘅目標而準備,所以勝出之後嘅培育計劃面試佢哋亦都非常有信心;而贏取比賽嘅 10 萬元,佢哋就希望用嚟做宣傳,例如: 參加一 D  即將舉行嘅大型會議,希望可以建立更多相關人脈,等更多人認識佢哋嘅品牌。

authpaper

幫外傭匯錢回鄉

另一隊獲勝嘅 Bank Without Limit – ETransfer 係香港理工大學嘅團隊,佢哋喺 Pitching 之前已經表現得非常有信心。ETransfer 係一個協助跨國匯錢嘅方案。創辦人之一 Davon 表示,佢哋見到外傭匯錢回鄉嘅時候需要付上高昂手續費,所以希望將跨國外匯分拆成 P2P 本地轉帳,藉此慳返外匯轉移費用。不過由於行政上面涉及牌照同埋好多法律嘅問題,勝出嘅 10 萬元將會用嚟申請牌照同埋進一步完善系統,而佢哋嘅團隊亦將會請第三位同事幫忙。Davon 覺得數碼港培育計劃對於冇乜資源嘅畢業生嚟講有好大嘅吸引力,佢期望兩年之內可以成立到自己嘅 Startup。

etransfer

網店經營好幫手

Initial 參加 CUPP 之前曾經喺 Startup Weekend 活動上勝出,今次代表香港城市大學參賽,佢哋喺台上表現得非常有自信。Initial 睇中現時流行網店經營模式嘅缺陷,特別製作出一個可以跨平台使用嘅系統,協助網店店主處理訂單。創辦人之一阿 Ray 笑住話佢喺 Demo Day 之前一天已經辭咗職,全心準備搞好自己嘅 Startup。佢表示 Initial 嘅基本開發已經完成,所以 10 萬元獎金可以全部用嚟做宣傳,不過宣傳方案就仲諗緊,阿 Ray 希望可以透過數碼港,獲得更多資源同埋人脈,做好 Marketing,幫助 Initial 進一步發展。

initial

投資資訊處理

MegaEye 創辦人之一 Eric 喺一開始就同小編講佢啱啱喺接受訪問當日嘅上午辭職,諗住全職搞好自己嘅方案。小編覺得非常鼓舞,因為佢哋嘅方案非常專業,亦好值得放手一試。MegaEye 代表香港科技大學參加 CUPP,佢哋提供嘅服務主要針對中國獨立股票投資者,利用 Machine Learning 同埋大數據分析,幫助投資者分析及理解股票資訊,並向投資者提供最適合嘅股票 portfolio,唔駛「盲中中」接收資訊,做錯投資決定。Eric 話喺 Demo Day 當日嘅 Pitching 上,只能夠用圖片嚟說明嘅原因係 Server 唔能夠支持處理數據,運算速度亦較慢,故此佢希望可以用贏得嘅 10 萬元獎金將雲端電腦系統(Cloud Computing)升級,減輕 Server 壓力,令整個用戶體驗更加暢順。

megaeye

當日仲有其他六支隊伍各獲 10 萬元獎金,以及可以進入數碼港培育計劃的面試,數碼港今次出錢又出力,先帶同學去美國史丹福大學取經,返嚟仲俾機會佢哋發展自己嘅 Startup,希望同學仔都可以珍惜呢 D 咁難得嘅經驗同機會,繼續好好發展佢地嘅FinTech Startup 啦!

allteam

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , , ,

讚好此文:


Comments are closed.

相關文章:



更多同類文章:

最新文章