仲有唔夠一個月就母親節啦！年年都送康乃馨似乎行咗 D，今年不如試下送玫瑰丫。最近我依莉詩就去一個工作坊偷師，依家就同各位 wire 足分享下整仿琉璃玫瑰的心得啦！
第 1 步：預備材料
黃玫瑰的花語係享受與你一起的日子，送俾媽媽就最啱，所以今次準備咗黃色同綠色的樹脂液，當然你都可以揀其他顏色。至於製作時間，新手應該可以係 3-4 小時完成，不過花形靚唔靚就要睇自己本身有無美感啦！
▲ 其實材料並唔複雜，一般 DIY 材料鋪都有得買，主要係樹脂液、鐵線、綠色皺紋膠紙、同玻璃罩，而工具就係剪鉗同 4款唔同大小的圈。
第 2 步：鉗出基本形狀
跟住就係考技巧同心機的時候，就係利用水管的圓形，將鐵線圈成唔同大小的線圈，製成花瓣的初形。如果砌開模型的男仔相信會好簡單，不過對於平時唔用剪鉗的我就有難度了。
▲ 4款唔同大小的花瓣分別需要 5塊、4塊、2塊 同 1塊，愈大就需要愈多。
▲ 至於樹葉，因為難道太高，導師一早已經為我準備好了。
▲ 將整好的鐵線拮係發泡膠上就唔怕整亂。
第 3 步：整出花瓣形
上一個步驟 D 花瓣唔圓都唔緊要，因為呢個步驟就要將佢壓成花瓣形。首先要用手輕輕按成倒三角形，之後再用鉗扭出不規則的紋。
▲花蕊要將鐵線壓成長形，再借助水管圈成立體。
▲ 首先要用手輕輕按成倒三角形，之後再用鉗扭出不規則的紋。
第 4 步：沾上樹脂液
之後就係最好玩的一 part ，上樹脂液。雖然玫瑰睇落似玻璃，但其實係樹脂液，乾咗之後會呈透明，好處就係無玻璃咁易碎，而且唔似玻璃咁要令去燒，容易上手。
▲ 將繞好的鐵線好似拎匙羹咁放入樹脂液，再慢慢錨起，直到樹脂液填滿鐵線圈。如果樹脂液有泡泡記得事先整穿佢，唔係就會有泡唔靚了。
▲ 每整好一塊就拮係發泡膠，等 3-5分鐘就會乾。
▲ 樹葉的做法亦差不多，不過重點要落係葉尖。
▲ 之後同樣拮係發泡膠待乾。
第 5 步：砌出花形
當全部乾晒就開始砌花形了。由花蕊開始，由少至大一片片順時針疊上去，之後利用皺紋膠紙圈起多餘的鐵線。記得要紮實，唔係朵花就會好易散。
▲ 花蕊需要用陰力捲成圈。
▲ 之後將花瓣由細至大順時針放上去，每放好一朵就繞一繞多餘的鐵線，穩固花形。
▲ 到咁上下就用皺紋膠紙紮實多餘的鐵線。
第 6 步：上底座
最後一個步驟就係放上底座，一般係街買的玻璃罩底座都係平面，想佢棟直其實有難道，不過導師預先就係底座整咗個小山，而且中間有個洞，直接將花插上去就可以了。
▲ 如果想更有心思，只要加 $100 就可以訂造一個刻有自己心聲的銅牌，令玫瑰花更獨一無二。
▲ 完成後，仲會附贈磨砂手挽盒，等你可以精美又安全咁帶佢番屋企。
依莉詩：「步驟簡單但需要耐性」
潮流興送永生花，不過永生花過 3-5年始終都會變黑，而仿琉璃玫瑰就唔同，可以 keep 好耐，而且係一種好有歷史的工藝，以前媽媽都可能做過。如果送一朵自己親手整的仿琉璃玫瑰俾佢應該會好開心。不過整仿琉璃玫瑰要手非常靈活先得，如果砌開模型的男仔反而更易上手，好似我呢 D 粗手粗腳就好難控制個剪鉗。不過步驟上其實唔多，新手都好，只要有耐性，應該可以係 3-4 小時完成，不過花形靚唔靚就要睇本身有無美感啦！
My unique Rose. Workshop 仿琉璃玫瑰工作坊
