港女科技一週:金管局貨幣展無講 FinTech 發展

讚好此文:

八月 11, 2017 •數碼港女週記, 獨立評論

港女最近接觸咗好多有關金融科技(FinTech)嘅資訊,其中電子支付就引起最多人討論。有啲人覺得再唔喺香港大力推動電子支付應用,就會落後於世界;亦有人覺得香港實在太方便,周街都係銀行,又有信用卡同八達通,要市民唔需要轉用新支付方法己經夠方便。但無論點都好,似乎現金最終難免都會同大家講拜拜,畢竟而家有愈來愈多國家及地區試行「無現金」經濟。

最近就有朋友帶咗我去睇一個「隱世貨幣展」,預先回顧香港的貨幣歷史,了解港幣的過去及相關香港貨幣政策,一齊去睇下個展覽有咩玩。


簡述香港金融史

一入到去展廳就見到長長一塊大展板,講述香港的貨幣及銀行的發展歷史,由 1842 年香港開埠初期講到 2015 年。中間有圖片及文字展示以往喺香港流通過的貨幣,大棉胎、軍票都有,八達通當然都佔一席位。唔知未來會唔會有其他支付方式上榜呢?

▲呢道牆上嘅資料會定時更新,因此近年發生過嘅金融事件都有記載。

充滿香港特色的貨幣

中間有多個展櫃介紹各家銀行發行及現行流通港幣,亦有展櫃講解而家流通嘅紙幣有咩防偽特徵,及如何製作紙幣等。呢個其實真係香港特色,有幾多個地方會好似香港咁有政府,又有幾間銀行發行現鈔吖?

▲個人覺得渣打出嘅紙幣最特別,不同面額有不同圖案,仲有好多故仔。

大家知唔知我地最唔鐘意收到嘅神沙同大餅有咩用?展覽廳的其中一道牆上就有一幅用咗超過 13 萬個神沙砌成的香港風景圖喇,由 10 位香港藝術學院學生製作,用咗半件時間整㗎!大家估下呢道牆上嘅神沙總值幾多錢?

▲ 唔止係 1 毫子,所有流通緊嘅硬幣都有用到喺幅畫入面。

FinTech 內容不足

而展覽場入面有一部分專門介紹香港金融管理局的職能、相關政策及制度。有啲可惜嘅係,展廳入面雖然有好多互動展品及遊戲(而且都幾好玩),但並冇一個專門講 FinTech 政策或展望未來的部分。咁重要嘅議題,成個關於香港金融政策嘅展廳乜都冇講過,港女覺得有啲失望。

▲幾好玩嘅互動展品,可以一路玩一路了解香港主要金融政策。

遊客都識嚟參觀

差啲唔記得同大家講呢個展覽係邊度有得睇~其實佢真身係「金管局資訊中心」,已經開咗 14 年,位於 IFC 二期 55 樓。由於展廳其實屬於金管局辦公室嘅一部分,上去之前係需要用身份證登記攞 Pass 㗎。不過,開放時間就唔係咁 friendly,係名乎其實的 office hour,星期日及公眾假期都唔開,如果要去參觀就真係要趁暑假的時候去,即係打工仔如港女就無乜呢個機會喇~

上面景觀都幾靚,可以睇到港島及維港景觀,仲有遊客專誠上去睇,因為呢個地方係 TripAdvisor 大力推薦的香港景點之一,遊客個個讚好,港女嗰日去到都成個遊客咁…

▲真係無乜邊度有機會俾大家以呢個角度睇香港,仲要唔使錢!

金管局資訊中心詳情

地點:中環金融街 8 號國際金融中心二期 55 樓
開放時間:星期一至五 10:00 – 18:00;
星期六 10:00 – 13:00 (星期日及公眾假期休息)
費用:全免,可即場參加導賞
網頁:https://goo.gl/zAgus8

• 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , ,

讚好此文:


Comments are closed.

相關文章:



更多同類文章:

最新文章