Audi 計劃今年秋季發表全新入門純電車 A2 e-tron，品牌今次率先以迷彩偽裝造型曝光呢款緊湊型純電車，並一次過公開空氣力學設計、能耗表現同動力系統等重要規格，形容佢係品牌歷來能耗表現最優異嘅量產車。
傳承 A2 老將血統
Audi 表示開發 A2 e-tron 嘅初衷，係期望電動車能夠得到更廣泛消費者接受，同時承接 1990 年代原裝 Audi A2 嘅突破精神，尤其係 2001 年推出、每百公里僅需3公升柴油嘅 A2 1.2 TDI 型號。品牌今次研發目標，就係將呢種對效率嘅執著帶入純電時代。
根據初步 WLTP 測試數據，配備 140 kW 動力系統同選配效率套件嘅 A2 e-tron，能耗表現達每百公里 12.8 kWh，即每一度電可行駛約 7.8 公里，若換算成傳統燃油消耗概念，相當於每百公里僅消耗約 1.3 公升燃油。雖然 A2 e-tron 車身尺寸比前輩更大，但能耗卻只係當年 1.2 TDI 型號嘅一半，反映汽車工業過去 25 年嘅進步。
空氣力學設計為慳電關鍵
車速達到時速 100 公里以上時，超過 50% 能耗用於克服空氣阻力，所以降低風阻能夠直接提升續航里程同減少能耗。Audi 透露 A2 e-tron 風阻係數低至 0.24，係品牌緊湊型號中表現最佳，車身造型嚴格遵循流線型幾何原理，配備圓潤前端、流暢車頂線條同線條分明車尾。
車頭兩側設有空氣倒流簾幕，能夠精確導引氣流繞過旋轉中前輪，減少亂流產生；車頭亦設有主動式冷卻進氣格柵，正常行駛及高速行駛時會保持關閉以優化氣流，只有電池或電子系統需要冷卻時，例如充電或身處高溫環境，才會自動開啟。輪拱區域方面，研發團隊透過 Gap Reducer 同 Gap Breather 設計，縮小車呔同輪盤邊緣縫隙以穩定氣流，配合精密設計空氣力學輪圈，每百公里可節省高達 0.9 kWh 電量。
動力系統雙規格可選
A2 e-tron 提供兩種驅動系統規格，APP350 用於較低輸出版本，提供最高 170 kW 功率同 350 Nm 扭矩；APP550 則搭載於高性能版本，輸出功率可達 240 kW，扭矩達 545 Nm。兩套驅動系統均整合馬達、變速箱同功率電子設備，並安裝於後軸。
為進一步提升驅動系統效率，A2 e-tron 引入碳化矽半導體技術，馬達部分改用厚度僅 0.2 毫米矽鋼片，取代傳統 0.3 毫米規格，藉此降低鐵損；定子繞組亦由星形切換為三角形配置，令馬達可以在更高效率轉速區間運行。變速箱同步換裝新型低摩擦潤滑油，並採用 10.2:1 齒輪比，高速行駛時可降低馬達轉速，從而節省能耗。
電池同快充表現
A2 e-tron 將提供多款車型選擇，當中 140 kW 動力車型配備 61 kWh 磷酸鐵鋰電池，可用電量 58 kWh，並採用 Cell-to-Pack 封裝設計，提升空間利用率同縮減電池組垂直高度，連帶增加車內腳部空間同乘坐舒適度。Audi 同步優化熱管理同充電軟件，令 A2 e-tron 經 AC 充電效率提升至 89.6%，經 DC 快充站補充電力，電量由 10% 充至 80% 僅需約 26 分鐘。A2 e-tron 亦具備雙向充電功能，包括 V2L 同 V2H，可透過車尾廂插座或專用轉接頭為外部電器供電，亦可以成為家庭儲能系統一部分。
秋季發表在即 售價率先曝光
德國媒體最新報道確認，A2 e-tron 將於今年秋季舉行全球首發，並公開提供 125 kW、140 kW、170 kW 同 240 kW 共 4 種動力版本，WLTP 續航里程最高達 649 公里。Audi 亦率先公開入門售價，德國市場起步價為 38,200 歐元（約港幣 HK$323,936），較品牌現有 Q4 e-tron 47,500 歐元（約港幣 HK$402,800）起步價便宜近 10,000 歐元。品牌預計歐洲市場今年底至 2027 年初正式開售，直接對標 Volkswagen ID.3 Neo 等同級純電車型。
資料來源：Audi
