自細，父母都教曉小編一個道理：買嘢要「貨比三家」，要試清楚先好買。細個個時呢句說話唔太上心，到大個咗，搵嘅錢有限，而慾望就無限，就好體會到呢個道理。到後尾諗深層：我哋買嘢可以貨比三家，點解？因為我哋有選擇權！點解有選擇權？我哋買屬於我哋自己嘅嘢，所以一定要有得揀！有選擇權，因為我哋先係老闆。
事實上，喺香港，大家都仲算係幸福，想買手機、電腦嘅，大家一出街，成街都係賣手機、電子產品嘅舖頭，而且大部分國際品牌，都可以好容易買得到，有啲舖頭仲會俾大家試真試楚先至俾錢買。事實上，選擇權就係咁：我俾錢買屬於我嘅嘢，因為係屬於我嘅，自然係我話事，因為：我係老闆！
選擇權，係自由嘅一種，係人與生俱來乜都唔洗做都應該已經有嘅人權。不過與生俱來有，唔代表係「老馮」。無疑今日大家想買乜都得，只要有足夠嘅金錢。但如果有朝一日，有人話：以後只可以買某個國家嘅嘢，買外國嘢就唔得！理由可以係：唔愛國、唔安全、唔俾面……大家又會有咩感覺？
大家唔好以為呢個世界真係無呢種國家，好似北韓、以前嘅古巴（古巴直至 08 年先俾民眾用手機）、又或者一啲第三世界國家，有時唔一定係因為窮而買唔起，而係佢地國家真係唔俾國外品牌入口，所以國民想買部靚啲嘅手機，又或者快啲嘅電腦，都無呢種選擇權！當你身處呢啲國家，你就只可以：無奈。
所以呢，既然我哋今時今日仲有某程度上嘅選擇權，仲可以有限度去保護屬於我哋自己嘅嘢，我哋就要好好珍惜。因為你唔珍惜，有朝一日失去咗，到時想後悔？遲鳥。
所以，係仲有得爭取選擇權嘅時候，大家一起努力，去改善我們的生活吧！
分享到 :
最新影片
