親子日記：入「媽咪會」著數多！？親身分享

作者

papa it
發佈日期

2014-01-10
閱讀時間

8分鐘
字體大小

大家夜晚睇電視相信都睇過唔少奶粉、紙尿片或者嬰兒用品廣告，唔知大家又有沒有被電視廣告吸引到申請加入佢地的媽咪會、BB 會呢？唔少人覺得加入媽媽會可以攞到好多著數，而且更最重要係可以確保 BB 有奶粉食唔怕比水貨害掃清買唔到，究竟加入呢 d 媽咪會、bb 會有咩著數？係咪一定買到奶粉唔駛同人爭呢？今次小弟就和大家分享一下加入媽媽會攞著數、報名聽 BB 講座、下載親子 Apps 的心得！

雖然政府已經立例唔比帶多過兩罐奶粉返大陸，不過大家都知道此例有等如冇，水貨客一樣可以利用螞蟻搬屋的方式運返去賣，以換取每罐 $50- $80 不等的利潤，小弟就親眼見過唔少老公公、老婆婆為左「賺水腳」而幫人帶奶粉了，而且屋企附近的超市朝朝都見到有人排隊買奶粉，感覺真係非常討厭！水貨客橫行，好多父母為左確保買到奶粉而上網入而家好流行的媽媽會，希望可以係網上面預訂奶粉，而且部份仲有送貨服務唔駛同人爭（以小弟所知送上門既有美素佳兒、雪印、牛欄牌、雅培等，而其他品牌就要係附近的超市、藥房取貨，如有錯漏請大家指正），聽起黎的確係幾方便同埋唔駛同人爭既！

小弟經驗之談，左格右格最平都係藥房最抵! 最多見過平成 $50 蚊一罐! 另外，在 BB 展覽一箱箱咁買會有折扣，亦係平價入手奶粉另一方法!

上網訂貨限制多

不過大家唔好以為入左媽媽會就可以狂訂奶粉，原來亦有不少限制。為左打擊水貨客，訂奶粉都要核實 bb 既身份，例如：你要出示 bb 既出世紙副本，媽媽會視乎你 bb 的出生期派唔同既奶粉比你，例如：你 bb 係初生就只會買到 1 號奶粉、你唔可以亂買 3 號。而且，一般你只可以係 2個星期內最多訂 3 罐，咁就可以有效限制有人屯貨、炒賣等。雖然限制唔少，不過既可以保障供貨量，又可以杜絕有人掃貨，入會訂貨可能比較麻煩，不過相信各位爸爸媽媽可以理解既！

入會買奶粉唔平!

雖然加入媽媽會係網上訂奶粉的確可以肯定買到奶粉，比較適合唔想煩的父母，不過對於小弟呢種慳得一蚊就一蚊的人黎講，就發現網上訂購價一Ｄ都唔平，基本上就等如係超市、萬Ｘ、屈ＸＸ買奶粉的公價！比起街上面的藥房黎講，每罐隨時貴成 $50，大概就係 20% 至 25%。如果大家 bb 食開果隻奶成日斷貨，又或者住在北區要同水貨客爭奶粉既話，上網訂奶粉可能比較穩陣。但係如果大家住係市區又唔想捱貴奶粉，小弟就建議各位爸爸媽媽有時間行多兩間藥房格下價仲著數了！雖然佢地成日都話冇貨，不過好多時都肯比你留電話 Hold 貨呢！

免費登記做會員，唔少都會送你試用裝奶粉、亦會提供育嬰資訊，基本上就可以攞到各大品牌的試用裝及優惠。

對於準爸爸媽媽產品講座可以豐富一下育兒知識，不過由於免費都幾難爭位，手快有手慢冇！

入會利多於弊

雖然入媽媽會、BB 會買野未必平，不過若果計埋其他野就一定有著數，起碼大家會收到一堆迎新禮物（你上 BK 網睇下有幾多媽媽展示戰利品就知啦！），所以小弟絕對贊成大家入會架！其實各大奶粉商、用品商為左吸引客戶入會，好多時都會提供不定時的購物優惠、現金券、產品試用、又或者搵專家免費講座、好多嬰兒健康 Talk 等等，雖然入左會未必一定可以參加，但係唔入會就一定「冇份」。另外越來越多媽媽會、BB 會都提供一些親子互動既教學 App，對於新手父母，或者想接收多一Ｄ育嬰資訊、照顧 bb 心得的爸爸媽媽黎講亦係一個比較可靠的免費 Source 呢！