無錯！大家真係無睇錯！今年的 CES，真係有廠商推出有 320GB 儲存空間的智能手機。點解可以咁誇，連 iPhone 6、6 Plus 都比唔上佢？
呢部名為 Saygus V2 的智能手機，單看外表同埋規格都無乜特別：5 吋 1080p 解像度熒幕、Qualcomm Snapdragon 2.5GHz 四核心處理器、3GB RAM、Android 4.4.4 KitKat 作業系統。不過一睇儲存空間，嘩！不得了，真係有 320GB！不過大家唔好太開心，呢個係最大可以去到的儲存空間，皆因佢有兩個 microSD 記憶卡插槽，比一般智能手機仲多一個，理論上買番兩張而家市面可以買得到的 128GB microSD 記憶卡，加上內置的 64GB 儲存空間，就可以有 320GB 儲存空間啦！大家明未？
當然，如果大家買唔起 128GB microSD 記憶卡，其實部 V2 都有唔少特點嘅，例如：佢有 2,100 萬像素主鏡頭（連雙 LED 補光燈）、1,300 萬像素前置鏡頭、內建 Harmon Kardon 喇叭、生物認證指紋讀取器、內建支援 Qi 無線充電等功能，更可以讓軟件開發商擁有 root access 權利！
睇到呢度，部 V2 真係好吸引呢？好啦，究竟賣幾錢？外媒向 Saygus 詢問時，負責人就沒有透露實價，只表示「相比其他 5 吋手機會有競爭力」。說到呢句，應該都唔會太貴掛（Edward 估計應該港紙 5 千零掛……）。Saygus 更表示，會在春季在美國各網絡商推出，亦會在其他國家的網絡商推出。唔知香港有冇機會有行貨賣呢？
來源：TheVerge
分享到 :
最新影片
