2015 開始，同大家 share 一下幾樣數碼港的秘密，我都係拋磚引玉架咋，大家有更多開心大發現的話，不妨話埋俾我知，有福同享丫嘛 😀
1、三座的迷思
又係 Google Map 呀 今次係講 Google Map 上面有兩個「數碼港三座」。
IQ 題：下圖幅圖有兩個 pins，左邊個個係數碼港 3 座，右邊個個係數碼港三座，究竟邊個先係「真三座呢」？
答案係：兩個都係數碼港三座！
因為三座其實好大，左邊 pin 係 A 區附近，右邊 pin 係 E 區附近。三座有 6 個區：A 至 F，由 A 區行去 F 區，都要用差唔多 10 分鐘。如果 office 係 A 區，跟住活動係 F 區舉行，就一定要預返 15 分鐘到搬運物資，因為數碼港唔同地鐵站，路係平，不過唔直，冇個啲平地加速扶手電梯，亦都未先進到有瞬間轉移機器，咪當做少少運動，練下腳骨力囉。
另外，「數碼港三座」係一個搭巴士的 tricky 位，如果巴士話下一站「數碼港三座」，其實佢係想講 E 區，如果去 A 區，總站落先啱。搭的士又係，你同佢講去數碼港，司機大佬會問你：「第幾期呀？」，數碼港係冇分期的，一係就同佢講地標，例如：老麥/戲院，一係就精準啲，例如：二座/三座停車場，咁就唔會落錯車啦～
2、去數碼港踩單車
你冇睇錯，我係講數碼港，唔係科學園。大家都知香港的踩單車熱門路線係大圍至大尾督，中途會經過科學園，而個度通常係小休位/廁所位/影相位。唔講唔覺，原來數碼港（準確黎講係貝沙灣）有南區唯一一條單車徑，長 300 米，只係踩得 5 分鐘就拜拜，短到運輸署同康文署都當佢透明。租單車？嗯，泊單車位就有好多嘞…不過，單車徑周圍高樓大廈綠樹林蔭都幾舒服，唔怕斜的話可以踩馬路，間中都有不少全副武裝的單車友練車。聽講有組織爭取緊係港島區起多啲單車徑，成功爭取的話咁數碼港就從此不再孤單一個啦！
▲ 單車徑: 除左踩單車之外，仲有好多人踩滑板同滑板車，室內都有人踩…
3、我要便利店
早排翻睇 The Shawshank Redemption，其中一幕講主角個個星期寄信去國會，要求改善監獄中的圖書館，卒之成功。數碼港每年夏天都會做問卷調查，訪問租戶對於設施的滿意度同需求。綜合全公司意見，我地連續兩年都係寫同一個：增設理財易中心及任何便利店。結果一年後，銀行換左部新款櫃員機。咁即係話，凡事有得傾（奸笑）。聽講超市同老麥都係經過長年累月的等待先出現，我算係「好好彩」，初黎報到就「享用」到（其實好少幫襯）。我地或者要學下套戲個主角咁，個個星期寫信俾數碼港，同埋個啲鋪頭，話俾佢地聽冇便利店幾唔便利，例如：想買 100 毛？冇；想靜雞雞出去叮個燒賣食再扮冇野返上 office？冇；想買點數卡？冇；想儲印花換公仔？冇…結論係，我要便利店！
4、數碼港幫你日日慳
而家買野分 Online 同 Offline 架嘛，數碼港兩樣都幫你慳。Online 黎講不外乎淘寶，淘寶同淘寶架啫，大家淘過應該知，數碼港係偏遠地區，送公司順 X 運費要加多 30 蚊附加費，一係就俾 14 蚊去郵局拎。係咪都要加錢，就自然少左分開幾次淘，集中一次過買咪慳左運費囉（好似係）:P
至於 Offline，好明顯就係講食啦，唔通你會係數碼港 shopping？返工的朋友，一日最少要係呢度食一餐，根據我同部分數碼港工作的草根階層的深情對話，得知佢地對餐廳的意見係「又貴又冇乜好揀，寧願自己帶飯」，我對此深表認同，帶飯的確平好多，於是又慳一筆。多謝數碼港拯救我份糧。
5、保持連線
而家大家手頭上的 devices，冇得上網尤如廢了武功，作為一個培育科技發展的地方，數碼港提供超過 200 個 24 小時免登記同免費 wi-fi 接入點，成個 campus 都用到，數碼港負責 wi-fi 的哥哥話，下載速度有成 8－10mbps，係 GovWiFi 的 8－10 倍，唔使驚爆data 上唔到 Facebook 睇唔到韓劇 做唔到野啦！
▲ 即刻示範睇HKTV，好清好順！
6、治安 vs 警察
雖然我唔係幾知係因為呢度治安好所以冇乜警察，定係因為冇乜警察所以治安好 (?)，總之我就好少係度見到有警察出現，我淨係知道大家都覺得呢度好安全，例如之前講過媽媽照顧 bb 係採取自由放任政策；有人隨意放低袋、電話、銀包係度，跟住成個人走開都覺得冇問題；【親身經歷】漏低左個新電話係廁所，小朋友路不拾遺交去管理處，俾我拎返！
7、長期作戰必需品
每個係數碼港工作的朋友總有機會經歷，唔覺意 OT 左，甚至要搞到「佔領數碼港」（sosad）。唔使擔心，數碼港有提供租戶淋浴間！隱閉到一個點，人地講我都唔信，要親身證實。真係俾我搵到，位置就係數碼港 management office 對面！不過咁，我其實唔想有用到佢的一日，人是要放工的。新一年，大家加油，早啲放工，搭到穿巴走！
▲ 有圖有真相，不過免得過都唔好係度沖涼啦XD
8、其實我
既然你都睇到尾，都唔爭在話埋俾你知，我有睇晒你地啲留言同 Share Caption 架，如果你有啲咩諗法，有咩想知，有咩想講，歡迎你做鍵盤戰士留言；或者你入開黎，又咁啱撞到我（其實我都幾深閨於 Office XD），又認得出我，我唔介意你同我或者我啲同事甚至老細傾計架（不過唔知佢地介唔介意），哈哈哈！
