自從 GoPro 爆紅後，坊間大大小小 Action Cam 已成為好多人的 Snapshot 機或自拍神器。不過小米除咗手機，之前都發佈一款「小蟻運動相機」，而且水貨近日已經到港，想知佢好唔好用，值唔值得入手就要留意喇！（以下有更多資料。）
外表似 GoPro 但有點「膠」
市場上 Action Cam 款式眾多，而「小蟻 運動相機」（下稱：小蟻) 之所以咁多人留意全因價錢夠平！僅 $399 人民幣價錢，功能包括拍攝 1,600 萬像素相片及 1080p 60p 影片，條件絕對唔差。不過，小編打開個盒就發現「小蟻 運動相機」外形同 GoPro Hero4 都幾似，機身都係長方形盒仔，機前設開關按鈕，機背收藏電池及接口，比較特別係佢有青綠色，但感覺比較「膠」有點似玩具。
「旅行版」多支棍
「小蟻」還有旅行版可選購，分別是多了一支「自拍棍」，棍上有雲台，而且有 5 段伸長，而底部亦可加裝螺絲頭配件，造工唔錯又精美，但代價是 $100 人民幣，值唔值真係見仁見智。
裝 App 輕鬆配對
「小蟻」透過 WiFi 連接手機，對應 Android 及 iOS 裝置，下載 App 跟住步驟便可輕鬆配對。用戶可遙控「小蟻」進行拍攝，介面跟早期小米手機相似，頂欄可選擇影相或拍片；底欄就顯示「小蟻」及手機電量，而設定裡有好多選項，但實際只有測光及解像度會選取。
▲ 「小蟻」本身都可獨立操作，啟動後可按開關轉換影相或拍片模式，機頂 LED 亮起紅燈為拍攝模式。
相質「一般般」 勝在夠 Wide
「小蟻」同其他 Action Cam 一樣配備超廣角鏡頭，雖然用了 1,600 萬像素 Sony Exmor 感光元件，但相片質素都係「一般般」，原因相片細節比較「鬆散」，放大會睇唔清楚細節，當然這也是太廣角的限制，但小缺點是 Shutter Lag 及紫邊問題比較嚴重。至於影片，支援 1080p 60p 效果都唔會太差，但同相片問題一樣細節唔太銳利。
小編 ：這個價錢 不過不失
「小蟻 運動相機」最吸引係平，這個價錢這個質素，小編覺得都算不過不失，用來 Snapshot、Groufie 的確唔錯，但拍攝運動就好似有點吃力。
售價：$750 (水貨, 旅行版)
查詢：米舖（6997 0808）
分享到 :
最新影片
