是咁的，筆者今日拿住部舊 iPhone5 去咗 Apple Store，諗住問下 Trade-In 幾多錢，順便放埋啲 Android 機換部 6 Plus，清明番鄉下拜山可以威吓。咁我喺大家樂食咗個白汁雞皇飯，就起行喇。
勿中計 Trade-in 唔駛排隊
去過 Apple Store 都知地方都幾大吓，而且唔同服務要排唔同隊，事前我已經做足準備，上網問人有咩需要注意，點知無人答我。咁我一入到門口就問個哥仔，「Trade-In 去邊度排隊呀？」，佢就話「哦，Trade-In 呀？直行右手邊有條隊。」。
咁我就照做啦，去到見到「界」開咗個排隊位，有個 Apple 員工同個客人傾緊偈，諗住係呢道排啦掛。點知佢地傾吓傾吓，傾左廿分鐘先傾完。咁仲不特止，個員工傾完，啪啪蘿柚就咁就走咗去。我 Ｘ! 原來個條都唔係隊黎，我就戇居居咁企咗係度，仲見到隔離個負責 Macbook 嘅員工不時望我兩眼，笑笑口咁。為咗不失霸氣，我即刻轉身射個三分波，扮玩吓啲 iPad 呀 Macbook 呀咁，左手試機右手再拎住部 Xperia 扮吓 Check E-mail，日理萬機。好在 Apple Store 周圍都係 Device，霸氣話番黎就番黎。
咁我今次知機啦，環顧四周圍，睇到其實現場有兩條隊。一條係通去個啲乜鬼野 Genius，一條就有人拎住啲未開盒新 iPhone 排隊。二揀一，無理由錯啫？咁我當然排後面個條啦，Genius 鬼死咁長點排。咁一排又排咗十分鐘，一輪到我，個小姐問我想試乜野機，咁我就即刻同個小姐講「我嚟 Trade-In 嘅！」。個小姐好似聽到暗號好驚訝咁，即刻 Call 同事嚟幫手，一等又等咗幾分鐘。問番，原來成間舖都無人 Trade-In，我嗰時根本就唔使排隊，我呆左兩呆。個小姐好似安慰我咁講「你排隊都啱架！」，我都唔知講咩好。
相關文章:
香港環境卓越大獎頒獎典禮 李家超: 力爭 2050 年前實現碳中和 環境局再批四個氫燃料試驗項目 當中包括小巴貨車及巴士 中電助有需要家庭換變頻冷氣 合資格家庭最多可換 2 部冷氣
要即場買番野
咁算啦，唔排都排咗。無耐就有位哥仔嚟幫我，佢問我 Trade 咩機我話 iPhone5，之後就比咗部機佢睇。佢一嚟乜都唔望就入去手機設定睇序號，之後就瘋狂用佢部 iPad 篤呀篤，唔知篤乜鬼咁鬼耐，全程又唔出聲。咁我見悶悶地，咪撩佢傾吓偈囉。我問佢「係咪好多人嚟 Trade-In 架？」，佢話：「係呀，日日都好多人嚟 Trade-In」咁其實呢個服務好似今日先開。算啦咁我再問佢點解好似得我一個 Trade-In，仲好似唔使排隊。跟住佢講：「哦，你搵我地就得架啦」，我都唔知佢 up 乜。
之後我問佢有咩機 Trade-In 得，佢就話「所有 Apple iPhone 同 iPad 都得架」。咁我本身屋企有部 iPad 2，咁我問佢得唔得，佢就話「iPad 2 得架，不過再舊啲 iPad1 就唔得喇。」可能佢知自己頭先句「所有」好似講錯野，咁就再補充番「iPhone 呢我地就收 iPhone 3GS 以上既 (即係 iPhone4)」。收到。
我再問佢如果 Trade-In，d 積分可唔可以入去我 iTunes Account 度架？佢就話唔得，一定要即場機換機。咁我問佢有咩機揀，佢話咪又係黎黎去去，個啲 iPhone 呀 iPad 呀咁囉，Macbook 嗰啲就唔比 Trade。
唔 check 機但超賤價
咁佢篤咗幾分鐘終於篤完，跟住佢就話我部 iPhone5 值 $895 蚊。「咁_少！？」我唔覺意好大聲咁叫咗出嚟，搞到全場靜了。佢見我搞到咁都好唔好意思，之後佢話：「哦，其實我地回收都為環保盡一分力嘅」。咁我本身都好都支持環保既，間唔中啲底褲都會反轉著，咁就算啦。跟住我問佢：「你睇都無睇過我部機，有無邊到花咗都唔知，條數點計出嚟？」佢就好直接咁同我講：「哦，我比你呢個價係當全新機價嚟架啦！」我當堂嚇一跳，然後得啖笑。
「咁可唔可以幫我 Check 埋屋企部 iPad2 值幾多錢呀？」我問佢，咁佢就叫我番屋企。
哦，原來係要番屋企再拎過嚟比佢 Check，佢話佢地一定要個序號先 Check 到。咁其實你就咁都當咗部機全新，都唔使點 Check 機啦。我再問佢「有得無自己上網 Check 到幾錢呀？」佢話「無，個系統係我地員工先用到」。
Android 機收唔收？
咁又算啦， 咁我問佢收唔收 Android 機，因為屋企都有幾部。佢就即刻笑咗，話：「我地呢個計劃係自己推行，當然只係收 Apple 機啦。」後面可能心諗呢條友傻的嗎。跟住我就話：「唔係喎，我見今日有單 News 話你地收埋 Android 機。」之後我拎部 Xperia 出嚟，上咗 Apple 個網站 (http://store.apple.com/uk/iphone/reuse-and-recycle) 比佢睇，入面寫到明收埋其他手機甚至 PC。咁佢又突然好醒水「哦，呢個網址係 UK 呀嘛，我地 HK 唔關事架。」都真係幾醒目。之後我再問佢「係咩？咁你地有無收到有關情報呀，之後會唔會有得 Trade Android。」個員工望多我兩眼，以為我痴痴地線，講句：「無呀，我地未收到呢方面情報。」之後就光速走咗去。我仲想問佢睇唔睇電視，不過都問唔到了。
完
好喇，呢篇文其實 9 成係真 1 成係老作 (拿，個 Trade-In 價同啲資料都係真既)。對唔住個位姐姐同哥仔！各位愚人節快樂！
相關文章:
香港環境卓越大獎頒獎典禮 李家超: 力爭 2050 年前實現碳中和 環境局再批四個氫燃料試驗項目 當中包括小巴貨車及巴士 中電助有需要家庭換變頻冷氣 合資格家庭最多可換 2 部冷氣
分享到 :
最新影片
