Go Pro 又有新機發表啦，而今次呢部再唔單純係規格上既變化，係外表上都睇得到：皆因佢足足細左同輕左近一半啊！只係見個體積已經非常吸引，唔知內涵又會係點呢？
最明顯既「升級」其實就係佢細左輕左，然後個外形變得正正方方，唔講我以為係 Polaroid’s Cube+ 。今次最吸引既地方就係唔需要再外置防水殼，機身本身已經有防水設計，岩晒啲鍾意玩水既大頭蝦。而介面同按鈕就仍然保持住簡單為主：只有一個按鈕控制影相同拍片，只要輕輕噤下個 button 就會 turn on 同開始拍片，再噤多下就會停止。而如果想做更多既設定，就要用手機 app GoPro App 或者 Smart Remote 去轉 setting 。內置電池仍然可以拍到兩個鐘左右。再者，佢加入左一個新功能：自動圖像旋轉功能。無論你將部 HERO4 Session 「巴黎鐵塔反轉再反轉」，佢都可以自動都變扭返正確既方向，變相你用其他配件會扭動到機身時亦唔需要擔心出黎既相同片扭轉左。至於其他規格包括： 800 萬像素拍攝，具 1080p 60fps 拍攝，防水設計可達水下 33 英尺，雙麥克風系統，自動弱光拍攝以及內置 WiFi 和藍芽等。
開售日期為 7 月 12 日，價格為 US $400 ，同依家既 Hero4 銀色版售價一樣。
以下為官方參考影片：
https://www.youtube.com/watch?v=pzMRr5eTtho
來源： PetaPixel
