之前為左搵番散落係香港既七粒龍珠，孫悟空同菲利瞬間移動到鬧市各區展開激烈對決。由 7月8號起戰線更蔓延到將軍澳既東港城，小編今日經過逾三千呎既戰地，親身體驗到戰況既熾熱！
4D龍珠必殺技體感遊戲區
戰場中央既天下一武道會係龍珠戰士比武之地，只要跟住螢幕指示，做出相應動作就可以瞬間練成悟空必殺技「龜波氣功」同「元氣彈」，擊退頑敵。
▲ 想知點樣玩，記得留意 unwire 既影片啊！(小編出左幾次招都被打敗，最後要工作人員出馬呢！)
最強對最強 3D 戰士
除左主角孫悟空外，比達、杜拉格斯、笛子魔童及悟飯等 1:1 真人高度既戰士，正與菲利、魔人布歐同斯路展開爭奪龍珠之戰。
▲ 超級撒亞人悟空正係娜美星找尋龍珠既影蹤。
▲ 為左爭取時間等悟空復原，悟飯特意同菲利展開對決。
▲ 大家快來同菲利影下相，分散佢既注意力，幫忙拖延時間吧！
▲ 雖然魔人布歐起初性格兇殘，但後來吸收了大界王神之後，變得善良又肥嘟嘟，仲坐定定等緊你既抱抱啊！
▲ 完全體斯路正係親手用岩石所建既擂台上等你做佢下一個對手，你敢接受挑戰嗎？
▲ 比達成日坐既太空艙打開左啊！係咪上衝上去感受一下呢？
穿梭閃卡時光隧道
除左大堂既龍珠主題佈置外，一樓展廊就設置左閃卡時光隧道，入面有近千張《龍珠》閃卡，讓七、八十後可以回味 90年代「儲閃卡」既回憶同小時候沉醉於一幕幕《龍珠》精彩場景的歡樂時光。
▲ 唔知有幾多 wire 民以前有儲過龍珠閃卡呢？呢度就有好多張俾你慢慢回味。
▲ 大家仲記唔記得以前有D 好大張既閃卡呢？小編就記得以前都有一張呢！
▲ 以前為左抽閃卡，又有幾多餐要捱麵包呢？
▲ 除左閃卡，Figure 都係以前必儲既精品。
Capsule Corporation Pop-up Store
位置戰場右手邊有一間以莊子的Capsule Corporation膠囊公司為藍本既 Pop-up Store，入面唔單止有海外特別版龍珠精品，仲有由台灣人氣型男汪東城設計既潮流配飾添！
▲ Pop-up Store 門口有莊子個仔 – 杜拉格斯等緊你啊！
▲ 布勾既公仔肥嘟嘟，點睇都唔似咁兇殘。
▲ 7粒龍珠變成咕臣，你會帶晒 7粒番屋企嗎？
▲ 1000塊既龍珠拼圖，應該都有排砌。
▲ Pop-up Store 仲會有好多唔同圖案既毛巾同 T恤。
▲ 雖然大部份精品都仲未定價，不過龍珠發洩球可似話會係以扭蛋形式抽，無得直接買呢！
