《落跑吧愛情》上星期上映，戲內嘅靚人靚景就如童謠《外婆的澎湖灣》所描述嘅「陽光、沙灘、海浪、仙人掌，還有一位老船長」般，令人嚮往，而這個地方就是澎湖。今日就帶大家去其中 6個戲中場景，來個眼睛小旅行。
1)赤崁珊瑚貝殼海灘
戲中紛紛帶著一卷媽媽最愛聽嘅錄音帶走到澎湖尋找《外婆的澎湖灣》，但原來現實並沒有澎湖灣這個地方，於是任賢齊就為電影花 2000萬喺北海旅客中心左後方沙灘上搭建了白色木屋，亦既是阿武同紛紛居住嘅地方「澎湖灣民宿」。喺電影殺青後木屋交由澎湖縣政府管理，相信唔少人會前往打卡啊！
2) 山水沙灘
「晚風輕拂澎湖灣，白浪逐沙灘，沒有椰林綴斜陽，只是一片海藍藍」，除咗赤崁海灘，戲中亦有唔少海邊嘅場景，其中山水沙灘就喺阿武參加相睇節目錄製嘅現場。喺珊瑚砂所構成嘅沙灘上遠眺翠綠嘅海水延伸到蔚藍海面，水天一色，浪漫愜意。難怪紛紛明知阿武拍緊節目都要走去欣賞啦。
地址：澎湖縣馬公市山水里
3) 澎湖水族館
澎湖喺一個沿海嘅縣市，大部份人都以海為生，就連搵兼職都與海分唔開。阿武為咗盡快贖回民宿就到過澎湖水族館打工。喺中大洋展示區內長達 14公尺嘅海底隧道清潔，隔住玻璃同紛紛打情罵俏，非常浪漫。
地址：澎湖縣白沙鄉歧頭村 58號
4) 七美草原
喺澎湖除咗海洋生物，最常見嘅就喺羊咩咩，所以阿武同紛紛另一份兼職就喺七美草原牧羊。因為七美嘅羊以放牧為主，如果揸車去嘅朋友要小心，唔好撞到佢地啊！
5) 鎮海福安宮
戲中除咗浪漫情節，亦加入咗唔少搞笑元素，阿東喺鎮海福安宮前跳蚊子舞印象最深。而充滿福建傳統建築嘅二崁陳宅更成為「蚊子村」嘅祠堂。唔想變大，記得帶定蚊怕水去啊！
地址：澎湖縣白沙鄉鎮海村 1-6號
6) 雙心石滬
戲中最動人嘅情段應該都喺紛紛將石仔扔向雙心石滬許願嘅一幕。雙心石滬頭尾相接，「心心相印」。傳說有情人喺只要喺石滬前許願，就可以開花結果。如果想學紛紛許願，可以經金龍塔旁邊嘅石板路前往岸邊。
地址：台灣澎湖縣七美鄉
資料來源：Google Map、phsea.com.tw
