HTC 正式推出 One M9+ 相機升級版（之前稱為極光版），作為 HTC One M9+ 的輕微升級機款，主力升級鏡頭，由東芝 2,000萬像素感光元件改用 Sony 2,100萬像素 IMX230 模組，加入雷射對焦和光學防手震技術，理論上攝影體驗應該比之前的 M9+ 好了。想知抵唔抵玩就繼續睇以下文章啦。
外觀幾乎冇分別 齊來找不同！
要從外觀上分辨出 M9+ 同 M9+ 相機加強版 嘅分別，籮文就用咗大約五分鐘時間。兩代機外觀上機乎一模一樣，就連機背底部刻住嘅 Model Number 都係一樣，真真正正需要無比嘅磨擦力先分得到。開估啦，最明顯嘅就係原版 M9+ 機背有景深鏡頭，而 M9+ 相機加強版同樣位置改咗做鐳射對焦嘅模組，並好細隻字寫住 Laser AF。此外，原來相機加強版鏡頭位置比較厚，不過依一點就真係要兩部拍埋比較下先睇得出。一體成型嘅孤型金屬機背，光線底下有唔同程度折射，更加突出硬朗外型，掟都唔爛嘅 Feel，依舊鐵餅仲設有銀金色及灰黑色選擇。
▲唔好問我邊部係普通版，邊部係加強版，因為正面嘅話兩部真係完全一樣
▲背面就分得到啦，原版 M9+ 機背有景深鏡頭，而 M9+ 相機加強版同樣位置改咗做鐳射對焦嘅模組，並好細隻字寫住 Laser AF
▲連機背底部刻住嘅 Model Number 都係一樣
▲原來相機加強版鏡頭位置比較厚，不過依一點就真係要兩部拍埋比較下先睇得出
▲不限於銀色，於光線下就算係黑色機都可以見到金屬紋路，好 Tough 嘅感覺喎
▲雖然話薄唔薄，不過有弧型機背，手感係好啲喎
▲機底有耳機孔同 MircoUSB 位
▲左右側分別可見 Sim 卡槽、MicroSD 卡槽、音量鍵及開關
▲一手掌握係好舒服，M9 + 算係籮文揸過咁多機之中最好揸嘅一批
屏幕色準表現良好
官方冇表明屏幕顯示有改良，同樣係 5.2 吋 SLCD 嘅 2K Mon，不過籮文拍埋就發現原來兩部機白平衡係有唔同，肉眼睇落，普通版 M9＋ 係有輕微偏藍，相機加強版嘅顏色就比較準確。籮文再用 Spyder 量度屏幕色準，果然普通版量到 7205K ，而加強版量到 7116K，雖然只係好輕微嘅分別，但拍埋兩部機，肉眼睇得出分別。
▲籮文用 Spyder 量度兩機屏幕色準
▲量一量普通版 M9+，7205 K 代表有輕微偏藍
▲而加強版就量到 7116K，比較接近 6500K 原白色。雖然只係好輕微嘅分別，不過籮文真係睇得出喎，好叻呀我。
備受讚賞嘅指紋辨識功能 被繼續保留
普通版 M9+ 嘅指紋辨識功能一直都備受讚賞，速度及準確度都拍得住 iPhone 6 ／6S，所以 M9+ 相機加強版當然唔會收起依個功能啦。同多數有指紋辨識功能嘅手機一樣，只需要按壓十幾次就可以登記一隻手指，最多可以登記5隻手指。經過軟件更新，而家無論係加強版或者普通版，只要有 Download 支付寶錢包 App 嘅用家以支付寶俾錢嘅時候都可以用指紋認証身份，咁就又方便，又可以更加提高安全性啦！（斷估用大陸 App 應該未至於會爆炸嘅）
▲一掂即解鎖，速度真係同 iPhone 6 有得揮
犧牲景深鏡頭 加入鐳射對焦及光學防震
相機方面，Duo！冇咗。不過塞翁失馬，焉知非福，有睇 Edward 寫嗰篇普通版M9+嘅評測就知，個 Duo Cam 功能係好弱雞，Duo 極都係得 400萬像素，今次加強版就飛走個 Duo Cam，換黎 Laser AF 鐳射對焦及 OIS 光學防震，而且將東芝 2,000萬像素感光元件改用 Sony 2,100 萬像素 IMX230 模組。拍攝介面上亦無大分別，但加強版加入 Raw Mode，可以拍出 Raw 格式相片，後製空間更大。講返兩代機嘅攝影表現，由於加強版有 Laser AF，對焦速度實在係快咗唔少，昏暗地方影相時對焦亦都比普通版準確。光學防震效果亦效果顯著，拍片時效果更明顯。不過撇除手震及對焦速度的分別，相片質素分別其實唔大。
▲繼續有 Raw Mode，後製空間更大。亦有 M Mode，任你調教 ISO，快門，光圈等。
▲上面係普通版影嘅，下面係加強版影嘅。燈光充沛下畫質分別不大，不及譚仔及譚仔三哥的分別。
▲顏色上可以見到 M9+ 加強版（下圖）白平衡比較準，天空嘅藍色就最明顯。另外你亦可以見到兩個版本速度的確有分別，籮文影嘅時候係同時按下兩機快門，不過可以見到 M9+ 加強版（下圖）的巴士啱啱入鏡就被攝，但上圖可見普通版真係慢一拍
▲再一張，可見顏色上分別， M9+ 普通版（上圖）成張相都橙橙黃黃，似有輕微白平衡錯判，不過可以見到 M9+ 加強版（下圖），成張相不同顏色都色澤分明
籮文：「相唔係話靚好多，但影緊相就真係爽好多」
老老實實，叫得做相機加強版，影相質素嘅升級又真係唔夠突出，由東芝轉做 Sony，多咗嗰 100萬像素其實唔係好覺眼。不過影相又唔係淨係講影出黎嘅畫質嘅，亦都要講使用嘅體驗，雖然介面上冇分別，不過由於加強版換走咗個對我冇乜用嘅 Duo Cam 功能，而帶黎 Laser AF 嘅快速對焦享受，用黎係爽好多。加上有光學防手震，影相唔使下下都見到鬆郁矇又要再影過，拍片時效果更加明顯。雖然係爽啲，不過依個價錢就未夠競爭力囉！
HTC ONE M9+ 相機加強版
售價：$4,998
查詢：3077 5588（HTC）
分享到 :
最新影片
