樂視之前就曾經提及過會係香港推出他們的手機，但最後就取消計劃，原來等嘅就係希望直出新機。今日樂視就係北京發佈第一代手機嘅加強版：樂 1s，仲採用 iPhone 都有用嘅玫瑰金色，來緊仲隨時有得用佢隨街隨時睇英超！究竟用落係點？大家就要留意 Edward 係北京嘅現場速試啦！
一體成形機身更紮實
今次嘅樂 1s，可以話係第一代樂視超級手機 1 嘅加強版，不過大家可能都記得，第一代個時 1 就採用咗塑膠機背，而 1 Pro 就採用咗金屬機身，今次 1s 就同 1 Pro 一樣，都係採用金屬機身，而且移走之前機背頂同底位嘅膠條（應該係天線位），移至機頂同機底位置，機背形成一體成形全金屬物料，感覺更加漂亮。另外，相比第一代嘅金屬機身，今代就多少少磨砂感，感覺仲無咁跣手，手感算係唔錯。
▲採用一體成形設計，無咗機背上下的膠邊，感覺更靚。
▲膠邊被移至機頂及機底，另外機頂設有紅外線感應埠，手機可作遙控；而機底就採用 USB Type-C 插槽。
▲雖然有 5.5 吋大熒幕，但單手操控仍然 OK。
▲同 iPhone 6s Plus 比較一下，可見樂 1s 熒幕尺寸都係 5.5 吋，但機身就更細少少。
▲機身厚度樂 1s（上）比 iPhone 6s Plus（下）厚少少。
▲同上代一樣，熒幕下方設有輕觸式按鍵，分別係程式切換、主頁同埋返回鍵。
指紋設機背加鏡面
至於指紋辨識方面，第一代個時只係得 1 MAX 有呢個功能；而去到 1s，就將呢個功能放入入門機中，指紋辨識器位置設於機背鏡頭下方，感覺解鎖個時就同 LG 嘅 V10 差唔多，都係一隻手指拿機個時就可以順便解鎖，算係幾方便。而且解鎖速度幾快，基本上放手指係上面 1 秒度就解到鎖（官方稱需要 0.15 秒），而且都唔洗禁開關制，算係幾好。1s 嘅指紋解鎖器仲改用鏡面設計，據官方表示係 6H 硬度，應該幾耐用同靚，不過就幾容易痴指膜，有潔癖嘅用家可能用勤啲用抹布清潔啦。
▲今代加入指紋辨識器，而且唔同 1 Pro 同 1 MAX，改用鏡面設計，靚係靚，但係就易痴指膜。
▲同其他手機一樣採用不停按壓方法登記。
▲另外指紋辨識器支援作為快門鍵。
熒幕質素都算 OK
至於熒幕質素方面，今次樂 1s 就同上代一樣，採用 5.5 吋 1080p TFT LCD 熒幕，未有如 1 Pro 般用上 2K QHD 熒幕，質素方面算係不過不失，同上代差唔多，以千零蚊人仔價位嘅手機來講，無論係白平衡定係質素都已經算係合格有凸，只係從側面睇個時會有少許偏黃，但事實上多數人睇手機都係正面睇，所以又唔算好影響平時嘅使用體驗嘅。
▲熒幕基本上同上代超級手機 1 一樣。
▲熒幕質素算係 OK，此外亦有多種 profile 俾大家揀，調較熒幕色調。
▲鍾意熒幕顏色較鮮豔的用家可選擇開啟「影片效果增強」功能。
支援雙卡雙待雙 4G
今次嘅樂 1s，唔支援以 microSD 記憶卡擴充儲存空間，但就支援雙卡雙待功能，而且均支援 LTE-FDD 同埋 TD-LTE 雙 4G 網絡，即係話大家無論係香港定係中國，都可以用得到 4G 極速網絡上網。不過要留意嘅係，雙 SIM 卡槽一張係 Micro SIM，另一張就係 Nano SIM，換 SIM 個時大家就要留意啦。
▲採用雙卡雙待功能，而且支援雙 4G。
▲同其他雙卡機一樣，設有介面設定雙卡功能。
規格一般入門機預咗
今次嘅樂 1s，從 1,499 人民幣機價去睇，擺明就係主攻入門機市場，所以係規格方面，大家都唔好太高期望，包括：MTK Helio X10 Turbo 2.2GHz 八核心處理器、3GB RAM、32GB 內置儲存空間、5.5 吋 1080p 熒幕、1,300 萬像素主鏡頭、500 萬像素前置鏡頭、3,000mAh 容量電池及預載 Android 5.0.2 作業系統，算係幾合理。介面就繼續沿用上代樂 1 系列嘅設計，而 LIVE 功能入面筆者就發現英超一項被獨立出來，莫非係為第日大家可以係手機隨時隨地睇英超直播舖路？
▲從安兔兔評測睇，規格其實同上代差唔多。
▲另外雖然有 3GB RAM，但實際開機後可用只得一半，但都足夠暢順使用。
▲係 LIVE 介面設有英超專屬頻道，莫非係為香港未來直播英超做準備？（笑~~~）
總結：都算抵玩靚仔入門機！
相比第一代超級手機 1 堪稱跑分王，而 1 Pro 就以金屬手感取勝，今次樂 1s 除咗手感比第一代好咗少少之餘，就無乜其他令人驚喜之處。本以為新機已經會採用之前樂視高調宣傳嘅 Qualcomm Snapdragon 820 處理器，誰知道所用仍然只係上代嘅 MTK Helio X10 處理器，只係採用 Turbo 版，時脈微微升頻至 2.2GHz 而已（上代超級手機 1 時脈為 2GHz）。另外加入指紋，令大家入門機都用得到指紋解鎖，算係幾方便。此外鏡頭雖然話用咗 ISOCELL 感光元件（支援 F/2.0 光圈、臉孔偵測及相位對焦功能），但係筆者試過就唔係同上代有好大分別，所以呢一點就唔為大家詳測了。
除咗呢啲以外，樂 1s 就無乜好吸引大家眼球嘅地方了。幸好樂 1s 售價進一步降至 1,099 人民幣，都算係有競爭力。唔知各位 wire 民，又有冇興趣等佢今年十二月（預計）推出個時，買番部入手試試呢？（如果真係準時出到嘅話……）
售價：1,099 人民幣（約 HK$1,340）
查詢：Letv（3956 6666）
