之前小米就發佈了類似 Segway 的代步車「九號平衡車」，不過只是在中國推出，在香港由於法例問題，所以未有推出，自然亦玩不到。趁住今次筆者又去北京公幹之便，自然即刻去試玩下呢部得半個人高度都唔到嘅「平衡車」。究竟試落感覺點？就等 Edward 同大家分享一下。
重點在你「平衡」能力
今次呢部「九號平衡車」，概念就同 Segway 嘅代步車差唔多，不過 Segway 的代步車有支扶手桿，只要扶住再上車，就可以開車，而且平衡會容易好多；今次呢部「九號平衡車」，高度就只係到膝蓋位高少少左右，要平衡全靠使用者本身。雖然咁講，但作為連踩單車拿平衡都覺得困難嘅筆者，試玩過之後就發覺佢比一般單車容易平衡，基本上只要踩上一邊重心腳，等企穩之後再迅速踩上另一隻腳（初學者最好有人扶一扶住先上車），然後透過兩腳並身體拿平衡點，當車大致可以停係度，咁就叫做拿到平衡點，筆者都係用咗分零鐘已經 OK，相信應該都難唔到大家吧。
另外，要開車都唔太難，只要人微微向前傾 3 至 5 度左右，平衡車就會自動前駛；傾斜幅度愈大，車就加速得愈快。所以係操控上，都唔係太難上手。
可以行得幾快 充一次電玩 22km
至於速度方面，官方表示九號平衡車硬件上可以去到 30km/h，但是為咗安全理由，所以限速為 16km/h，基本上呢個速度都已經係幾快，筆者作為初學者自然唔敢開咁快啦，所以搵來小米職員示範，可見他們踩上去開車，真係同一般踩單車速度差唔多，而當速度快過 16km/h 時，佢會發出「咇咇」聲響，提示用家已經超速，並會降速至 16km/h 以下，以保安全，呢一點真係幾體貼。
至於電量方面，據官方表示充滿一次電可以行走 22km，形象啲來講，即係已經足夠大家由尖沙咀地鐵站清真寺出口沿住彌敦道同埋長沙灣道，一直踩到美孚新村！對於一般人來講，真係好夠用。而架車剩幾多電，可以接駁手機後係介面上面睇到（見到仲可以踩幾多 km），或者係車身前方嘅電池 logo 上面大約知道。當然，正如前文所講，呢架車嘅操控最重要都係平衡力，所以官方其實都唔建議係大馬路上面踩，最好就係無乜人嘅路或者公園入面玩會比較合適。
唔會急剎車無咁易炒
另外，九號平衡車有個好處（或者對於有啲人來講係唔好？），就係無剎車功能，要停落來只要企直個人，佢就會慢慢減速，令大家唔會因為急剎車而成個人飛出車外；另外轉彎個時，大家用膝蓋頂一頂個轉向位，架車都係慢慢轉向，唔會轉得好快，令大家唔會因為急轉彎而炒車，所以大家就唔好諗住玩飄移了~~~。不過無剎車嘅缺點，就係萬一有人突然橫向跑出來，你又開得比較快，咁就好容易炒埋一堆，所以筆者建議大家真係玩嘅話，為己為人都係唔好開太快啦。
有指示燈人地知你想做乜
另外，車前車尾都設有指示燈，讓大家係較暗環境下，都可以睇清前路同埋話俾其他路人知你想做乜。車前燈主要用作照明，等大家睇清前面條路；而車尾燈方面，正常情況會亮起尾燈，同樣係用作照明；當要轉彎個時，就會按轉動方向亮起其中一邊嘅燈，燈光會轉為黃色；而當要減慢車速剎車時，兩盞尾燈就會亮起紅色燈，提示其他路人你將會剎車。此外，燈光唔止會照亮車身前後方，燈更加可以調整照射角度，最遠距離可以達到 5 米，一定足夠用家使用。而且大家亦可以係手機設定尾燈顏色，合共有 1,600 萬種。不過由於筆者測試的時間係朝早，所以車頭燈同尾燈都唔會著，就幫唔到大家試了。
防水可上微斜坡
另外，九號平衡車唔止可以係平路上行走，據官方表示仲可以上最多 15 度斜度，即係上輕微斜度嘅斜坡完全無難度。此外，平衡車本身亦支援 IP54，而且亦可以係雨天 / 濕地、沙石路、瓷磚地、甚至有輕微凸起嘅減速路障上面行駛。而輪胎本身採用防滑真空設計，達到 6 至 8 吋，粗度唔止可以幫助大家容易取得平衡，亦具備防滑、減震、耐磨及抗刺穿效果，整體來講應該係十分耐用。
有 APP 控制可鎖車
另外，九號平衡車都有自己嘅 APP，支援 iOS 5.0 或以上，以及 Android 4.3 或以上作業系統，基本上即係支援現今絕大部分嘅 iPhone 及 Android 手機。至於安裝方法，包裝內設有一個 QRCode，大家只要用手機掃描該 code，就會被帶到下載頁面。安裝後再用藍牙與九號平衡車配對就可以了。而 APP 除咗如上文所講可以睇番剩餘電量可行駛距離外，亦可以睇番現時車速，更可以遙距鎖車。如果有人係鎖車情況下移動你嘅九號平衡車，車身同埋 APP 都會發出警報訊號，做到防盜功能。仲有一點就係連移動平衡車都可以用 APP 操控，不過要車上面無人先可以做到，筆者就覺得實用值一般。
總結：好玩新玩具•易學難精
整體來講，試玩過九號平衡車，Edward 覺得係幾好玩嘅，尤其是對於連有手柄嘅 Segway 代步車都未玩過嘅筆者，第一次玩呢類代步車，真係覺得幾刺激同幾好玩。可惜筆者係平時踩單車都好難拿平衡嘅人，所以全程玩九號平衡車，都要小米職員扶住我嘅手臂我先夠膽玩（加上同時拍住片，對於新手來講拿平衡更加困難）！所以九號平衡車真係幾好玩，亦唔難上手，但要精通甚至用來代步，對於平衡力較差（例如：筆者）嘅人來講，真係需要較長時間……同埋提提大家，玩九號平衡車，最好就好似踩單車咁，戴埋頭盔同埋護腕、護膝等，會比較安全啲！
售價：1,999 人民幣（約 HK$2,437）
Edward 試玩片段 : (請耐心等候 Loading)
分享到 :
最新影片
