其實依家香港人個個手上都有好多行動設備：手機 ﹑ 平板 ﹑ 相機 ﹑ Notebook 等，啲線已經喺個袋纏到唔知邊條打邊條。如果你仲係有帶 Apple Watch 的話，隨時出街或者出遠門都要帶多條線。不但止重，到要用既時候解返開啲線都有夠你煩。有見及此， Amber 就推出型格 Apple Watch 錶盒，唔單止可以好好收納 Apple Watch 條磁力充電線，更可以做尿袋，撐足一星期無插頭都仲得！」
四色設計好「Apple 」 簡單而又不失格調
帶得 Apple Watch ，用個五顏六色嘅膠盒裝的話好似唔太好睇。 Amber 既設計同 Apple Watch 既機殼顏色大致相同，包括太空銀﹑灰﹑金同埋玫瑰金，可以襯返自己隻 Apple Watch 隻色。只重 270 克既 Amber ，大小約為 101×101×46.4 mm ，其實並唔會太大，擺落袋相當輕便。
相關文章:
【教學】iOS 18 iPhone 續航力終極延長大法 16 個實用技巧大幅提升手機續航力 【教學】fullmoon AI 模型整個裝到 iPhone 免費即用、毋須連網 VPN、模型參數 3b 【教學】日元跌破新低旅遊好時機 iPhone 鎖定畫面一鍵計算兌換率
內建 3,800 mAh 電源 充 iPhone 一樣得
Amber 唔單止係錶盒，仲可以幫 Apple Watch 充電。 Amber 內建 3,800 mAh 電源，後方有 Micro USB 或者 USB 兩個 port ，可以幫 Apple Watch 充電八次，就算用足一星期都無問題。而且佢仲可以充當 iPhone 既尿袋，雖然只可以充滿 iPhone 一次電，但對於每日充電既人黎講，就可以慳返唔洗帶多個尿袋而又唔驚喺街無電啦！ Amber 比起一般尿袋電壓穩定，唔驚充壞電池壽命添！
唔洗拉線出黎充 擺落 Amber 自動充電
「線呢線呢？唔拉出黎點充電啊？」原來 Amber 本身中間個舊已經係充電器，只要好似以下 video 咁，step by step 將 Apple Watch 嘅磁力充電線整理好放喺中間嘅電源充電器上，每次將 Apple Watch 放喺 Amber 入面就已經可以充電，對於強迫症嘅讀者黎講簡直完美！（小編見到啲線拉晒出黎會發癲）
每個 Apple Watch 人值得擁有嘅錶盒
雖然小編用 Pebble ，但見到 Amber 都突然好想轉會：既唔洗驚放落袋會比尖物刮花，而且可以幫得 18 個鐘電量既 Apple Watch 解決充電問題，咁就算返到屋企太攰唔記得插頭充電，都唔怕第二朝無電無得用。加埋佢個靚仔外型，以及可以幫 iPhone 充電（不過充左 iPhone 可能就做唔到 Apple Watch 尿袋，因為得 3,800 mAh），「又睇得又打得」嘅 Amber ，unwire 嘅讀者可以留意下。
Amber 現正喺 Kickstarter 集資中，而佢地集資金額亦比目標超出近一倍；有興趣嘅讀者依家仍然可以優惠價 US $55 （約 HKD $426）購買一個 Amber ，最快會係今年 12 月出貨。 Amber 係 Kickstarter 嘅集資即將結束，有興趣既讀者記得快啦！
Amber （Kickstarter）：請按此
Amber 官網：請按此
相關文章:
【教學】iOS 18 iPhone 續航力終極延長大法 16 個實用技巧大幅提升手機續航力 【教學】fullmoon AI 模型整個裝到 iPhone 免費即用、毋須連網 VPN、模型參數 3b 【教學】日元跌破新低旅遊好時機 iPhone 鎖定畫面一鍵計算兌換率
分享到 :
最新影片
