Moto 360 都出咗兩代啦，但係兩代都俾人話佢冇 GPS，又唔夠照顧熱愛運動嘅用家。好彩 Motorola 推出咗一隻 Moto 360 Sport，除咗有 GPS 之外，仲有光學心率感應器，配合內建的 Motorola 自家 Moto Body 應用程式，啱晒注重健康嘅你！想知有幾正就要繼續閱讀以下文章啦！
驟眼睇，Moto 360 Sport 好似同 Moto 360 第2代 冇乜分別，其實細心啲睇，Moto 360 Sport 錶身同錶帶係一體化設計，姐係冇得換走佢條膠錶帶。Sport 版繼續有 Moto 360 招牌嘅圓形錶面同黑色下巴，唔知係咪因為黑色襯返錶帶，又或者睇慣咗啦，黑色下巴感覺上冇 Moto 360 咁礙眼。錶冠同 Moto 360 第二代一樣放置於 2 點鐘位置，比起第一代嘅3點鐘位置更加就手。錶底就可以見到心率感應器。同時支援 IP67 防水防塵等級，戴住沖涼冇問題！
▲Moto 360 Sport 錶身同錶帶係一體化設計，姐係冇得換走佢條膠錶帶
▲Sport 版繼續有 Moto 360 招牌嘅圓形錶面同黑色下巴
Moto 360 Sport 用上 1.37 吋 360×325 解像度屏幕，像素密度達 263ppi，雖然唔及 Zenwatch 2、Huawei Watch 或者 Gear S2 咁清，但係勝在有 Anylight Display 功能，可以根據環境光線，自動調節屏幕亮度，果然籮文戴住佢由室內走到室外，屏幕亮度真係會調高，一來比較慳電，二來可以讓我去到邊都清楚閱讀到內容。但係屏幕表現上，有一點令我不滿意，就係接近邊框嘅畫面會因玻璃折射而扭曲，搞到好似畫面有鋸齒咁，明明兩代 Moto 360 都唔覺有依個問題，點解 Sport 版就會咁架！
入戲肉啦，就係運動功能。Moto 360 Sport 最大特點就係有 GPS 同心率感應，配合內建嘅 Moto Body 應用程式就可以時刻監測身體狀況。當你準備去跑步時，只要開啟 Moto Body，按 Running ，GPS 同心率感應都會開始運作，為你紀錄數據。如果你選用 「Sport」錶面，仲可以直接按下錶面嘅 Start 制，開始跑步。而 Moto 360 Sport 可以獨立運作，咁跑步時就唔需要帶埋手機咁麻煩啦！當然，你跑完步亦可以喺手機裝返個 Moto Body 手機版，查閱返運動紀錄，無論路線、心率、速度等等都有詳列，好詳細架。智能錶嘅 GPS 準確度 一向為人詬病，但係睇返 Moto 360 Sport，多數路線都好精準，只係到中間多高樓大廈的地區時就有啲亂咗。
▲心率感應啟動！
▲行咗 1.19 哩，攰死我，不過心率都係未離開過 Warm up 階段…
▲如果你選用 「Sport」錶面，仲可以直接按下錶面嘅 Start 制，開始跑步
▲只要裝返手機版 Moto Body，數據就會自動 Sync 過去手機。
▲智能錶嘅 GPS 準確度 一向為人詬病，但係睇返 Moto 360 Sport，多數路線都好精準，只係到中間多高樓大廈的地區時就有啲亂咗。
▲查閱返運動紀錄，無論路線、心率、速度等等都有詳列，好詳細架。
360 Sport 內建 Qualcomm Snapdragon 400 四核心處理器及 Adreno 305 GPU，512MB RAM / 4GB ROM，介面非常順暢，冇窒機問題。不過 Moto 360 本身電量都麻麻架啦，Moto 360 Sport 版仲要有心率感應又有 GPS，當然耗電更明顯。話說籮文今早凌晨叉到 100% 就拎黎戴啦，戴住訓教，早上9點左右起身就淨返 80%，經過今日用咗半個鐘 Running Mode，而家下午6點，就淨返 15 %。由100%到15%，只需要 18小時，真係倒水咁，相信未夠 24小時就會冇電熄機。不過我就咁諗，買得依隻錶嘅，多數都係勤力做運動嘅人，做運動都咁勤力啦，唔爭在每日放隻錶上個叉電座啦！（不過對於籮文依啲懶人，要我日日叉電？Byebye~）
▲話說籮文今早凌晨12點叉到 100% 就拎黎戴啦
▲而家下午7點都未到，就淨返 10 %
▲只要將電源接入充電座，再將 Moto 360 Sport 放上去就可以
▲7點45分左右，終於頂唔順，要叉電啦！
其實籮文由100%用到15%，大約使用了 18小時，當中 Running Mode 只佔半個鐘，而 Running Mode 正正就係最耗電嘅功能，因為需要心率感應及 GPS 持續運作。外國有媒體就試過全程開 Running 嘅話，由100%到0%就只需要4小時，即係就算你跑到4小時，你隻錶都陪唔到你跑4小時，真係一個悲慘嘅愛情故事。你可能會諗，一日都用唔到，咁不如買隻 Fitbit 嗰類純運動手錶好過！其實你可以咁諗：Moto 360 Sport 平日就可以讓你睇 Message 覆 Message，做到智能手錶嘅嘢，如果收工想去跑步，就用換衫嗰段時間叉一叉隻錶先囉，反正都係放上個座度姐。
售價：HK$2,195
查詢：2405 8071 (Expansy)