AR 虛擬實境相信大家都唔陌生，而呢個技術應用係學習套件亦唔算廣泛，而早排依莉詩就被邀請到中國品牌葡萄科技係香港玩具展的攤位了解這套聲稱係旗下自家研發的嶄新互動遊戲套裝—葡萄探索號。我仲借咗套番公司俾同事玩添！
實物與 App 融合
當我一見到呢套葡萄探索號的時候，第一眼就有種似曾相識的感覺。特別是內置專利的 A.I. 圖像識別鏡頭感應器與 Osmo AR 教學套裝 中的反光鏡有異曲同工之妙。只要將識別鏡頭安裝到 iPad 鏡頭上，就可以將 Apps 同實體玩具結合，訓練 3 至 12 歲小朋友的手眼協調。例如當小朋友用實體的七巧板砌出 Apps 指示的形狀， Apps 就會讚佢砌得啱同成功過關。另外，鏡頭感應距離約 50cm，這樣就避免小朋友雙眼與 iPad 屏幕距離得太近，影響雙眼健康。
▲ 葡萄探索號外型雖然似廁所板，不過內裡就五藏俱全。唔單止有鏡頭感應器同 iPad 底坐，仲有遊戲墊同 3個實體玩具，只要加埋部 iPad 就即刻玩得。
▲ 雖然係中國品牌，不過質料上都算唔錯，特別係底座同鏡頭感應器的圓角設計非常細心，唔怕小朋友拮親。
▲ 鏡頭感應器的感應距離約需 50cm，加上遊戲墊限制小朋友的活動範圍，小朋友就唔怕太近對住個 mon。
▲ 套裝內共有 3 款實體玩具，包括七巧板、扭計骰同太鼓。每個玩具都對應一隻自家開發 Apps。
睇指示領略扭計骰公式
3個玩具中，最強勁的一定是扭計骰，用圓角設計，扭起上嚟都幾順手。表面上佢係一舊 3×3 的扭計骰，實際上都係一舊 3×3 的扭計骰，但就係因為加咗個 Apps ，3歲細路都識將佢還原。只要你將一個整亂晒的扭計骰掃瞄一次，Apps 就會逐步教你點還原，小朋友就可以從中了解到扭計骰的公式同訓練短期記憶。
▲只要你將一個整亂晒的扭計骰掃瞄一次，Apps 就會逐步教你點還原，果然出貓無難度！
七巧板訓練形狀識別力
而七巧板同 Osmo AR 教學套裝 的玩法差唔多，都係用七巧板砌出 Apps 顯示的形狀就可以過關，訓練兒童的形狀識別與解難能力。而不同的是，每過一關都會有一段動畫，不同的動物會出場講短故事，動作有趣，就算唔識字都睇得明。最好的就是，就算砌錯，都唔會話你錯，反而會鼓勵你繼續，唔會傷到小朋友自尊心。
▲ 只要用七巧板砌出 Apps 顯示的形狀就可以過關，而砌的時候反應都幾快，辦識都幾準。
▲ 關與關之間都有動畫，十分有趣，就算唔識字都睇得明。
太鼓發展音樂感
最後一個遊戲有 D 似太鼓，聽住音樂節奏同按 Apps 的指示拍兩塊板就可以得到分數，訓練雙手眼睛協之餘，仲可以訓練音樂感。遊戲有多首音樂可以揀，唔會咁快玩厭，而且有雙人對戰模式，跟節奏拍板之外，仲可以用道具影響對方，同父母一齊玩應該係幾好的親子活動。
▲ 雙人對戰模式可以同父母一齊玩，會係好好的親子活動。
依莉詩用後感：「正呀！出貓玩扭計骰！」
呢套教學套裝雖然未算有創意，而且 Apps 只有簡體字版本，不過實體玩具的造工都算細緻，圓角的設計玩上手亦更安全，加上 Apps 主要用動畫同圖像表達，就算唔識字都可以理解玩法。不過因為 Android 裝置的鏡頭款款位置不同，所以目前只有 iOS 版本，如果無 iPad 就玩唔到啦！至於遊戲方面，七巧板同太鼓都幾好玩，辦別率都幾高，但扭計骰總覺得係靠自己還原先有意思嘛！
售價: RMB 499 (約 HK$590)
分享到 :
最新影片
