去到 4 月底，歐洲各國聯賽都已經去到最後直路，大家以為好快無波睇？未必！now TV 今日宣佈獲得將於今年六月於法國舉行的歐洲國家盃決賽周的播映權加埋今年的美洲國家盃決賽周，可以睇哂 51 + 32 場合共 83 場賽事，當然包括開幕禮、開幕戰同埋準決賽 + 決賽啦！想睇朗尼、C 朗、保方、蘇亞雷斯、古天奴、美斯等人獻技就不容錯過了！
至於今次轉播詳情，筆者總結了 7 大點，讓大家更容易了解：
1) 究竟會播幾多場比賽？
歐洲國家盃決賽周 51 場及美洲國家盃決賽周 32 場比賽，合共 83 場比賽，都可以在 now TV 上足本睇哂！
2) 現有 now TV 足球頻道客戶係咪可以免費睇？
據官方表示，稍後會推出《歐國盃•美洲盃通行證》，可讓大家以 $700 一個價錢睇盡兩大足球決賽周賽事。而 now TV 特選客戶就可以用優惠價甚至免費享有《歐國盃•美洲盃通行證》收看這兩項世界級足球盛事。
3) 咁即係要俾幾多錢？點先叫做特選客戶先？
唔好意思，官方暫時未有公佈，unwire 一有消息會同大家跟進報導！
4) 係咩台有得睇？
歐洲國家盃決賽周會於 now 651 頻道播放，而美洲國家盃就會在 now 650 頻道播放，兩條頻道唔同架，唔好搞錯！
5) 電話 / 平板睇唔睇到先？
官方表示《歐國盃•美洲盃通行證》客戶可以在手機或平板，透過 now 隨身睇 APP 收看所有賽事。
6) 一時起唔到身半夜睇波，有冇得事後睇番？
有！所有歐洲國家盃及美洲國家盃賽事均設有自選服務，可以隨時重溫所有精彩賽事！不過大家記住睇之後唔好睇任何賽果網站、新聞網站同埋電視新聞啦，知道結果先睇就無癮啦！LoL
7) Viu TV 會唔會有得免費睇部分賽事？
暫時官方未有公佈，不過據部分體育媒體引述相關人士指，今日只是講 now TV 播放兩大賽事的事，其他詳情要待之後才公佈。雖然好似講完等於無講，但一日未 say no 一日都未絕望，right？
來源：now TV
