如果要講到手提電話的功能，除咗上 Facebook、WhatsApp、煲劇同埋打機之外，相信最多人用就一定係相機，見到現時嘅手提電話都標榜自己個鏡頭幾咁勁，有幾多像素又有咩 Filters 玩，對好多一般用家來說，一部電話就已經可以取代相機。不過，相機鏡頭的像素再高，如果只係放上 Facebook 或手機睇，其實唔會有好大差別，至於再多的 Filters 對好多人來說更是不切實際，因為一般影相又有幾多機會用得著？
2,300 萬像素咁簡單？
各位 wire 民如果有留意 Sony 最近推出的 Xperia X Performance 以至整個 Xperia X 系列，單看規格的話，或者會覺得鏡頭同之前的 Z5 一樣，都是 2,300 萬像素，只是前置鏡頭由 500 萬升級至 1,300 萬，可能自拍的時候會較靚。雖然唔少人或者會認為，鏡頭像素越高影出來的相就越靚。如果單單只是電話睇、Upload 上 Facebook 甚至要 Print 出來做相簿，其實以現時過千萬像素的電話都已經足以應付有餘，再高的像素大部份都只是廠商的銷售綽頭。相反，電話相機可以擁有更多特別功能，更有助用家影相，實用性反而更高。
▲除了將後置鏡頭升級至 2,300 萬像素，還加入聲稱 0.6s Fast Capture 及「預測追焦」功能。
影相仲要解鎖開 App？0.6 秒一按即拍
要講到 Sony 電話最大的賣點，鏡頭技術就一定佔重要一環，就算在廣告宣傳片，都會著重當中的拍攝功能，在機身上加入實體拍攝鍵或者已經變得好普通。最近才推出的 Xperia X 系列，就加入了 Fast Capture 功能，究竟 Fast Capture 有何用途？相信各位 wire 民都曾經試過，見到有趣的畫面想即時用手機影下來，例如捕捉飛機近距離飛過，可惜電話又要解鎖又要開相機 App，就算現時部份型號無需解鎖都可以拍攝，但始終要先喚醒熒幕再做操控，好多時想拍攝的物體或畫面已過。
今次，Sony 在 Xperia X Performance 和 Xperia X 所新增的 Fast Capture 功能，大家就算在鎖機情況下，只要長按拍攝鍵，就可以直接開鎖兼影低相片，過程只需 0.6 秒。試過這個功能都不得不佩服 Sony 今次的「升級」， 因為聽到「咔嚓」一聲其實已經影完相。當然 Fast Capture 都有不足的情況，就是由於「睇唔到」熒幕，因此影相的角度全靠「盲摸摸」，對焦點或亮度有時亦會有所偏差，唯有靠後製進行補救，但至少「有相可執」。
▲經測試在熄 Mon 情況下，同事一跳起我按快門，實相機制確實能夠一按即拍。
唔洗再不停篤個 Mon 揀對焦：預測追焦又快又準
有用過 Sony 旗下的 Alpha 系列相機，或者都有用過當中的自動追焦功能，意思好簡單，只要預先選取要對焦的物體（一般來說都移動中的物體），之後物體就算不停移動到不同的位置，在按下快門的一刻都會得到最準確的對焦。今次 Sony 就將這個技術移植到 Xperia X 系列之中，在拍攝移動中的人、車或物件時，只要先在熒幕上點選主體，鏡頭就會自動跟住物件移動，不會出現因物件移動而出現走焦的問題，大家亦都無需重覆不斷點選物體再進行重新對焦。經過實際測試，人物的一般移動確實可以達到自動對焦，但如果物件移動的速度較快，就有機會出現「甩焦」的情況，就需要手動重新對焦。
辛尼評語：總好過標榜幾多千萬像素
對小編來說，用電話影相不外乎貪方便，如果要「聞相」就不如用返「大機」，所以電話的鏡頭像素超過一千萬其實已經對成像不會有太大的影響，加埋放上 Facebook 所有相都會被壓縮，幾多千萬像素其實都無用。反而，今次 Sony 在 Xperia X Performance 同 Xperia X 加入的 Fast Capture 就最為實用，一按即拍「影咗先算」，市場上的手機都無可能比佢更快。至於自動追焦可拍到移動中的人物或物件，準確而又具備專業單反的水準，但若要拍下移動速度極快的物件，就仍有改善的空間。
