之前 Samsung 就已經在香港推出了中階機款 Galaxy C5，而另一部同一系列但熒幕較大的機款 C7 亦在日前抵港。究竟呢部中價位但可以用到唔少旗艦機功能的手機用落又係點？而家就等 Edward 同大家介紹下啦。
5.7 吋熒幕 + 金屬機身 = 手感唔錯
相比之前 C5 的 5.2 吋熒幕，今次 Samsung Galaxy C7 配備了更大的 5.7 吋熒幕，解像度就仍然維持在 1080p，足以滿足想用大熒幕手機用家的需要。至於手感方面，它採用了全金屬機身，而且機背金屬加入了磨砂處理效果，手感認真唔錯，而且即使用來打機都唔會容易發熱，就算大熱天時在街上面捉 Pokemon 都唔驚辣手。另外，它的機身十分薄，只有 6.8mm，重量亦僅 169g，大熒幕手機來講算是又輕又薄，加上機邊採用弧形設計，所以單手都勉強 OK。
▲機背採用全金屬機身，而筆者借得的是粉紅金色機款，都幾適合女士使用。
▲機背金屬殼採用了磨砂物料，手感摸落都幾唔錯。
▲熒幕邊框都算幾幼，加上機身幾薄，所以即使有 5.7 吋熒幕，單手都勉強操控到。
▲Home 鍵同樣具備指紋辨識功能，旁邊亦同樣是兩個輕觸式按鍵：程式切換（左）及返回（右）鍵。
▲音量鍵在機身左側，而開關鍵就在右側。
▲C7 亦支援雙卡雙待功能，不過卡槽是 2+1 設計，即是如果要用雙卡就用不到 microSD 記憶卡擴充儲存空間了。
▲至於內置喇叭、3.5mm 耳機插孔及 Micro USB 插槽統統位於機底。
熒幕少「味精」但可接受
至於熒幕方面，C7 採用了 1080p 解像度的 5.7 吋 Super AMOLED 熒幕，質素上算是不錯，最少清晰度、銳利度及在陽光下瀏覽的效果都相當不錯，睇桌面版網頁時細字唔洗放大都睇到。至於色彩方面，筆者覺得有少許「味精」感，不過色準還算準確，整體望落都算可以接受，作為 3 千零蚊的中階機來講，可以收貨。
▲C7 採用了 5.7 吋 1080p Super AMOLED 熒幕。
▲即使係睇桌面版網頁，都唔洗放大顯示已可睇到細字，可見銳利度算頗高。熒幕色彩方面算是準確，不過都有少少偏冷色取向，但屬可接受程度。
▲熒幕色彩有少許「味精」感，在欣賞影片時就更加睇得出。
▲C7 仍維持了 Super AMOLED 熒幕的優勢：高可視角度效果，從側面睇未見變暗或變色情況。
1,600 萬像素鏡頭質素只屬一般
至於鏡頭方面，Samsung Galaxy C7 採用了 1,600 萬像素鏡頭，亦擁有 F/1.9 大光圈及雙 LED 閃光燈，從規格來睇應是去年 S6 系列的鏡頭級數。理論上效果應該 OK，但實際用落又點？筆者就拿了 C7 周圍影，發覺在日光環境下整體算是不錯的，顏色及氣氛亦能還原現場情況。不過細緻度上就明顯不及去年 S6 鏡頭的水平，只要 100% 放大相片就可看到相片細位油畫化的情況都幾明顯，基本上將細位完全磨掉，所以質素只屬網絡分享水平。唯一慶幸的是相片雜訊抑制做得都算 OK，不過鏡頭質素整體來講都只能評為一般水平。
▲C7 的主鏡頭像素最高為 1,600 萬。
▲前置鏡頭方面最高像素為 800 萬。
▲與其他 Samsung 手機一樣，也是有多種拍攝模式供用家選擇。
▲專業模式中有幾項功能可供用家微調。
▲亦有女士至愛的美肌模式，可以大眼、瘦臉及變白膚色。
▲都有各種特效供用家選用。
▲相片質素方面，日間都算還好，但似乎有偏暗情況，測光準確實只是一般。此外，100% 放大相片已見到在日光環境下細位及暗位已有明顯油畫化的情況。
▲至於在比室外更暗的室內環境下拍攝，油畫化情況就更明顯，幸好雜訊抑制算是做得不錯。
▲100% 放大相片瀏覽時就見得更清楚了。
試相區
旗艦功能下放有得平玩
至於功能及介面方面，Samsung Galaxy C7 其實與旗艦系列的 Galaxy S7 差不多，介面風格完全統一之餘，不少之前旗艦機才有的功能，包括：智能管理器、遊戲啟動器等統統有齊，亦採用了超高音質提升技術，中階機已可欣賞到 24bit / 192KHz 的接近 Hi-Fi 音質的音響效果，用來聽歌都算不錯。它亦支援雙卡雙待功能及最高 LTE Cat-4 4G 網絡，算已可滿足多數用家需要。
▲介面上與旗艦機款 S7 系列差不多。
▲如果有用開 Samsung 手機的用家應該很易上手。
▲主介面翻到最左頁仍然有 Flipboard 的新聞速遞介面。
▲不少旗艦系列的功能在 C7 上都用得到，包括這個智能管理器。
▲亦包括這個遊戲啟動器，唔止可以在打機時停止訊息提示及停用使用及返回鍵以免誤觸及打擾玩遊戲，亦可以錄製遊戲畫面，捉精靈的精彩場景就可以好方便分享俾朋友睇啦。
效能一般中階水平打機無問題
最後就講講效能吧，Samsung Galaxy C7 採用了 Qualcomm Snapdragon 625 八核心處理器、4GB RAM、64GB 內置儲存空間等規格，加上採用 Adreno 506 圖像處理晶片，整體來講都算對得住個售價。至於表現上，一般操控未見有窒的情況，十分流暢；就算打機都未見有問題，筆者用來玩了半日 Pokemon Go，感覺同拿住部旗艦手機玩分別不大，對於預算不多但又想買番部運作流暢又打得機的用家，C7 可以講係無乜伏的。
▲C7 採用了 Qualcomm Snapdragon 625 MSM8953 八核心處理器，亦有 4GB RAM，足夠一般用家使用了。
▲用安兔兔評測測試 C7，獲得 60,449 分，排名大約比小米 4s 及 iPhone 5s 低一點。
總結：無伏！中價機算係抵玩
整體來講，Samsung 今次推出的 Galaxy C7，作為 3 千零蚊一部的大熒幕手機來講，算係無乜伏，重點係用落完全順之餘仲打機無乜問題，加上採用感覺較高貴的金屬機身，機身又唔會熱到辣手，整體觀感、手感及使用感受都幾良好，如果大家預算有限，又不是十分重視相片放大後的質素的話，C7 都不失為一個幾抵玩的選擇。
售價：$3,398（設有金色、粉紅金色及灰色）
查詢：Samsung（3698 4698）
