LEGO 可以砌出大人小朋友嘅夢想，係聖誕節呢個俾人發夢嘅節日，樂高專業認證大師 Andy Hung 同佢嘅團隊就係朗豪坊砌出佢地心目中嘅白色聖誕。我依莉詩就到達咗呢個冰雪王國，仲成為咗一日女王添！
100萬粒 LEGO 砌出皇室氣派
既然係我嘅小王國，梗係有番咁上下氣派！整個王國由 100萬粒 LEGO 砌成，係 LEGO 微景模型嘅 20倍大，而且有別於過往LEGO色彩繽紛的風格，顏色以白色及灰色為主，所以零件都相當罕見。而中間 10米高嘅城堡更加係全場焦點，白色配藍色嘅外牆，配以燈光就好似置身異地一樣。
▲ 由冰雪女王帶領嘅 15個 LEGO Minifigures 都嚟到慶祝的登基啊！
▲ 城堡上有兩個威風凜凜嘅士兵維持治安。
▲ 呵呵！皇座係我嘅！國王同皇后都要企埋一邊！
▲ 皇座上嘅馬賽克畫會隨你嘅腳步而轉變，從左面睇會係國王，係右面睇就會變成冰雪女王。
5米高夢幻聖誕樹添氣氛
城堡右方有一棵 5米高嘅聖誕樹，上面每一個聖誕球都係由 LEGO 砌成，相當精緻，而樹前嘅 1.5米雪人爸爸、雪人媽媽同雪人 BB 同樣由 LEGO 砌成，雖然唔會融，不過都會散架，所以大家要小心呵護啊！
▲ 5米高嘅聖誕樹為王國添加咗唔少聖誕氣氛。
▲ 雪人家族由一粒粒 LEGO 砌成，雖然唔會融，不過都會散架，所以大家要小心呵護啊！
▲ 每一個聖誕球都係由 LEGO 砌成，相當精緻。
坐皇家馬車出巡
在城堡外嘅皇家馬車就係我嘅代步工具，坐住出巡真係夠晒威威！
▲ 雖然馬仔唔識郁，但坐上去影相已經好滿足。
▲ 馬車上仲放有一份份禮物，就等我派俾忠心嘅僕人啦！
浪漫噴泉許願池
噴泉嘅水點解突然靜止下來？原來係巫師正在施展魔法，將噴泉變成「冰雪許願池」。算係我俾大家聖誕嘅少少祝福啦！願望係咪會成真要遲啲先知，但我預言，只要係放幾個 $1 入去，好快就會變好多好出嚟。
▲ 典雅嘅天使雕像加上企係許願池上默默為大家加持。
▲ 天使像下方仲有兩仔雀仔添！
▲ 行到攰同小妖精坐係長椅上面傾下計，體察民情先！
LEGO 蹤跡偏佈商場
我嘅王國又點止 4樓通天廣場，由砵蘭街門口開始，就會見到我嘅小精靈攬住小熊玩具迎接大家進場，而 商場8樓、12樓及辦公大樓5樓電梯大堂都有接近 2米高用 LEGO顆粒砌成嘅聖誕樹，唔好錯過啊！
▲ 小精靈攬住小熊玩具迎接大家進場！
▲ 商場8樓、12樓及辦公大樓5樓電梯大堂都有接近 2米高用 LEGO顆粒砌成嘅聖誕樹，都係由Andy團隊精心製作架！
▲ 打完片記得上去 12樓 LEGO Store ，只要將相根據指示上傳到個人Instagram，就可以免費打印照片啦！
依莉詩點評
呢個冰雪王國相當有心思，除咗放大 20倍嘅城堡、馬車同聖誕樹，當中嘅雪人、聖誕球等小配件都係由一粒粒 LEGO 砌成，每一件都非常精緻，並唔係單純影相位咁簡單，甚至係一件藝術品。白色同灰色主調同白色聖誕好夾，而且朗豪坊位置方便，非常適合日頭去打片呢！另外，雖然今次無 pop-up store ，不過 12樓本身就有實體店，大家去玩想一展身手，都可以上去買番盒啊！
聖誕氣氛 ★★★★☆
必影指數 ★★★★☆
相關影片:
LEGO 白色聖誕
日期： 2016年11月17日 至 2017年1月2日
時間： 上午11時至晚上11時（12月17日至24日及31日延長至凌晨1時）
地點： 朗豪坊4樓通天廣場
分享到 :
最新影片
